Jagadish Reddy: విద్యుత్ రంగాన్ని కూడా ప్రైవేటీకరణ చేసే కుట్రకు రాష్ట్ర ప్రభుత్వం తెర లేపిందని మాజీమంత్రి జగదీశ్ రెడ్డి ఆరోపించారు. లాభాల్లో ఉన్న ట్రాన్స్ కో సంస్థను ప్రైవేట్ వ్యక్తులకు కట్టబెట్టే ప్లాన్ ప్రభుత్వం చేస్తోందన్నారు. విద్యుత్ ను ప్రైవేట్ పరం చేస్తే రాష్ట్రం బాగుపడదన్నారు. విద్యుత్ రంగాన్ని ప్రైవేటీకరణ చేస్తే బీఆర్ఎస్ పార్టీ పెద్ద ఎత్తున ఉద్యమిస్తుందని జగదీశ్ రెడ్డి హెచ్చరించారు. రేవంత్ సర్కార్ భూములను సైతం అమ్ముకుంటోందని ఆయన మండిపడ్డారు.
తన దోస్తులకు కట్టబెట్టేందుకు రేవంత్ కుట్ర
''విద్యుత్ రంగం ప్రైవేటీకరణకు రేవంత్ సర్కార్ కుట్ర చేస్తోంది. లాభాల్లో ఉన్న ట్రాన్స్ కోను వాళ్లకు ఇష్టమైన వాళ్లకి అప్పగించే ప్రయత్నం చేస్తున్నారు. ట్రాన్స్ కో ను ఎందుకు ప్రైవేట్ వాళ్లకి ఇవ్వాలి? ఏం అవసరం వచ్చింది? ట్రాన్స్ కో లాభాల్లోనే ఉంది. అవసరమైనప్పుడు డిస్కంలకు కూడా సాయం చేస్తోంది. అలాంటి ట్రాన్స్ కోను తన దోస్తులకు కట్టబెట్టేందుకు రేవంత్ చేస్తున్న కుట్ర ఈ ప్రైవేటీకరణ. ట్రాన్స్ కో సంస్థకు చెందిన లక్షల కోట్ల విలువైన ఆస్తులను తక్కువ ధరకే కట్టబెట్టి తమ జేబులు నింపుకునేందుకు ప్రయత్నాలు చేస్తున్నారు.
ప్రైవేటీకరణ అంటే.. ప్రజల శ్వాస ఆగిపోవడమే
మనిషి శ్వాస తీసుకోవడం ఎంత అవసరమో ఇవాళ విద్యుత్ కూడా అంతే అవసరం. ప్రజల జీవితంలో భాగమైపోయింది. అటువంటి విద్యుత్ సంస్థలు ప్రైవేట్ వాళ్ల చేతికి ఇవ్వడం అంటే రాష్ట్ర ప్రజల శ్వాస ఆగిపోవడమే. ట్రాన్స్ కో ప్రైవేటీకరణతో రైతులకు ఉచిత విద్యుత్ ఆగుతుంది. రాష్ట్ర ప్రభుత్వం ప్రైవేటీకరణ ఆలోచనను విరమించుకోవాలి. ప్రైవేటీకరణకు బీఆర్ఎస్ ఎట్టి పరిస్థితుల్లో అంగీకరించదు. ట్రాన్స్ కో ఉద్యోగులు, ప్రజలతో కలిసి పోరాటం చేసి ప్రైవేటీకరణను ఆపేందుకు ప్రయత్నం చేస్తాం'' అని మాజీమంత్రి జగదీశ్ రెడ్డి స్పష్టం చేశారు.
ఎన్ని ఒత్తిళ్లు వచ్చినా కేసీఆర్ తలొగ్గలేదు
ప్రైవేట్ వాళ్ల నుంచి ఎన్ని ఒత్తిళ్లు వచ్చినా కేసీఆర్ పొరపాటున కూడా వారిని ట్రాన్స్ కోలో కానీ, జెన్ కోలో కానీ అడుగుపెట్టనివ్వలేదని జగదీశ్ రెడ్డి గుర్తు చేశారు. నిర్మాణం అప్పుడు కూడా ప్రభుత్వ సంస్థ BHEL కి ఇచ్చాము తప్ప ప్రైవేట్ వాళ్లకి ఇవ్వలేదని పేర్కొన్నారు. ఇప్పటి రేవంత్ ప్రభుత్వం మాత్రం చాలా దుర్మార్గంగా వ్యవహరిస్తోందని.. మంచి లాభాల్లో ఉన్న ట్రాన్స్ కోను తొలిసారిగా తనకిష్టమైన ప్రైవేట్ వ్యక్తులకు తక్కువ ధరకు కట్టబెట్టేందుకు కుట్ర చేస్తోందని ధ్వజమెత్తారు. తెలంగాణ ప్రజలు ఈ కుట్రలను అర్థం చేసుకోవాలన్నారు. విద్యుత్ సంస్థల ప్రైవేటీకరణను బీఆర్ఎస్ పార్టీ తీవ్రంగా వ్యతిరేకిస్తోందని జగదీశ్ రెడ్డి తేల్చి చెప్పారు.
