సెమీకండక్టర్ రంగంలో ఉద్యోగాల జాతర
రూ.1.27 లక్షల కోట్ల కేటాయింపులు
భవిష్యత్ లో 2 లక్షల ఉద్యోగాలు
సెమీకాన్ ఇండియా 2026లో మోదీ కీలక ప్రసంగం
సెమీకండక్టర్ రంగంలో భారత్కు కొత్త అవకాశాలు తెరుచుకుంటున్నాయి. కేంద్ర ప్రభుత్వం సెమీకాన్ 2.0 కింద రూ.1,27,500 కోట్ల భారీ కేటాయింపులు చేయగా, చిప్ తయారీ నుంచి డిజైన్, పరిశోధన, పరికరాల తయారీ వరకు పూర్తి వ్యవస్థను దేశంలో నిర్మించే లక్ష్యంతో ముందుకు వెళ్తోంది. ప్రధాని నరేంద్రమోదీ సెమీకాన్ ఇండియా 2026 ప్రారంభోత్సవంలో భారత్ ప్రపంచానికి నమ్మకమైన చిప్ తయారీ కేంద్రంగా ఎదగడానికి సిద్ధమవుతోందని చెప్పారు.
సెమీకాన్ 2.0 అంటే కేవలం కొన్ని చిప్ ఫ్యాక్టరీలకు ప్రభుత్వం డబ్బులు ఇవ్వడం కాదు. భారత్లో చిప్ డిజైన్ నుంచి తయారీ, ప్యాకేజింగ్, పరిశోధన, పరికరాలు, ముడి పదార్థాల వరకు పూర్తి సెమీకండక్టర్ ఎకోసిస్టమ్ను నిర్మించడమే దీని లక్ష్యం. 2026 జూలైలో కేంద్ర కేబినెట్ ఆమోదించిన ఈ పథకానికి రూ.1,27,500 కోట్లను అందించనున్నారు. చిప్ తయారీలో భారత్కు అవసరమైన సామర్థ్యాన్ని, దేశీయ కంపెనీలను, స్టార్టప్లను పెంచేందుకు ఈ నిధులను ఉపయోగించనున్నారు.
మొదటి దశలో దేశంలో 12 సెమీకండక్టర్ ప్రాజెక్టులకు ఆమోదం లభించింది. సెమీకాన్ 2.0తో ఈ వ్యవస్థను మరింత విస్తరించాలని ప్రభుత్వం భావిస్తోంది. రెండో దశలో పెట్టుబడులు కేవలం ఫ్యాబ్లకే పరిమితం కాకుండా చిప్ తయారీకి అవసరమైన యంత్రాలు, ప్రత్యేక రసాయనాలు, సబ్స్ట్రేట్స్, పరిశోధన వంటి రంగాలకు కూడా చేరనున్నాయి.
పెట్టుబడుల లెక్క ఎంత?
సెమీకాన్ 2.0లో పెట్టుబడులకు సంబంధించి కేంద్ర మంత్రి అశ్వినీ వైష్ణవ్ కీలక వివరాలు వెల్లడించారు. రెండో దశ కింద సుమారు 11–12 బిలియన్ డాలర్ల పెట్టుబడి ప్రతిపాదనలు వచ్చాయని తెలిపారు. అంటే దాదాపు రూ.1 లక్ష కోట్లకు సమానమైన పెట్టుబడులు. ఈ ప్రతిపాదనలు రానున్న రెండు నుంచి మూడేళ్లలో అమలయ్యే అవకాశం ఉందని చెప్పారు.
అమెరికాకు చెందిన అప్లైడ్ మెటీరియల్స్ కూడా భారత్లో వచ్చే పదేళ్లలో 5 బిలియన్ డాలర్ల పెట్టుబడి ప్రణాళికను ప్రకటించింది. పరిశోధన, సరఫరా వ్యవస్థ, నైపుణ్యాభివృద్ధి, సాంకేతిక మౌలిక సదుపాయాల విస్తరణపై ఈ పెట్టుబడులు దృష్టి పెట్టనున్నాయి.
రెండు లక్షల ఉద్యోగాలు.. విద్యార్థులకు అవకాశం
సెమీకండక్టర్ రంగంలో ఉద్యోగాలపై యువతలో ఆసక్తి పెరగడానికి ప్రధాన కారణం ఇదే. ఇండియా ఎలక్ట్రానిక్స్ అండ్ సెమీకండక్టర్ అసోసియేషన్ (IESA) అంచనా ప్రకారం, సెమీకాన్ 2.0 కింద వచ్చే ఐదేళ్లలో రెండు లక్షల వరకు ఉద్యోగాలు ఏర్పడే అవకాశం ఉంది. ఇది పరిశ్రమ అంచనా.
సెమీకండక్టర్ రంగంలో ఎలాంటి ఉద్యోగాలు?
చిప్ డిజైన్ ఇంజినీర్లు- VLSI, RTL, ASIC, FPGA, వెరిఫికేషన్, చిప్ ఆర్కిటెక్చర్ వంటి విభాగాల్లో డిజైన్ నైపుణ్యాలు అవసరం.
ఫ్యాబ్, తయారీ ఇంజినీర్లు- సెమీకండక్టర్ ఉత్పత్తి ప్రక్రియలు, పరికరాల నిర్వహణ, క్లీన్రూమ్ ఆపరేషన్స్, ప్రాసెస్ కంట్రోల్.
పరిశోధన, టెస్టింగ్- మెటీరియల్స్ సైన్స్, కెమికల్ ఇంజినీరింగ్, చిప్ టెస్టింగ్, ప్యాకేజింగ్, క్వాలిటీ కంట్రోల్.
ఇప్పటివరకు ఐటీ రంగంలో ఉద్యోగాల కోసం ఎక్కువగా కంప్యూటర్ సైన్స్, సాఫ్ట్వేర్ డెవలప్మెంట్, డేటా అనలిటిక్స్ వైపు చూసిన విద్యార్థులకు సెమీకండక్టర్ రంగం మరో మార్గాన్ని చూపిస్తోంది. ఎలక్ట్రానిక్స్, ఎలక్ట్రికల్, మెకానికల్, కెమికల్, మెటీరియల్స్ సైన్స్, ఫిజిక్స్, కంప్యూటర్ ఇంజినీరింగ్ చదివిన వారికి ఇందులో అవకాశాలు ఉంటాయి. డిప్లొమా, ఐటీఐ, టెక్నికల్ కోర్సులు చేసినవారికి కూడా తయారీ, పరికరాల నిర్వహణ, టెస్టింగ్ వంటి విభాగాల్లో శిక్షణ ఆధారిత ఉద్యోగాలు దొరికే అవకాశం ఉంది.
ఐటీ దెబ్బ తింటున్న వేళ.. చిప్ రంగం ఎందుకు ముఖ్యం?
సాఫ్ట్వేర్ రంగంలో ఏఐ, ఆటోమేషన్, మారుతున్న నైపుణ్యాల కారణంగా ఉద్యోగాల స్వభావం కూడా మారుతోంది. అలాంటి సమయంలో విద్యార్థులు కేవలం సాఫ్ట్వేర్ కోడింగ్పైనే ఆధారపడకుండా హార్డ్వేర్, ఎలక్ట్రానిక్స్, చిప్ డిజైన్, తయారీ సాంకేతికత వంటి రంగాలపై కూడా దృష్టి పెట్టవచ్చు.
అయితే సెమీకండక్టర్ రంగం ఐటీకి ప్రత్యామ్నాయం అని చెప్పడం సరికాదు. చిప్ పరిశ్రమలోనూ ఆటోమేషన్, అధిక నైపుణ్యాల అవసరం, అనుభవజ్ఞులైన ఇంజినీర్లకు డిమాండ్ ఉంటుంది. విద్యార్థులకు అవకాశాలు రావాలంటే కాలేజీ చదువుతో పాటు ప్రాక్టికల్ ట్రైనింగ్, ల్యాబ్ అనుభవం, ఎలక్ట్రానిక్స్ సిస్టమ్స్పై అవగాహన అవసరం.
