హైడ్రా కమిషనర్ ఏవీ రంగనాథ్.. తెలంగాణ హైకోర్టుకు క్షమాపణలు చెప్పారు. దీంతో.. హైడ్రా వ్యవహారం మరోసారి చర్చనీయాంశంగా మారింది.
రంగారెడ్డి జిల్లా లోతుకుంటలోని సర్వే నంబర్లు 1, 2కు సంబంధించి.. హైడ్రా అధికారులు అక్రమ నిర్మాణాలపై చర్యలు తీసుకున్నారంటూ వివాదం మొదలైంది. సుమారు 40 ఎకరాల భూమికి సంబంధించిన ఈ వ్యవహారంలో.. హైడ్రా తమ భూముల్లోకి వచ్చి చర్యలు తీసుకుందని పిటిషనర్ కోర్టును ఆశ్రయించారు.
ఈ పిటిషన్పై విచారణ సందర్భంగా.. హైడ్రా చర్యలు, అధికారుల తీరు పై తెలంగాణ హైకోర్టు తీవ్రంగా స్పందించింది. కోర్టు ఆదేశాలు, న్యాయ ప్రక్రియకు సంబంధించి అధికారులు మరింత జాగ్రత్తగా వ్యవహరించాల్సిన అవసరం ఉందని స్పష్టం చేసింది.
అయితే.. తాజాగా హైడ్రా కమిషనర్ ఏవీ రంగనాథ్ హైకోర్టులో అఫిడవిట్ దాఖలు చేశారు. కోర్టులు, న్యాయవ్యవస్థపై తనకు ఎంతో నమ్మకం ఉందని తెలిపారు. లోతుకుంటలోని సర్వే నంబర్లు 1, 2లో ఉన్న 40 ఎకరాల భూమిలోకి హైడ్రా వెళ్లలేదని స్పష్టం చేశారు.
పిటిషనర్ కోర్టుకు అవాస్తవాలు చెప్పారని కూడా రంగనాథ్ తన అఫిడవిట్లో పేర్కొన్నారు. అయితే.. ఈ వ్యవహారంలో గతంలో ఇచ్చిన వివరణలు, కోర్టు ముందు ప్రస్తావించిన అంశాలపై మాత్రం హైకోర్టు తీవ్ర అసంతృప్తి వ్యక్తం చేసింది.
ఇదే సమయంలో.. రంగనాథ్పై ఏకంగా 63 కోర్టు ధిక్కరణ పిటిషన్లు ఉన్నాయని హైకోర్టు ప్రస్తావించింది. ఇన్ని పిటిషన్లు ఎందుకు దాఖలవుతున్నాయని ఆయనను ప్రశ్నించింది. హైడ్రా చర్యల విషయంలో పదేపదే కోర్టు వివాదాలు ఎందుకు తలెత్తుతున్నాయనే అంశంపై కూడా న్యాయస్థానం ఆరా తీసింది.
దీంతో.. క్షమాపణలు చెబుతూ రంగనాథ్ అఫిడవిట్ దాఖలు చేయడం ఇప్పుడు కీలకంగా మారింది. హైడ్రా అక్రమ నిర్మాణాలపై చర్యలు తీసుకుంటున్న సమయంలో కోర్టు ఆదేశాలు, చట్టపరమైన ప్రక్రియను పాటించడంలో ఎలాంటి లోపాలు ఉండకూడదని ఈ పరిణామం మరోసారి స్పష్టం చేసింది. ప్రస్తుతం ఈ అంశం రాష్ట్ర వ్యాప్తంగా ఆసక్తికరంగా మారింది.
