శ్రీవారి బ్రహ్మోత్సవాల్లో ఆదిశేష వాహన సేవకు అత్యంత విశిష్ట స్థానం ఉంది. సప్తగిరులపై కొలువైన శ్రీ వేంకటేశ్వర స్వామివారు ఆదిశేషుడిని వాహనంగా అధిరోహించి భక్తులకు దివ్య దర్శనమిస్తారు.. పురాణాల ప్రకారం ఆదిశేషుడు శ్రీమహావిష్ణువుకు నిత్యసేవకుడు. క్షీరసాగరంలో విష్ణుమూర్తి శేషతల్పంపై శయనిస్తే.. ఆ స్వామివారికి ఆధారంగా నిలిచేది ఆదిశేషుడే. భగవంతుడి సేవలో తనను తాను పూర్తిగా అర్పించుకున్న శేషుడు.. భక్తి, దాస్యభావానికి ప్రతీకగా భావించబడతాడు.
శ్రీవారి ఆదిశేష వాహన సేవలో ఏడు పడగలతో దర్శనమిచ్చే శేషుడు సప్తగిరులకు ప్రతీకగా భావిస్తారు. తిరుమల కొండలను శేషుని రూపంతో అనుసంధానించే ఆధ్యాత్మిక భావన కూడా ఉంది. అందుకే స్వామివారు ఆదిశేష వాహనంపై ఊరేగుతూ భక్తులకు దర్శనమివ్వడం.. తిరుమల క్షేత్ర మహాత్మ్యాన్ని మరింత ప్రతిబింబిస్తుంది. ఆదిశేషుడు కేవలం స్వామివారికి వాహనం మాత్రమే కాదు.. నిరంతర భగవత్ సేవకు ప్రతిరూపం.
తనకు లభించిన శక్తి, స్థానం, వైభవం అన్నీ భగవంతుడి సేవకే అంకితం చేసిన మహాసేవకుడిగా పురాణాలు ఆదిశేషుడిని కీర్తిస్తాయి. అందుకే ఆదిశేష వాహన సేవను దర్శించడం అంటే స్వామివారి వైభవాన్ని చూడటంతో పాటు.. జీవితానికి ఒక గొప్ప సందేశాన్ని స్వీకరించడమనే ఆధ్యాత్మిక భావన భక్తుల్లో ఉంది. అహంకారాన్ని విడిచి, భగవంతుడి పాదసేవలో మనసును అర్పిస్తే.. అదే నిజమైన భక్తి అని ఆదిశేషుడు మనకు గుర్తుచేస్తాడు.
మరోవైపు శ్రీవారి ఆదిశేష వాహన దర్శనం భక్తులకు శాంతిని, భక్తిని, శరణాగతి భావాన్ని ప్రసాదిస్తుందని విశ్వసిస్తారు. అందుకే బ్రహ్మోత్సవాల్లో ఈ సేవకు ప్రత్యేకమైన ఆధ్యాత్మిక ప్రాధాన్యం ఉందని చెబుతారు. ఆదిశేష వాహనంపై విరాజిల్లే శ్రీవారిని దర్శించడం.. అనంతుడైన పరమాత్మను, ఆయనకు అంకితమైన అనంత సేవాభావాన్ని ఒకేసారి దర్శించడమేనని అంటారు..
గమనిక: ఇక్కడ అందించిన వివరాలు కేవలం సాంప్రదాయ పురాణ విశ్వాసాలు మరియు ఆధ్యాత్మిక భావనల ఆధారంగా ఇవ్వబడ్డాయి. వీటిని కేవలం మతపరమైన విశ్వాసాల కోణంలోనే చూడాలి. వ్యక్తిగత నిర్ణయాలు తీసుకునే ముందు సంబంధిత రంగ నిపుణులను సంప్రదించడం మంచిది.
