Movies Without Trailers : సినిమా ఇండస్ట్రీలో ప్రమోషన్స్ అంటే గ్లింప్స్, టీజర్, వరుస సాంగ్స్.. వీటన్నింటికీ మించి రిలీజ్కు కొద్దిరోజుల ముందు వచ్చే 'ట్రైలర్'. ట్రైలర్ కట్ బాగుంటేనే థియేటర్లకు ఆడియన్స్ పోటెత్తుతారని, అడ్వాన్స్ బుకింగ్స్ రికార్డు స్థాయిలో జరుగుతాయని అందరూ నమ్ముతారు. కానీ ప్రస్తుత ట్రెండ్కు పూర్తి భిన్నంగా, అసలు ట్రైలర్ అనేదే లేకుండా డైరెక్ట్గా థియేటర్లలోకి వచ్చి చరిత్ర సృష్టించిన అరుదైన చిత్రాలు కూడా టాలీవుడ్లో ఉన్నాయి. తాజాగా నేచురల్ స్టార్ నాని నటిస్తున్న మోస్ట్ అవేటెడ్ చిత్రం ‘ది ప్యారడైజ్’ కూడా సరిగ్గా ఇదే బాటలో నడుస్తుండటం ఇప్పుడు సినీ వర్గాల్లో చర్చనీయాంశంగా మారింది.
‘ది ప్యారడైజ్’ ట్రైలర్ లేనట్టే
శ్రీకాంత్ ఓదెల దర్శకత్వంలో నాని నటిస్తున్న రా అండ్ రస్టిక్ మూవీ ‘ది ప్యారడైజ్’పై అంచనాలు ఆకాశాన్ని తాకుతున్నాయి. అయితే ఈ సినిమాకు సంబంధించి ఎలాంటి ట్రైలర్ విడుదల చేయడం లేదని ఇటీవల నిర్వహించిన ప్రెస్మీట్లో మేకర్స్ స్పష్టం చేశారు. సినిమాలోని అసలైన ఎమోషన్ను, ఆ తీవ్రతను ట్రైలర్లో కట్ చేసి చెప్పడం కంటే నేరుగా వెండితెరపైనే ప్రేక్షకులకు ఆ అనుభూతిని ఇవ్వాలనే ఉద్దేశంతోనే ఈ బోల్డ్ డెసిషన్ తీసుకున్నట్లు వెల్లడించారు.
గతంలోనూ ఇదే రూట్.. బ్లాక్బస్టర్ హిట్స్
ట్రైలర్ విడుదల చేయకుండానే నేరుగా రిలీజై సంచలనాలు సృష్టించిన సినిమాలు గతంలోనూ ఉన్నాయి. అవి ఏంటంటే.. సూపర్ స్టార్ మహేశ్ బాబు - మాటల మాంత్రికుడు త్రివిక్రమ్ కాంబినేషన్లో వచ్చిన కల్ట్ క్లాసిక్ ‘ఖలేజా’కు అసలు అధికారిక ట్రైలర్ రాలేదు. అయినా ఆ సినిమా బాబు అభిమానుల్లో స్పెషల్ క్రేజ్ను సంపాదించుకుంది. అలాగే పరశురామ్ దర్శకత్వంలో విజయ్ దేవరకొండ, రష్మిక మందన్న జంటగా నటించిన గీతాగోవిందం సినిమాకు కూడా ట్రైలర్ రిలీజ్ కాలేదు. కేవలం పాటలు, చిన్న టీజర్తోనే వచ్చి బాక్సాఫీస్ వద్ద రికార్డు కలెక్షన్లు కొల్లగొట్టింది.
సావిత్రి జీవిత కథ ఆధారంగా నాగ్ అశ్విన్ తెరకెక్కించిన అద్భుత దృశ్య కావ్యం ‘మహానటి’. కీర్తి సురేశ్ ప్రధాన పాత్ర పోషించిన ఈ క్లాసిక్ సినిమాకు కూడా ఎలాంటి ట్రైలర్ లేకుండానే నేరుగా థియేటర్లలోకి తీసుకొచ్చారు. రవితేజ సైన్స్ ఫిక్షన్ మూవీ ‘డిస్కో రాజా’, శ్రీవిష్ణు కామెడీ థ్రిల్లర్ ‘బ్రోచేవారెవరురా’ సైతం ట్రైలర్ లేకుండానే రిలీజయ్యాయి. ఇక సూపర్ స్టార్ రజనీకాంత్ నటించిన భారీ చిత్రం ‘కబాలి’, తమిళ స్టార్ విజయ్ పొలిటికల్ డ్రామా ‘సర్కార్’ కూడా ట్రైలర్ పద్ధతికి భిన్నంగానే విడుదలై భారీ ఓపెనింగ్స్ సాధించాయి.
ప్రమోషన్లలో ట్రైలర్ తప్పనిసరి అనే మూస పద్ధతిని బ్రేక్ చేస్తూ.. కంటెంట్పై ఉన్న నమ్మకంతో మేకర్స్ తీసుకునే ఈ విధమైన సాహసోపేత నిర్ణయాలు ప్రేక్షకుల్లో మరింత ఉత్సుకతను పెంచుతుంటాయి. మరి ఈ అరుదైన జాబితాలో చేరిన ‘ది ప్యారడైజ్’ కూడా బాక్సాఫీస్ వద్ద ఎలాంటి ప్రభంజనం సృష్టిస్తుందో చూడాలి. ఈ చిత్రం సెప్టెంబర్ 24న ప్రపంచ వ్యాప్తంగా ప్రేక్షకుల ముందుకు రాబోతుంది.
