వాయవ్య బంగాళాఖాతంలో గతంలో ఏర్పడిన అల్పపీడనం మరింత తీవ్రమై వాయుగుండంగా మారింది. ఈ వాయుగుండం ప్రస్తుతం ఉత్తర ఒడిశా - పశ్చిమ బెంగాల్ తీర ప్రాంతాల్లో స్థిరంగా కొనసాగుతున్నట్లు ఆంధ్రప్రదేశ్ రాష్ట్ర విపత్తుల నిర్వహణ సంస్థ (ఏపీఎస్డీఎంఏ) ఆదివారం ప్రకటించింది. ప్రస్తుతం ఇది ఒడిశాలోని బాలాసోర్కు కేవలం 50 కిలోమీటర్ల దూరంలో, చాంద్బలి మరియు దిఘాలకు 60 కిలోమీటర్ల దూరంలో కేంద్రీకృతమై ఉంది.
ఈ వాయుగుండం పశ్చిమ-వాయువ్య దిశగా పయనిస్తూ, రానున్న 24 గంటల్లో చాంద్బలి - దిఘా మధ్య బాలాసోర్ సమీపంలో తీరాన్ని దాటే అవకాశం ఉందని వాతావరణ అధికారులు అంచనా వేస్తున్నారు. దీని ప్రభావం వల్ల ఉత్తరాంధ్ర పరిధిలోని కొన్ని ప్రాంతాల్లో భారీ వర్షాలు కురిసే ఛాన్స్ ఉంది. అలాగే ఏపీలోని మిగతా జిల్లాల్లో అక్కడక్కడా తేలికపాటి నుంచి మోస్తరు జల్లులు పడతాయని విపత్తుల నిర్వహణ సంస్థ పేర్కొంది.
సముద్రం అల్లకల్లోలంగా మారే ప్రమాదం ఉన్నందున మత్స్యకారులు ఎవరూ వేటకు వెళ్లరాదని అధికారులు గట్టి హెచ్చరికలు జారీ చేశారు. ముఖ్యంగా తీర ప్రాంత ప్రజలు అప్రమత్తంగా ఉండాలని సూచించారు. వాయుగుండం తీవ్రతను, దాని కదలికలను తాము నిరంతరం నిఘా ఉంచి గమనిస్తున్నట్లు ఏపీఎస్డీఎంఏ వెల్లడించింది.
