హైదరాబాద్ నగరవాసులను విద్యుత్ అధికారులు అలర్ట్ చేశారు. నగరంలోని ప్రముఖ ఐటీ కారిడార్ పరిసర ప్రాంతమైన రాయదుర్గంతో పాటు, బోడుప్పల్ ఉప నగర పరిధిలోని పలు నివాస ప్రాంతాలలో ఈరోజు (గురువారం) విద్యుత్ సరఫరా నిలిచిపోనుంది. విద్యుత్ లైన్ల వార్షిక నిర్వహణ పనులు, వర్షాకాలం నేపథ్యంలో లైన్లకు అడ్డంగా ఉన్న చెట్ల కొమ్మల తొలగింపు ప్రక్రియను చేపట్టడం కోసమే ఈ తాత్కాలిక కోతలు విధిస్తున్నట్లు విద్యుత్ పంపిణీ సంస్థకు చెందిన ఉన్నతాధికారులు ఒక ప్రకటనలో వెల్లడించారు.
రాయదుర్గం సెక్షన్ పరిధిలోనూ ఉదయం 9 గంటల నుంచే ప్రారంభమై మధ్యాహ్నం 3 గంటల వరకు సుదీర్ఘంగా విద్యుత్ సరఫరాను నిలిపివేయనున్నారు. ఇక్కడి ఓక్ రిడ్జ్, జైన్ హోమ్స్ 11 కేవీ ఫీడర్ల పరిధిలో ఉన్న ఖాజాగూడ గ్రామం, జైన్ హోమ్స్ తదితర విలాసవంతమైన గేటెడ్ కమ్యూనిటీ ప్రాంతాలలో ఈ కోతలు విధిస్తున్నారు. క్షేత్రస్థాయిలో లైన్ల పునరుద్ధరణ, నిర్వహణ పనులు నిశ్చిత సమయం కంటే ముందుగానే పూర్తయితే వెంటనే విద్యుత్ సరఫరాను పునరుద్ధరిస్తామని విద్యుత్ అధికారులు స్పష్టం చేశారు.
అదేవిధంగా, బోడుప్పల్ పరిధిలోని ఇందిరా నగర్ 33/11 కేవీ సబ్స్టేషన్ పరిధిలో ప్రధానంగా రెండు విడతలుగా ఈ విద్యుత్ అంతరాయం కొనసాగుతుందని సబ్స్టేషన్ అసిస్టెంట్ ఇంజనీర్ ఎన్.వేణుగోపాల్ అధికారికంగా తెలిపారు. ఇందులో భాగంగా మొదటి విడత కింద ఉదయం 10 గంటల సమయం నుంచి మధ్యాహ్నం 12 గంటల వరకు 11 కేవీ ఎస్బీఆర్ కాలనీ ఫీడర్ పరిధిలో విద్యుత్ నిలిపివేయనున్నారు. దీంతో పద్మావతి కాలనీ, అమ్మాసాని వెంకట రెడ్డి కాలనీ, ఆర్ఎన్జీఎస్ కాలనీలతో పాటు బీఎల్ నగర్, అంజయ్య ఎన్క్లేవ్, టెలిఫోన్ కాలనీ ఫేజ్-2, పీఎన్ఆర్ కాలనీ, రెడ్డిస్ కాలనీలలో విద్యుత్ సరఫరా నిలిచిపోనుంది.
ఈ సబ్స్టేషన్ పరిధిలో రెండో విడత మరమ్మతు పనులను మధ్యాహ్నం తర్వాత నిర్వహించనున్నారు. మధ్యాహ్నం 3 గంటల నుంచి సాయంత్రం 5 గంటల వరకు 11 కేవీ బొల్లిగూడెం ఫీడర్ పరిధిలోని ప్రాంతాల్లో విద్యుత్ సరఫరా నిలిపివేస్తారు. ఈ విడతలో బొల్లిగూడెం ప్రధాన ప్రాంతంతో పాటు అంజయ్య ఎన్క్లేవ్, ఎస్బీఆర్ కాలనీ, టెలిఫోన్ కాలనీలలో అంతరాయం కలుగనుంది.
