Saudi Arabia: యెమెన్ నుంచి దూసుకొస్తున్న హౌతీ తిరుగుబాటుదారుల బాలిస్టిక్ క్షిపణులు, ఆత్మాహుతి డ్రోన్లు సంపన్న సౌదీ సామ్రాజ్యాన్ని ఉక్కిరిబిక్కిరి చేస్తున్నాయి. ఆయిల్ ఫీల్డులు, ఎయిర్‌పోర్టులు టార్గెట్ కావడమే కాదు.. రాజధాని రియాద్ గగనతలంపైకి కూడా ముప్పు చేరడంతో సౌదీ అరేబియా తీవ్ర భద్రతా సంక్షోభాన్ని ఎదుర్కొంటోంది.
సరిగ్గా ఇలాంటి టైంలోనే ఉమ్మడి శత్రువైన హౌతీలను మట్టికరిపించేందుకు ఇజ్రాయెల్ ప్రధాని బెంజమిన్ నెతన్యాహు ఓ సంచలన సైనిక ప్రతిపాదనను తెరపైకి తెచ్చారు. అగ్రరాజ్యం అమెరికా సైతం ఈ డీల్ ఫిక్స్ చేసేందుకు తెరవెనుక తీవ్రంగా చక్రం తిప్పింది. అయితే, ముంగిట్లోకి వచ్చిన ఇజ్రాయెల్ ఆర్మీ ఆఫర్‌ను సౌదీ క్రౌన్ ప్రిన్స్ మహమ్మద్ బిన్ సల్మాన్ ముఖం మీదే నిర్మొహమాటంగా తిరస్కరించడం ఇప్పుడు అంతర్జాతీయ దౌత్య వర్గాల్లో సంచలనం సృష్టిస్తోంది. ప్రాణసంకటమైన ముప్పు పొంచి ఉన్నప్పటికీ నెతన్యాహు ఆఫర్‌కు సౌదీ ఎందుకు చెక్ పెట్టింది? ఈ సంచలన నిర్ణయం వెనుక ఉన్న అసలు లెక్కలేంటి?
నాయకత్వానికి గొడ్డలిపెట్టు కాకూడదనేనా?
సౌదీ అరేబియా మొదటి నుంచీ పాలస్తీనా స్వతంత్ర దేశ హోదాకు కట్టుబడి ఉంది. స్వతంత్ర దేశంగా పాలస్తీనాను గుర్తించే 'ద్వి-దేశ పరిష్కారం' (Two-State Solution) దిశగా ఎలాంటి ముందడుగు పడకుండా ఇజ్రాయెల్‌తో జట్టుకట్టడం అంటే దౌత్యపరంగా ఆత్మహత్యేనని బిన్ సల్మాన్ భావిస్తున్నారు. ఇస్లామిక్ పవిత్ర స్థలాలైన మక్కా, మదీనాలకు రక్షకుడిగా భావించే సౌదీ, పాలస్తీనా గొంతు నొక్కి ఇజ్రాయెల్ సైన్యాన్ని తమ దేశంలోకి రానిస్తే యావత్ ఇస్లామిక్ ప్రపంచంలో తనకున్న నైతిక నాయకత్వం, గౌరవం ఒక్క దెబ్బతో తుడిచిపెట్టుకుపోతాయన్నది రియాద్ ప్రధాన ఆందోళనగా కనిపిస్తుంది.
గాజా రక్తం.. సొంత ప్రజాగ్రహం భయం
గాజాపై ఇజ్రాయెల్ సాగిస్తున్న భీకర మారణహోమం, వేలాది మంది అమాయకుల ప్రాణాలు గాల్లో కలవడం సాధారణ సౌదీ పౌరుల్లో తీవ్ర ఆగ్రహాన్ని రగిలిస్తోంది. సౌదీ సమాజంలో ఇజ్రాయెల్ అంటే ఏమాత్రం మంచి అభిప్రాయం లేదు. ఇలాంటి ఉద్రిక్త పరిస్థితుల్లో టెల్ అవీవ్ సైనిక సహకారాన్ని ఆహ్వానిస్తే, బయటి శత్రువుల దాడి సంగతి అటుంచి.. సొంత దేశ ప్రజలే రాజకుటుంబంపై తిరుగుబాటు బావుటా ఎగరేసే ప్రమాదం ఉంది. బయటి భద్రత కోసం చూసుకుని ఇంట్లోనే విప్లవాన్ని కొనితెచ్చుకోకూడదనేది సౌదీ పాలకుల పక్కా వ్యూహం.
గుర్తింపు లేని చోట ఒప్పందాలెలా?
మరో కీలకమైన సాంకేతిక చిక్కు ఏంటంటే.. సౌదీ అరేబియా ఇప్పటివరకు ఇజ్రాయెల్‌ను అధికారికంగా గుర్తించనే లేదు. దౌత్య సంబంధాలే ఏర్పడని ఒక దేశంతో గుట్టుచప్పుడు కాకుండా సైనిక అవగాహన ఒప్పందం కుదుర్చుకోవడం అంతర్జాతీయ చట్టాల పరంగా, దౌత్య నియమాల పరంగా సౌదీని తీవ్ర ఇరకాటంలోకి నెడుతుంది. అమెరికా ఎంతటి ఒత్తిడి తెచ్చినప్పటికీ, తమ సార్వభౌమాధికారాన్ని తాకట్టు పెట్టేందుకు క్రౌన్ ప్రిన్స్ ఏమాత్రం తలొగ్గలేదని సమాచారం.
'విజన్ 2030'ని కాల్చేసే ప్రాంతీయ యుద్ధం!
హౌతీల వెనుక ఇరాన్ అండదండలు ఉన్నాయనేది జగమెరిగిన సత్యం. ఒకవేళ ఇజ్రాయెల్ నేరుగా సౌదీ భూభాగంలోకి అడుగుపెట్టినా, తమ రక్షణ వ్యవస్థలను అక్కడ మోహరించినా.. అది పశ్చిమాసియా మొత్తాన్ని అగ్నిగుండంగా మారుస్తుంది. ఇరాన్, ఇజ్రాయెల్, లెబనాన్ వంటి దేశాలన్నీ రంగంలోకి దిగి పూర్తిస్థాయి ప్రాంతీయ యుద్ధం మొదలవుతుంది. సౌదీని పర్యాటక, వ్యాపార, సాంకేతిక రాజధానిగా తీర్చిదిద్దేందుకు ప్రిన్స్ సల్మాన్ తెచ్చిన డ్రీమ్ ప్రాజెక్ట్ 'విజన్ 2030'కి ఇది కోలుకోలేని దెబ్బ అవుతుంది. యుద్ధం మొదలైతే ఇన్వెస్టర్లు పారిపోతారన్నది సౌదీ ముందస్తు అంచనా.
'శత్రువుకు శత్రువు మిత్రుడు' అనే పాత సామెతను ఇక్కడ వర్తింపజేస్తే మునిగిపోయేది తామేనని సౌదీ స్పష్టంగా అర్థం చేసుకుంది. అందుకే ఇజ్రాయెల్ ఇచ్చే సైనిక ఆయుధాల మాయలో పడకుండా.. ఫ్రాన్స్, బ్రిటన్, పాకిస్తాన్ వంటి సంప్రదాయ మిత్రదేశాల రక్షణ గొడుగుతోనే హౌతీలను కట్టడి చేసే ఎత్తుగడను ఎంచుకుంది. ముప్పు ఎంత పెద్దదైనా, తమ వ్యూహాత్మక స్థానాన్ని బలిపెట్టే ప్రసక్తే లేదని క్రౌన్ ప్రిన్స్ వేసిన ఈ ఎత్తుగడ నెతన్యాహు ఆశలపై నీళ్లు చల్లిందనే చెప్పాలి.
