క్రమశిక్షణతో కూడిన చిన్న పొదుపుతో కూడా పెద్ద కలలను నెరవేర్చుకోవచ్చని నిరూపించారు మంచిర్యాల జిల్లాకు చెందిన ఒక వ్యక్తి. లక్షెట్టిపేట మండల కేంద్రానికి చెందిన పాస్టర్ రవి జోసెఫ్ గత మూడేళ్లుగా ఎంతో కష్టపడి దాచుకున్న రూ.10నాణేలతో ఏకంగా రూ.1.23లక్షల విలువైన నూతన ద్విచక్ర వాహనాన్ని కొనుగోలు చేసి అందరినీ ఆశ్చర్యపరిచారు.
పాస్టర్ రవి జోసెఫ్ తనకు వచ్చిన రూ.10 నాణేలను ఖర్చు చేయకుండా ప్రత్యేకంగా దాచుకోవడం ప్రారంభించారు. ఎలాగైనా పది రూపాయల నాణేలతోనే తనకు నచ్చిన బైక్‌ను కొనుగోలు చేయాలనే పట్టుదలతో ఈ వినూత్న పొదుపు బాటపట్టారు. అనుకున్నట్లుగానే మూడేళ్ల వ్యవధిలో ఏకంగా రూ.1.23లక్షల విలువైన నాణేలను సేకరించడంలో సఫలీకృతులయ్యారు.
అక్టోబర్ 10న తాను సేకరించిన వేలాది రూ.10ల నాణేల బస్తాలతో స్థానిక టూవీలర్ షోరూమ్‌కు చేరుకున్న రవి జోసెఫ్‌ను చూసి అక్కడ ఉన్న సిబ్బంది మొదట ఆశ్చర్యపోయారు. ఆ తర్వాత కస్టమర్ కోరికను గౌరవిస్తూ షోరూమ్ నిర్వాహకులు ఆ నాణేలను స్వీకరించేందుకు అంగీకరించారు. సిబ్బంది అందరూ కలిసి ఏకధాటిగా దాదాపు రెండు గంటల పాటు శ్రమించి ఆ 10 రూపాయల నాణేలను లెక్కించారు.
మొత్తం సొమ్ము సరిపోవడంతో షోరూమ్ ప్రతినిధులు నూతన బైక్ తాళాలను రవి జోసెఫ్‌కు హర్షధ్వానాల మధ్య అందజేశారు. రూపాయి రూపాయి కూడబెడితే కొండంత నిధి అవుతుందని పాస్టర్ నిజం చేసి చూపించారని, ఆయన పొదుపు మంత్రం నేటి యువతకు స్ఫూర్తిదాయకమని స్థానికులు కొనియాడుతున్నారు.
