పూర్తి మద్యనిషేధం అమల్లో ఉన్న నాగాలాండ్ ట్యూన్ సాంగ్ జిల్లాలో కల్తీ మద్యం తీవ్ర విషాదాన్ని నింపింది. అనుమానాస్పద స్థితిలో కల్తీ మద్యం సేవించి గడిచిన రెండు రోజుల్లోనే ఏకంగా 19 మంది ప్రాణాలు కోల్పోవడం తీవ్ర కలకలం రేపింది. రాష్ట్రంలోని మొకోక్చుంగ్ జిల్లాలో 8మంది, ట్యూన్సాంగ్ జిల్లాలో 11 మంది మృతి చెందినట్లు పోలీసు అధికారులు ధ్రువీకరించారు. ఈ హృదయవిదారక ఘటనతో స్థానిక ప్రజలు తీవ్ర దిగ్భ్రాంతికి గురికాగా, పోలీసు యంత్రాంగం వెంటనే అప్రమత్తమైంది.
ఈ ఘటనపై సమగ్ర విచారణ జరిపేందుకు అదనపు ఎస్పీ ఐ.బంగ్లాంగ్ చాంగ్ నేతృత్వంలో ప్రత్యేక దర్యాప్తు బృందాన్ని (SIT) ఏర్పాటు చేశారు. అక్రమ కల్తీ మద్యం నెట్వర్క్ ఎక్కడి నుంచి సరఫరా అవుతోంది, దీని వెనుక ఉన్న సూత్రధారులు ఎవరనే కోణంలో సిట్ బృందం దర్యాప్తును తీవ్రతరం చేసింది. మరోవైపు మరణాలకు గల ఖచ్చితమైన కారణాలను తేల్చేందుకు సేకరించిన మద్యం నమూనాలను ఫోరెన్సిక్ విశ్లేషణ కోసం గువాహటికి తరలించారు. విచారణ ప్రాథమిక దశలో ఉన్నందున కీలక వివరాలను వెల్లడించలేమని సీనియర్ ఎస్పీ వెసుప్రా కెజో తెలిపారు.
కల్తీ మద్యం మరణాల నేపథ్యంలో రాష్ట్ర వ్యాప్తంగా పోలీసులు పలు అనుమానిత ప్రాంతాల్లో విస్తృత తనిఖీలు నిర్వహించారు. ఈ సోదాల్లో అక్రమ మద్యంతో సంబంధం ఉన్న 19 మందిని అరెస్టు చేయగా, దాదాపు 3 వేల మద్యం బాటిళ్లను అధికారులు స్వాధీనం చేసుకున్నారు. 1990 నుంచి రాష్ట్రంలో మద్యనిషేధ చట్టం అమలులో ఉన్నప్పటికీ, దొడ్డిదారిన అక్రమ మద్యం విక్రయాలు సాగుతుండటంపై తీవ్ర విమర్శలు వ్యక్తమవుతున్నాయి.
గుర్తుతెలియని, బ్రాండ్ లేబుల్ లేని లేదా అక్రమంగా లభించే మద్యాన్ని ఎవరూ సేవించవద్దని పోలీసులు ప్రజలకు అత్యవసర సూచనలు జారీ చేశారు. మద్యం తాగిన తర్వాత కళ్లు తిరగడం, చూపు మసకబారడం, శ్వాస తీసుకోవడంలో ఇబ్బంది లేదా స్పృహ తప్పడం వంటి లక్షణాలు కనిపిస్తే తక్షణమే సమీప ఆసుపత్రికి వెళ్లి వైద్య సహాయం పొందాలని అధికారులు హెచ్చరించారు.
