టాలీవుడ్ పరిశ్రమలో ఇద్దరు డ్యాన్స్ మాస్టర్ల మధ్య నెలకొన్న వివాదం సోషల్ మీడియాలో వైరల్ అయిన సంగతి తెలిసిందే.. అలాగే డ్యాన్సర్ల అసోసియేషన్ లో ఉన్న లోపాలు కూడా బయటపడ్డాయి. స్టార్ కొరియోగ్రాఫర్లు అయిన జానీ మాస్టర్, శేఖర్ మాస్టర్ ల మధ్య కొంతకాలంగా కోల్డ్ వార్ నడుస్తోంది. ప్రస్తుతం ఈ వార్ తెలుగు ఫిల్మ్ ఫెడరేషన్ వర్సెస్ డ్యాన్సర్స్ అసోసియేషన్గా మారిపోయింది.
మరోవైపు డ్యాన్సర్స్ అసోసియేషన్కు జానీ మాస్టర్ భార్య సుమలత అధ్యక్షురాలిగా వ్యవహరిస్తున్నారు. మొత్తం 17 మంది సభ్యులు ఉన్న ఈ కమిటీ పై రెమ్యునరేషన్ స్కామ్కు పాల్పడుతున్నారనే ఆరోపణలున్నాయి. ఈ కారణంగా అసోసియేషన్ అధ్యక్షురాలు సుమలత.. జనరల్ సెక్రటరీ, ట్రెజరర్ను సస్పెండ్ చేశారు. కాగా ఆమె తీసుకున్న ఈ నిర్ణయాన్ని వ్యతిరేకిస్తూ.. శేఖర్ మాస్టర్ వర్గానికి చెందిన మరో 8 మంది ఈసీ సభ్యులు తమ పదవులకు మూకుమ్మడిగా రాజీనామా చేశారు.
దీంతో అసోసియేషన్లో ఒక్కసారిగా 10 మంది సభ్యుల స్థానాలు ఖాళీ అయ్యాయి. ఈ క్రమంలో డ్యాన్సర్స్ అసోసియేషన్లో ఖాళీగా ఉన్న 10 పదవులకు మాత్రమే ఉప ఎన్నికలు నిర్వహించాలని సుమలత డిమాండ్ చేస్తున్నారు. ఈ ప్రతిపాదనను శేఖర్ మాస్టర్ వర్గం తిరస్కరిస్తోంది.
ప్రస్తుతం ఉన్న కమిటీని పూర్తిగా రద్దు చేసి, మళ్ళీ ఎన్నికలు నిర్వహించాలని వారు పట్టుబడుతున్నారు. దీంతో రెండు వర్గాల మధ్య విభేదాలు మరింత ముదురుతూ, ఎన్నికల వ్యవహారం ఆసక్తికరంగా మారింది. కాగా ఈ వివాదం పెద్దది అవడంతో ఫిలిం ఫెడరేషన్ కూడా ఇన్వాల్వ్ అయింది. దీంతో సుమలత, జానీ మాస్టర్ ఫెడరేషన్ పై సంచలన వ్యాఖ్యలు చేసారు. ఈ వ్యాఖ్యలను ఫిలిం ఫెడరేషన్ సీరియస్ గా తీసుకొని విచారణకు పిలిచారు.
కానీ జానీ మాస్టర్ వెళ్లకపోవడంతో ఫిల్మ్ ఫెడరేషన్ నేడు షోకాజ్ నోటీస్ లు జారీ చేసింది. ఫెడరేషన్ వ్యతిరేక కార్యకలాపాలకు పాల్పడ్డారని ఆరోపిస్తూ ఈ నెల 14న విచారణకు పిలిచినా హాజరు కాలేదని ఆగ్రహం వ్యక్తం చేస్తూ 7 రోజుల్లోగా లిఖిత పూర్వక వివరణ ఇవ్వాలని ఆదేశాలు జారీ చేసింది. అంతే కాకుండా జానీ మాస్టర్ కు ఫెడరేషన్ తరపున సహాయ నిరాకరణ చేస్తామని, బహిరంగ క్షమాపణలు చెప్పకపోతే క్రమశిక్షణ చర్యలు తీసుకోవలసి వస్తుందని హెచ్చరించింది..
