రాష్ట్రంలోని పోలీసు వ్యవస్థపై తీవ్ర విమర్శలు వెల్లువెత్తుతున్నాయి. అధికారపార్టీకి కొమ్ముకాస్తున్నారని ప్రతిపక్ష బీఆర్ఎస్ మండిపడుతోంది.అధికార పార్టీ నేతల మీద ఫిర్యాదు చేయడానికి వెళితే కంప్లయింట్ తీసుకోకుండా జాప్యం చేస్తున్నారని, పట్టించుకోవడం లేదని మండిపడుతున్నారు. సాధారణ పౌరులు వచ్చినా ఇలాగే చేస్తారా? అంటూ ఫైర్ అవుతున్నారు. తాజాగా జగిత్యాలలో సీఎం రేవంత్ రెడ్డి మీద ఫిర్యాదు చేయడానికి బీఆర్ఎస్ నేత, మాజీ మంత్రి జీవన్ రెడ్డి పోలీస్ స్టేషన్ వెళ్లారు.
సీఎం రేవంత్ రెడ్డిపై జగిత్యాల పోలీస్ స్టేషన్లో జీవన్ రెడ్డి ఫిర్యాదు చేశారు. అయితే, ఫిర్యాదు స్వీకరించడంలో సీఐ జాప్యం చేయడంతో జీవన్ రెడ్డి నిరసనకు దిగారు. పోలీస్ స్టేషన్కు జీవన్ రెడ్డి చేరుకునేలోపే సీఐ కరుణాకర్ వెళ్లిపోయినట్టు సమాచారం.ఫోన్లో సంప్రదించగా.. టైం పడుతుందని సీఐ చెప్పడంతో జీవన్ రెడ్డి ఆగ్రహం వ్యక్తంచేశారు. దీంతో సీఐ నిర్లక్ష్యంగా వ్యవహరించారని ఆరోపిస్తూ.. స్టేషన్ ముందు జీవన్ రెడ్డి, బీఆర్ఎస్ కార్యకర్తలు బైఠాయించారు.
జీవన్ రెడ్డికి మద్దతుగా.. బీఆర్ఎస్ నాయకులు, కార్యకర్తల నిరసన ప్రదర్శన చేపట్టారు.ఈ ఆందోళనతో పోలీస్ స్టేషన్, ఓల్డ్ బస్టాండ్ చౌరస్తా వద్ద ఉద్రిక్త పరిస్థితి నెలకొన్నది. చివరకు సీఐ రావడంతో.. సీఎం రేవంత్ రెడ్డిపై ఫిర్యాదు చేశారు. అప్పుడు కూడా చర్చకు రాలేదంటూ సీఐ నిర్లక్ష్యంగా వ్యవహరించినట్టు తెలిసింది. కంప్లైంట్ ఇస్తే చదువుకుంటానని సీఐ అనడంతో మరోసారి జీవన్ రెడ్డి ఆగ్రహంవ్యక్తంచేశారు.
సీఐ కరుణాకర్ కాంగ్రెస్ కార్యకర్తలాగా వ్యవహరిస్తున్నారని ఆందోళన వ్యక్తంచేశారు. తాను ఫోన్ చేసి మరి చెప్పినా ఫిర్యాదు అంశం చర్చకు రాలేదని ఎలా అంటారంటూ జీవన్ రెడ్డి మండిపడ్డారు. కాగా, సీఎం రేవంత్ మీద ఏ విషయంలో కంప్లయింట్ ఇచ్చారనే అంశంపై క్లారిటీ రావాల్సి ఉన్నది.
https://x.com/pulsenewsbreak/status/2076703159712649662?s=20
