దేశంలో అధికారిక కార్యక్రమాల్లో జాతీయ చిహ్నాల గౌరవాన్ని కాపాడటం, ఏకరూపతను తీసుకురావడం కోసం కేంద్ర హోం మంత్రిత్వ శాఖ (ఎంహెచ్ఏ) తాజా మార్గదర్శకాలను విడుదల చేసింది. జాతీయ గీతం 'జనగణమన', జాతీయ గేయం 'వందేమాతరం'తో పాటు వివిధ రాష్ట్రాల అధికారిక గీతాల ఆలాపనపై స్పష్టమైన ఆదేశాలు జారీ చేసింది. దేశంలోని అన్ని రాష్ట్రాలు, కేంద్ర పాలిత ప్రాంతాలు, కేంద్ర ప్రభుత్వ మంత్రిత్వ శాఖలు ఈ నిబంధనలను కచ్చితంగా పాటించాలని ఈ నెల 9న పంపిన ఉత్తర్వుల్లో కేంద్రం స్పష్టం చేసింది.
ఈ నూతన ఆదేశాల ప్రకారం.. ఏదైనా అధికారిక వేడుకలో రాష్ట్ర గీతంతో పాటు జాతీయ చిహ్నాలను ఆలపించాల్సి వస్తే ఒక నిర్దిష్ట ప్రాధాన్యత క్రమాన్ని పాటించాల్సి ఉంటుంది. దీని ప్రకారం, కార్యక్రమ ప్రారంభంలో మొట్టమొదటగా బంకించంద్ర ఛటర్జీ రచించిన 'వందేమాతరం' గేయాన్ని ఆలపించాలి. ఆ తర్వాత రవీంద్రనాథ్ ఠాగూర్ రచించిన 'జనగణమన' గీతాన్ని పూర్తిగా పాడాలి. ఈ రెండు పూర్తయిన తర్వాతే ఆయా రాష్ట్రాలకు సంబంధించిన అధికారిక రాష్ట్ర గీతాల ఆలాపనకు అవకాశం ఇవ్వాలని హోం శాఖ స్పష్టం చేసింది.
అలాగే, జాతీయ గీతం వినిపించేటప్పుడు ప్రేక్షకులు తప్పనిసరిగా నిలబడి గౌరవ వందనం సమర్పించాలనే నిబంధనను కేంద్రం పునరుద్ఘాటించింది. అయితే న్యూస్రీల్స్ లేదా డాక్యుమెంటరీల ప్రదర్శన మధ్యలో జాతీయ గీతం వస్తే.. ప్రదర్శనకు అంతరాయం కలగకుండా ఉండేందుకు నిలబడాల్సిన అవసరం లేదని మినహాయింపునిచ్చింది. వీటితో పాటు విదేశీ ప్రతినిధులు హాజరయ్యే అంతర్జాతీయ వేడుకల్లో ప్రోటోకాల్ ప్రకారం ముందుగా సదరు విదేశీ జాతీయ గీతాన్ని, ఆ తర్వాతే భారత జాతీయ గీతాన్ని ప్లే చేయాలని నిర్దేశించింది.
దేశ సాంస్కృతిక వారసత్వాన్ని, స్వాతంత్ర్య పోరాట స్ఫూర్తిని గౌరవించడమే ఈ మార్గదర్శకాల ముఖ్య ఉద్దేశమని కేంద్రం పేర్కొంది. సందర్భం లేకుండా విచక్షణారహితంగా జాతీయ గీతాన్ని ప్లే చేయడాన్ని మానుకోవాలని సూచించింది. వీటికి సంబంధించిన అధికారిక పాఠాలు, సరైన ఉచ్చారణ వివరాలు హోం శాఖ వెబ్సైట్లో అందుబాటులో ఉంచామని, జాతీయ చిహ్నాల పట్ల ప్రజల్లో ఐక్యతను పెంపొందించేందుకే ఈ నిర్ణయమని కేంద్రం స్పష్టం చేసింది.
