TG: తెలంగాణ సాగునీటి రంగంలో అత్యంత కీలకమైన కాళేశ్వరం ప్రాజెక్టు బ్యారేజీల పునరుద్ధరణపై రాష్ట్ర ప్రభుత్వం స్పష్టమైన కార్యాచరణను ప్రకటించింది. తీవ్ర వివాదాస్పదమైన మేడిగడ్డతో పాటు అన్నారం, సుందిళ్ల బ్యారేజీల మరమ్మతు, పునరుద్ధరణ పనులను నవంబర్ రెండో వారం నుంచి అధికారికంగా ప్రారంభిస్తామని నీటిపారుదల శాఖ మంత్రి ఉత్తమ్ కుమార్ రెడ్డి స్పష్టం చేశారు. జలసౌధలో నీటిపారుదల శాఖ ఉన్నతాధికారులతో నిర్వహించిన సమీక్షా సమావేశంలో ఆయన ఈ కీలక వివరాలను వెల్లడించారు.
అక్టోబర్ 5న సీడబ్ల్యూసీకి డిజైన్లు
ప్రాజెక్టు పునరుద్ధరణ పనులను వేగవంతం చేసేందుకు ప్రభుత్వం ఇప్పటికే సమగ్ర నివేదికలను సిద్ధం చేసింది. కేంద్ర జల సంఘం (CWC) సాంకేతిక పర్యవేక్షణ కమిటీకి అక్టోబర్ 5న తుది డిజైన్లను సమర్పించనున్నట్లు మంత్రి తెలిపారు. కేంద్రం నుంచి అవసరమైన సాంకేతిక అనుమతులు మంజూరైన వెంటనే, ఎలాంటి జాప్యం లేకుండా నవంబర్ రెండో వారం నుంచే మైదానంలో పనులు స్టార్ట్ చేసేలా ప్రణాళికలు తయారు చేస్తున్నట్లు పేర్కొన్నారు. ఎన్డీఎస్ఏ (NDSA) తో పాటు నిపుణుల కమిటీ సూచించిన ప్రతి అభ్యంతరాన్ని, లోపాన్ని పరిగణనలోకి తీసుకుని ఈ పనులను చేపడుతున్నామని వివరించారు.
నాణ్యత, భద్రతకే అత్యున్నత ప్రాధాన్యం
బ్యారేజీల పునరుద్ధరణలో నాణ్యత, పటిష్టతే ప్రభుత్వ ప్రాథమిక లక్ష్యమని మంత్రి తేల్చిచెప్పారు. దేశంలోని అత్యున్నత జాతీయ సాంకేతిక సంస్థల మార్గదర్శకాలకు అనుగుణంగానే పునరుద్ధరణ పనులు జరుగుతాయని వెల్లడించారు. మేడిగడ్డ, అన్నారం, సుందిళ్ల బ్యారేజీల భద్రతను పటిష్ఠం చేస్తూ, వాటి అసలు నిల్వ సామర్థ్యాన్ని పూర్తి స్థాయిలో పునరుద్ధరిస్తామని స్పష్టం చేశారు. 2027 వానాకాలం ప్రారంభానికి ముందే ఈ మూడు బ్యారేజీల పునర్నిర్మాణ, మరమ్మతు పనులను రికార్డు సమయంలో పూర్తి చేస్తామని ఉత్తమ్ కుమార్ రెడ్డి పేర్కొన్నారు.
