తిరుమల కొండపై శ్రీవేంకటేశ్వరస్వామి దర్శనం కోసం భక్తులు భారీ సంఖ్యలో పోటెత్తారు. వారంలో సెలవు రోజులు సమీపిస్తుండటంతో శ్రీవారి దర్శనార్థం వచ్చే యాత్రికుల సంఖ్య విపరీతంగా పెరిగింది. దీంతో తిరుమల తిరువీధులన్నీ గోవింద నామస్మరణతో మార్మోగుతూ, తీవ్ర రద్దీతో కిటకిటలాడుతున్నాయి.
వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు భక్తులతో పూర్తిగా నిండిపోయాయి. ఎలాంటి ముందస్తు దర్శన టోకెన్లు లేని భక్తులు క్యూ కాంప్లెక్స్ వెలుపల భారీ క్యూలైన్లలో వేచి ఉండాల్సిన పరిస్థితి నెలకొంది. ప్రస్తుతం ఉచిత (సర్వ) దర్శనం కోసం స్వామివారిని దర్శించుకోవడానికి కనీసం 12 గంటల సమయం పడుతోందని తిరుమల తిరుపతి దేవస్థానం (టీటీడీ) అధికారులు వెల్లడించారు.
క్యూలైన్లలో సుదీర్ఘ సమయం వేచి ఉండే భక్తులు, ముఖ్యంగా చిన్న పిల్లలు, వృద్ధులకు ఎలాంటి ఇబ్బందులు కలగకుండా టీటీడీ విస్తృత ఏర్పాట్లు చేసింది. వారికి నిరంతరాయంగా తాగునీరు, వేడి పాలు, అల్పాహారాన్ని అందిస్తున్నారు.
ఇక బుధవారం ఒక్కరోజే మొత్తంగా 74,471 మంది భక్తులు స్వామివారిని దర్శించుకోగా, వారిలో 31,319 మంది తలనీలాలు సమర్పించి మొక్కులు తీర్చుకున్నారు. భక్తులు స్వామివారికి సమర్పించిన కానుకల ద్వారా శ్రీవారి హుండీ ఆదాయం రూ.4.68 కోట్లుగా నమోదైనట్లు టీటీడీ అధికారులు తెలిపారు.
