న్యూఢిల్లీలోని జంతర్ మంతర్ వద్ద జరుగుతున్న నిరసనల నేపథ్యంలో బాలీవుడ్ నటి స్వర భాస్కర్ సంచలన వ్యాఖ్యలు చేశారు. ‘నీట్’ పరీక్ష పేపర్ లీకేజీ వ్యవహారంలో కేంద్ర విద్యాశాఖ మంత్రి ధర్మేంద్ర ప్రధాన్ పదవికి రాజీనామా చేయాలనే డిమాండ్తో సామాజిక కార్యకర్త సోనమ్ వాంగ్చుక్ గత 20 రోజులుగా నిరాహార దీక్ష చేస్తున్నారు. ఈ దీక్షా శిబిరానికి స్వయంగా వెళ్లిన స్వర భాస్కర్, ఆయనకు తన సంఘీభావాన్ని ప్రకటించారు.
ఈ సందర్భంగా స్వర భాస్కర్ మీడియాతో మాట్లాడుతూ.. ప్రస్తుత రాజకీయాలపై బాలీవుడ్ నటీనటులు మౌనంగా ఉండటానికి గల కారణాలను విశ్లేషిస్తూ సంచలన విషయాలు పంచుకున్నారు. గతంలో 2011 నాటి అన్నా హజారే అవినీతి వ్యతిరేక ఉద్యమానికి సినీ పరిశ్రమ తరలివచ్చిన విషయాన్ని గుర్తు చేస్తూ, ఇప్పుడు ఎందుకు స్పందించడం లేదన్న ప్రశ్నకు ఆమె సూటిగా సమాధానమిచ్చారు. "పరిశ్రమలో ఉన్నవారు నా పరిస్థితిని చూసి గుణపాఠం నేర్చుకున్నారు. రాజకీయ పరిణామాలపై గళం విప్పితే స్వర భాస్కర్లాగే తమ కెరీర్ కూడా ఇబ్బందుల్లో పడుతుందని వారు ఆందోళన చెందుతున్నారు. అందుకే చాలా మంది సెలబ్రిటీలు బహిరంగంగా మాట్లాడటానికి జంకుతున్నారు" అని ఆమె వ్యాఖ్యానించారు.
2011 నాటి పరిస్థితులతో పోలిస్తే ప్రస్తుత పాలన పూర్తిగా మారిపోయిందని స్వర భాస్కర్ తీవ్ర విమర్శలు చేశారు. "ఆనాటి ప్రభుత్వంలోనూ లోపాలు, అవినీతి ఉండవచ్చు.. కానీ అప్పటి పాలకులు ఇంతటి క్రూరత్వానికి ఒడిగట్టలేదు. ఎలాంటి బలమైన కారణాలు లేకుండా ఉద్యమకారులను, విద్యార్థులను బెయిల్ కూడా ఇవ్వకుండా ఏళ్ల తరబడి జైళ్లలో మగ్గేలా చేయలేదు. 84 ఏళ్ల వృద్ధుడైన ఫాదర్ స్టాన్ స్వామి జైలులోనే ప్రాణాలు విడిచేలా చేసిన చరిత్ర ఈ ప్రభుత్వానిది. ప్రస్తుత పాలకులు అహంకారంతో, బరితెగింపుతో వ్యవహరిస్తున్నారు" అని ధ్వజమెత్తారు.
నా బిడ్డ భవిష్యత్తు కోసమే ఈ పోరాటం
ఒక సామాజిక అంశంపై ప్రజల్లో చైతన్యం రావడానికి సెలబ్రిటీల అండ అవసరం లేదని, సమస్యలో నిజాయితీ ఉంటే ప్రజలే ముందుకు వస్తారని స్వర భాస్కర్ స్పష్టం చేశారు. తాను ఇక్కడికి నటిగా కాకుండా, ఒక బాధ్యతాయుతమైన పౌరురాలిగా, ఒక తల్లిగా వచ్చానని తెలిపారు. "పరిస్థితులు సరిగ్గా లేవని దేశాన్ని వదిలిపెట్టి దుబాయ్ లాంటి ప్రాంతాలకు గోల్డెన్ వీసాలపై వలస వెళ్ళిపోవడం నాకు ఇష్టం లేదు. నా కుమార్తె ఈ స్వదేశంలోనే పెరగాలి, ఇక్కడే ఉన్నత చదువులు చదవాలి. ఒక పౌరురాలిగా నాకు లభించిన అన్ని హక్కులు, అవకాశాలు నా బిడ్డకు కూడా దక్కాలనే ఉద్దేశంతోనే నేను ఇక్కడికి వచ్చాను" అని భావోద్వేగంగా పేర్కొన్నారు.
https://www.instagram.com/reel/Da3DnQgvBLb/?utm_source=ig_web_button_share_sheet
