One Way: కేబీఆర్ పార్క్ వద్ద వన్‌వే విధానం అమలుతో ట్రాఫిక్ కదలికలు మెరుగుపడ్డాయి. ఈ నేపథ్యంలో సైబరాబాద్ ఐటీ కారిడార్‌తో పాటు లక్డీకాపూల్‌లోనూ ఇలాంటి మార్పులకు ట్రాఫిక్ పోలీసులు కసరత్తు చేస్తున్నారు. రద్దీ తగ్గించడం, జంక్షన్ల వద్ద వెయిటింగ్ టైమ్‌ను తగ్గించడం లక్ష్యంగా ఈ ప్రతిపాదనలు రూపొందించారు.
మై హోమ్ భూజా వరకు వన్‌వే లూప్‌
సైబరాబాద్ ఐటీ కారిడార్‌లో బయోడైవర్సిటీ జంక్షన్, ఐకియా రోటరీ, రహేజా మైండ్‌స్పేస్ సీ-గేట్, నాలెడ్జ్ సిటీ, డల్లాస్ సెంటర్ మీదుగా మై హోమ్ భూజా వరకు వన్‌వే లూప్‌ను ప్రతిపాదించారు. ట్రాఫిక్ సిమ్యులేషన్లు నిర్వహించి, ఐటీ కంపెనీలు, ఇతర వర్గాలతో చర్చించిన తర్వాత దశలవారీగా అమలు చేయనున్నారు.
నవంబర్ 22న లక్డీకాపూల్‌లో ట్రయల్
లక్డీకాపూల్‌లో నవంబర్ 22న ఒకరోజు ట్రాఫిక్ ట్రయల్ నిర్వహించనున్నారు. రవీంద్రభారతి-లక్డీకాపూల్-ఇక్బాల్ మినార్ మార్గంలో వాహనాల రాకపోకలకు కొత్త దారి మళ్లింపులు ఉంటాయి. పాత కంట్రోల్ రూమ్ నుంచి వచ్చే వాహనాలు హెచ్‌డీఎఫ్‌సీ జంక్షన్, పాత సైఫాబాద్ పోలీస్ స్టేషన్ మీదుగా వెళ్లాల్సి ఉంటుంది.
ట్రయల్ ఫలితాల ఆధారంగా శాశ్వత అమలుపై నిర్ణయం
నిరంకారి జంక్షన్ నుంచి పాత కంట్రోల్ రూమ్ వైపు వెళ్లే వాహనాలకూ పాత సైఫాబాద్ పోలీస్ స్టేషన్, ఇక్బాల్ మినార్ మీదుగా మార్గాన్ని ప్రతిపాదించారు. ట్రయల్ ఫలితాలు, ప్రజల అభిప్రాయాల ఆధారంగా శాశ్వత అమలుపై నిర్ణయం తీసుకోనున్నారు. కేబీఆర్ పార్క్ వద్ద ఆగస్టు 18, 2026 నుంచి వన్‌వే విధానం అమల్లో ఉంది.
