TG Safe: హైదరాబాద్ నగరంలో ఆహార భద్రతకు సంబంధించిన నిబంధనలు ఉల్లంఘించిన హోటల్స్ పై టీజీ సేఫ్ కొరడా ఝళిపించింది. 11 ప్రధాన హోటళ్ల లైసెన్స్ లు రద్దు చేసింది. మాదాపూర్, గచ్చిబౌలి పరిధిలోని పలు హోటళ్లు, రెస్టారెంట్స్ లో నాసిరకం ఆహార పదార్థాలను గుర్తించారు. వంట గదులు దుర్గంధపూరితంగా ఉన్నాయి. దీంతో టీజీ సేఫ్ అధికారులు సీరియస్ అయ్యారు. ప్రజల ఆరోగ్యంతో చెలగాటం ఆడుతున్న హోటళ్ల లైసెన్సులు రద్దు చేశారు. తమ వ్యాపార కార్యకలాపాలను తక్షణమే నిలిపివేయాలని అధికారులు ఆదేశించారు.
మాదాపూర్, గచ్చిబౌలిలోని పలు హోటల్స్, రెస్టారెంట్స్ లో టీజీ సేఫ్ అధికారులు ఆకస్మిక సోదాలు చేశారు. ఈ తనిఖీల్లో నాసిరకం ఆహార పదార్ధాలు వాడుతున్నట్లు గుర్తించారు. కుళ్లిన మాంసం, ఎక్స్ పైరీ అయిన ఫుడ్ ఐటెమ్స్, సింథటిక్ ఫుడ్ కలర్స్, రీయూజ్డ్ కుకింగ్ ఆయిల్ కనుగొన్నారు. ఇక ఆహార పదార్ధాలు తయారు చేసే కిచెన్లు చాలా దారుణంగా ఉన్నాయి. ఎంతో అపరిశుభ్రంగా ఉన్నాయి. దుర్గంధం వెదజల్లుతున్నాయి. కిచెన్ లో ఈగలు, బొద్దింకలు కనిపించాయి. ఈ క్రమంలో పదకొండు ప్రముఖ హోటల్స్ ఫుడ్ లైసెన్స్‌లు రద్దు చేసింది టీజీ సేఫ్.
హైటెక్ సిటీ
* మొనాస్ట్రీ
* కోల్ స్పార్క్ రెస్టారెంట్
* కాంచి కేఫ్
గచ్చిబౌలి
* శివాణి బార్ అండ్ రెస్టారెంట్
* అల్‌సబా రెస్టారెంట్
* ఉడిపీస్ ఉపహార్
* అంటెరా కిచెన్ అండ్ బార్
మాదాపూర్
* లక్కీ రెస్టారెంట్
* సాయిరామ్‌ మెస్‌
* ఇనార్బిట్ మాల్‌లోని అమ్ ఆహా తెలుగు కిచెన్ అండ్ బార్
* మాదాపూర్ ఇనార్బిట్ మాల్‌లోని ఫ్యూజన్9, అమ్నీషియా స్కై బార్ లైసెన్స్ రద్దు
తెలంగాణ ఆహార, నిత్యవసర ఔషధాల ప్రమాణాల అథారిటీ (టీజీ సేఫ్) హైదరాబాద్ నగరంలో స్పెషల్ డ్రైవ్ చేపట్టింది. మాదాపూర్, హైటెక్ సిటీ, గచ్చిబౌలి పరిధిలోని 11 రెస్టారెంట్ల ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (FSSAI) లైసెన్సులను నిలిపివేసింది. ఫుడ్ సేఫ్టీ అధికారులు, పోలీసు సిబ్బందితో కూడిన 10 బృందాలతో టీజీ సేఫ్ 20 సంస్థల్లో మెరుపు సోదాలు నిర్వహించింది. వంట గదుల్లో బొద్దింకలు, ఈగలు, ఎలుకలు, ఎలుకల మలం గుర్తించారు. అలాగే గడువు ముగిసిన ఆహార పదార్థాలు, పాడైపోయిన, కలుషితమైన కూరగాయలు, ఆహారాన్ని సరిగ్గా నిల్వ చేయకపోవడం , వంట గదుల్లో అపరిశుభ్రత వంటి ఉల్లంఘనలను తమ బృందాలు కనుగొన్నాయని టీజీ సేఫ్ తెలిపింది.
తనిఖీల సమయంలో కల్తీ అనుమానంతో 21 ఆహార నమూనాలను సేకరించినట్లు TG SAFE తెలిపింది. మాదాపూర్‌లోని రామేశ్వరం కేఫ్, గచ్చిబౌలిలోని విరుంత ఫుడ్స్ ప్రైవేట్ లిమిటెడ్ (ఇష్టా), హైటెక్ సిటీలోని సాహిబ్స్ బార్బెక్యూ, పక్కా లోకల్, అలాగే గచ్చిబౌలిలోని హోటల్ షాదాబ్, షా గౌస్ హోటల్ అండ్ రెస్టారెంట్.. ఈ ఆరు సంస్థలకు లోపాలను సరిదిద్దుకోవాలని సూచిస్తూ నోటీసులు జారీ చేశారు.
ఆహార భద్రతా నిబంధనలు పాటిస్తున్నారో లేదో తనిఖీ చేయడానికి ఈ ఆరు సంస్థల్లో మరోసారి చెకింగ్స్ చేస్తామని అధికారులు తెలిపారు. ఆ సమయంలో తేలిన అంశాల ఆధారంగా తదుపరి చర్యలు ఉంటాయన్నారు. గచ్చిబౌలిలోని వైట్ ఎలిఫెంట్ ఫుడ్ వర్క్స్ (63 డిగ్రీస్ మోడరన్ రీజినల్ బఫే), కొండాపూర్‌లోని హైటెక్ సిటీ రోడ్డులో ఉన్న సెలెస్ట్ హాస్పిటాలిటీ ప్రైవేట్ లిమిటెడ్ (మినర్వా గ్రాండ్), హైటెక్ సిటీలోని హోటల్ అవసాలకు షో-కాజ్ నోటీసులు జారీ చేశారు.
తాము చేసిన తనిఖీల్లో వంట గదుల్లో బొద్దింకలు, ఎలుకలు కనిపించాయని ఫుడ్ సేఫ్టీ అధికారులు తెలిపారు. పాడైపోయిన, బూజు పట్టిన కూరగాయలు, గడువు ముగిసిన ఆహారం, సరిగ్గా నిల్వ చేయకపోవడం, అపరిశుభ్రమైన వంటగదులు, రిఫ్రిజిరేటర్లు, మూసుకుపోయిన లేదా పొంగిపొర్లుతున్న మురుగు కాలువలు, తప్పనిసరి రికార్డులు లేకపోవడం వంటివి ఉన్నాయని TG SAFE పేర్కొంది.
మొనాస్టరీ:
బొద్దింకలు, ఎలుకల బెడద. కూరగాయలకు బూజు పట్టడం, పాడైపోయిన గుడ్లు, లేబుల్ లేని ఉత్పత్తులు, గడువు ముగిసిన ఆహారం, నిల్వ ఉంచిన ఆహారం ఉన్నాయని అధికారులు తెలిపారు.
ప్రియాంక హాస్పిటాలిటీ సర్వీసెస్‌:
మురికిగా ఉన్న వంటగది నేల
ఆహారాన్ని సరిగ్గా నిల్వ చేయకపోవడం
బొద్దింకల బెడద
ఆహార పదార్థాలలో పురుగులు
అపరిశుభ్రమైన స్నానపు ప్రదేశం
అల్ సబా రెస్టారెంట్‌లో జిడ్డుగా ఉన్న వంటగది గోడలు, పొగగొట్టాలు, సిగరెట్ పీకలు, గుట్కా ప్యాకెట్లు, బొద్దింకల బెడద, అపరిశుభ్రమైన స్నానపు ప్రదేశం, వండిన ఆహారం, పచ్చి మాంసం కలిపి నిల్వ ఉంచిన రిఫ్రిజిరేటర్లు ఉన్నాయని అధికారులు నివేదికలో తెలిపారు.
లక్కీ మల్టీక్యూజిన్ రెస్టారెంట్‌లో: నిల్వ ఉంచిన ఆహారం. పాడైపోయిన ఆహారం, రిఫ్రిజిరేటర్‌లో వస్తువులను సరిగ్గా నిల్వ చేయకపోవడం, కూరగాయలు , మాంసాహారాన్ని కలిపి నిల్వ చేయడం, మూతపెట్టని ఆహారం, బొద్దింకలు, ఈగలు, గడువు ముగిసిన ఆహారం, నీరు నిలిచిపోయి పాడైపోయిన నేల, అపరిశుభ్రమైన వంటగది.
సాయి రామ్ మెస్‌లో: రిఫ్రిజిరేటర్‌లో నిల్వ ఉన్న ఆహారం, పురుగులు పట్టిన మైదా, మినపపప్పు, వెల్లుల్లి, బొద్దింకలు, ఈగల బెడద, అపరిశుభ్రమైన గోడలు, నేల. పొంగిపొర్లుతున్న మురుగు కాలువ.
ఉడుపిలోని ఉపహార్‌లో: వెంటిలేషన్, వెలుతురు లేమి. నీరు నిలిచిపోయి పాడైపోయిన వంటగది నేల. బొద్దింకలు, ఎలుకల బెడద, జిడ్డు గోడలు , పైకప్పులు. మూసుకుపోయిన మురుగు కాలువలు. అపరిశుభ్రమైన రిఫ్రిజిరేటర్లు. ఆహారం అందించేవారి ఆరోగ్య రికార్డులు లేకపోవడం. గడువు ముగిసిన ఆహార పదార్థాలు.
కాంచి కేఫ్‌లో: అపరిశుభ్రమైన నేల, బొద్దింకలు, ఈగల బెడద, పాడైపోయిన ముడి పదార్థాలు, మూసుకుపోయిన డ్రైనేజీలు, గడువు ముగిసిన ఆహారం, రిఫ్రిజిరేటర్‌లో వస్తువులను సరిగ్గా నిల్వ చేయకపోవడం, ఆహార పదార్థాలపై కీటకాల బెడద. సాలెగూళ్లతో కూడిన పాడైన పైకప్పు.
ఆన్‌టెరా కిచెన్ అండ్ బార్‌లో: పాడైపోయిన, బూజు పట్టిన కూరగాయలు. గడువు ముగిసిన ఆహార పదార్థాలు, బొద్దింకల బెడద, అపరిశుభ్రమైన వంటగది, వాషింగ్ ఏరియా. పగిలిన టైల్స్, జిడ్డుగా ఉన్న గోడలు, నేల. మూసుకుపోయిన డ్రైనేజీలు. రిఫ్రిజిరేటర్‌లో వస్తువులను సరిగ్గా నిల్వ చేయకపోవడం. లేబుల్ లేని ఆహారం. శాకాహార, మాంసాహార పదార్థాలను కలిపి నిల్వ చేయడం.
కోల్ స్పార్క్ మల్టీ క్యూజిన్ రెస్టారెంట్‌లో: బొద్దింకల బెడద, శాకాహార మాంసాహార ఆహార పదార్థాలను సరిగ్గా నిల్వ చేయకపోవడం. పచ్చి మాంసాన్ని సరిగ్గా కప్పకుండా నిల్వ చేయటం. గడువు ముగిసిన ఆహార పదార్థాలు. 22 కిలోల వేరుశనగ, 25 కిలోల మిరియాలు, 8.9 కిలోల జీడిపప్పుపై బూజు.
ఆమ్ ఆహా తెలుగు కిచెన్ అండ్ బార్: పరిశుభ్రత లేని నేల, బొద్దింకలు, ఎలుకల బెడద. బొద్దింకలు పట్టిన ఆహార పదార్థాలు.
ఫ్యూజన్ 9/ఆమ్నీషియా స్కై బార్: బొద్దింకల బెడద, ఎలుకల మలం, లేబుల్ లేని గడువు ముగిసిన ఆహార పదార్థాలు. పాడైపోయిన, బూజు పట్టిన కూరగాయలు. ఫుడ్ సేఫ్టీ ట్రైనింగ్ అండ్ సర్టిఫికేషన్ (FoSTaC) శిక్షణ పొందిన సూపర్‌వైజర్లు, నీటి విశ్లేషణ నివేదికలు లేకపోవడం.
తమ తనిఖీల్లో దాదాపు అన్ని హోటల్స్ తో తాము ప్రధానంగా గుర్తించి ఉల్లంఘనలను టీజీ సేఫ్ పేర్కొంది. అందులో ముఖ్యంగా ఆహారాన్ని తయారు చేసే వారిలో పరిశుభ్రత లోపాన్ని గమనించారు. కిచెన్ లో గుంతలు పడి తడిగా ఉన్న నేల. సరైన లేబులింగ్ లేకపోవడం. మురుగునీటి పారుదల నిర్వహణ సరిగా లేకపోవడం. జిడ్డుగా ఉన్న చిమ్నీలు. పెచ్చులూడుతున్న గోడలు, పైకప్పులు. సరిగా శుభ్రం చేయని పాత్రలు వంటివి ఉన్నాయని టీజీ సేఫ్ అధికారులు వెల్లడించారు.
