బీఆర్ఎస్ సీనియర్ నేత, మాజీ మంత్రి మల్లారెడ్డి తాను పార్టీ మారుతున్నట్లు జరుగుతున్న ఊహాగానాలకు స్వయంగా తెరదించారు. గత కొన్ని రోజులుగా రాజకీయ వర్గాల్లో తాను వేరే పార్టీలో చేరబోతున్నానంటూ జోరుగా ప్రచారం సాగుతుండటంతో మల్లారెడ్డి స్పందించారు. బీఆర్ఎస్ కార్యనిర్వాహక అధ్యక్షుడు కేటీఆర్ జన్మదిన వేడుకల్లో ఎంతో ఉత్సాహంగా పాల్గొన్న ఆయన, తన పార్టీ మార్పుపై వస్తున్న వార్తలన్నీ కేవలం నిరాధారమైనవని, అవన్నీ అబద్ధాలంటూ కొట్టిపారేశారు.
తాను బీఆర్ఎస్ను వీడుతున్నాననే ప్రచారాన్ని నిజమని భావించి ఒక అభిమాని సొంత రక్తంతో లేఖ రాయడం తనను తీవ్రంగా కలచివేసిందని మల్లారెడ్డి ఆవేదన వ్యక్తం చేశారు. ఆ అభిమాని ఆందోళన చెందాల్సిన అవసరం లేదని, త్వరలోనే అతడిని నేరుగా కలిసి మాట్లాడతానని హామీ ఇచ్చారు. గులాబీ జెండా నీడలోనే తాను ఉంటానని స్పష్టం చేస్తూ.. సోషల్ మీడియాలో, పొలిటికల్ సర్కిళ్లలో వస్తున్న అసత్య ప్రచారాలను ఎవరూ నమ్మవద్దని కోరారు.
కేటీఆర్ జన్మదినం సందర్భంగా ఆయనకు హృదయపూర్వక శుభాకాంక్షలు తెలిపిన మల్లారెడ్డి, కేటీఆర్ 125ఏళ్ల పాటు పూర్ణాయుష్షు, ఆయురారోగ్యాలతో వర్ధిల్లాలని ఆకాంక్షించారు. తెలంగాణ భవిష్యత్తు నాయకుడు కేటీఆరేనని, రాబోయే రోజుల్లో రాష్ట్రానికి ఆయనే ముఖ్యమంత్రి కావడం ఖాయమని ధీమా వ్యక్తం చేశారు. కేటీఆర్ను సీఎం పీఠంపై చూడటమే తన జీవితంలో ప్రధాన లక్ష్యమని ఈ సందర్భంగా మల్లారెడ్డి వ్యాఖ్యానించారు.
పార్టీ కష్టకాలంలో ఉన్నప్పుడు కూడా తాను గులాబీ దళంతోనే నడుస్తానని, కార్యకర్తలకు ఎల్లప్పుడూ అందుబాటులో ఉంటానని ఆయన స్పష్టం చేశారు. కేటీఆర్ నాయకత్వంలో బీఆర్ఎస్ మళ్లీ పూర్వ వైభవాన్ని సంతరించుకుంటుందని ఆశాభావం వ్యక్తం చేశారు. మల్లారెడ్డి ఇచ్చిన ఈ స్పష్టతతో గత కొన్ని రోజులుగా మేడ్చల్ నియోజకవర్గంతో పాటు తెలంగాణ రాజకీయాల్లో ఆయన పార్టీ మార్పుపై నడుస్తున్న ఊహాగానాలకు, రూమర్లకు ముగింపు పడినట్లయింది.
