SS Rajamouli: కోలీవుడ్ స్టార్ హీరో సూర్య, దర్శకధీరుడు ఎస్.ఎస్. రాజమౌళి కాంబినేషన్‌లో సినిమా వస్తుందా? ఇప్పుడు సినీ వర్గాల్లో ఇదే హాట్ టాపిక్‌గా మారింది. గతంలో ఎన్నోసార్లు ఈ కాంబినేషన్‌పై వార్తలు వచ్చినప్పటికీ.. తాజాగా రాజమౌళి చేసిన వ్యాఖ్యలు ఈ ప్రచారానికి మరింత బలాన్ని చేకూర్చాయి.
సెప్టెంబర్ 27న జరిగిన ఓ సినిమా ఈవెంట్‌లో రాజమౌళి, సూర్య ఇద్దరూ పాల్గొన్నారు. ఈ సందర్భంగా సూర్యతో ఎప్పుడు సినిమా చేస్తారని రాజమౌళిని ప్రశ్నించగా.. ఆయన ఆసక్తికరంగా స్పందించారు. ప్రస్తుతం తాను వచ్చిన సినిమా ప్రమోషన్‌నే మాట్లాడాలని, సూర్యతో తన సినిమా గురించి మాట్లాడితే అదే హెడ్‌లైన్‌గా మారి అసలు సినిమా పక్కకు వెళ్లిపోతుందని రాజమౌళి అన్నారు. అంతేకాదు, ఈ కాంబినేషన్ ప్రశ్న అడుగుతారని కూడా ముందే ఊహించానని జక్కన్న చెప్పారు.
వాస్తవానికి, సూర్య–రాజమౌళి కాంబినేషన్ సినిమాపై చర్చ ఇప్పటిది కాదు. గతంలో రాజమౌళి తెరకెక్కించిన ‘మగధీర’ సినిమాలో హీరోగా సూర్య పేరు పరిశీలించారనే ప్రచారం కూడా జరిగింది. ఆ కాంబినేషన్ కుదరకపోవడంతో.. అప్పటి నుంచి వీరిద్దరి కలయిక కోసం అభిమానులు ఆసక్తిగా ఎదురుచూస్తున్నారు.
రాజమౌళి కూడా గతంలో సూర్యపై తనకు ఉన్న అభిమానం, ఆయనతో సినిమా చేయాలనే ఆసక్తి గురించి మాట్లాడిన సందర్భాలు ఉన్నాయి. దీంతో ఈసారి వైరల్ అవుతున్న వార్తలకు ఫ్యాన్స్‌లో మరింత హైప్ వచ్చింది. ఇటీవల సోషల్ మీడియాలో మరో ఆసక్తికరమైన ప్రచారం మొదలైంది. సూర్య కెరీర్‌లో 50వ సినిమాను రాజమౌళి దర్శకత్వంలో చేయబోతున్నారనే వార్తలు వైరల్ అయ్యాయి. అయితే, ప్రస్తుతం అందుతున్న సమాచారాన్ని బట్టి దీనిపై అధికారికంగా ఎలాంటి ప్రకటన లేదు. కొన్ని మీడియా కథనాలు కూడా ఈ వార్తను గాసిప్స్‌గానే రాస్తున్నాయి.
