రణ్వీర్ సింగ్ హీరోగా నటించిన ధురంధర్ మూవీ రికార్డు వసూళ్లు సాధించిన విషయం తెలిసిందే. ఈ చిత్రానికి సీక్వెల్ గా వచ్చిన ‘ధురంధర్: ది రివెంజ్’ కూడా బాక్సాఫీస్ వద్ద వసూళ్ల వర్షం కురిపించి భారీ విజయాన్ని అందుకుంది. అయితే తాజాగా.. ఈ చిత్రాలు తన ఖాతాలో మరో రికార్డు వేసుకున్నాయి.
నెట్ఫ్లిక్స్లో అత్యధికమంది చూసిన చిత్రంగా ‘ధురంధర్’ నిలిచింది. ఈ ఏడాది జనవరి నుంచి జూన్ వరకు నెట్ఫ్లిక్స్లో అత్యధికంగా 37 మిలియన్ వ్యూస్ను ఈ మూవీ సొంతం చేసుకుంది. అలాగే ‘ధురంధర్ 2’కూడా 27.8 మిలియన్ల వ్యూస్ తో అదరగొట్టింది.
ఈ గణాంకాలను ఓటీటీ కంటెంట్, వ్యూవర్షిప్ను విశ్లేషించే అర్మాక్స్ మీడియా వెల్లడించింది. ప్రస్తుత సంవత్సరం జనవరి నుంచి జూన్ వరకు సినిమాలు, షోలు, క్రికెట్ ఇలా ఓటీటీ కంటెంట్ను మొత్తం క్రోడీకరించి అత్యధిక మంది వీక్షించిన వాటి వివరాలను ప్రకటించింది. ఈ జాబితాలో 228.4 మిలియన్ వ్యూస్తో ఐపీఎల్-2026 మొదటి స్థానంలో ఉండగా.. రెండో స్థానంలో ఇండియాస్ గాట్ టాలెంట్ సీజన్-2.. 38.5 మిలియన్ వ్యూస్తో నిలిచింది. అలాగే ‘ధురంధర్: పార్ట్ 1’..35.2 మిలియన్ వ్యూస్తో మూడో స్థానంలో ఉంది.
మరోవైపు ఇండియా vs న్యూజిలాండ్ సిరీస్ 30.5 మిలియన్ వ్యూస్.. ‘ధురంధర్ 2’ 28.8 మిలియన్ వ్యూస్.. మేడ్ ఇన్ ఇండియా: ది టైటాన్ స్టోరీ 17.8 మిలియన్ వ్యూస్.. ఫిఫా వరల్డ్కప్ 17.6 మిలియన్ వ్యూస్.. ప్రభాస్ నటించిన ‘ది రాజా సాబ్’ 17.5 మిలియన్ వ్యూస్.. హిందీ వెబ్సిరీస్ చిరైయా 16.3 మిలియన్ వ్యూస్ తో టాప్-10లో నిలిచాయి.
ఇక తెలుగు సినిమాల విషయానికొస్తే ‘ది రాజా సాబ్’ తర్వాత నందూ, ఆవికాగోర్ ప్రధాన పాత్రలో నటించిన అగ్లీ స్టోరీ 8.1 మిలియన్ వ్యూస్.. బాలకృష్ణ నటించిన అఖండ-2, 6.6 మిలియన్ వ్యూస్ తో టాప్లో ఉన్నాయి. అలాగే వెబ్సిరీస్ లో 6.3 మిలియన్ వ్యూస్తో ‘సేవ్ ది టైగర్స్ 3’టాప్లో నిలిచింది. ఆ తర్వాత 4.3 మిలియన్ వ్యూస్ తో విక్రమ్ ఆన్ డ్యూటీ.. 3.7మిలియన్ వ్యూస్ తో బ్యాచ్మేట్స్ నిలిచాయి.
