తెలంగాణ ప్రభుత్వం ప్రతిష్టాత్మకంగా చేపడుతున్న పేదల ఇళ్ల నిర్మాణ పథకానికి నామకరణం చేసేందుకు నిర్వహించిన నామకరణ పోటీ ఇప్పుడు రాష్ట్రవ్యాప్తంగా ఆసక్తికరంగా మారింది. వేలాది మంది తమ సృజనాత్మకతతో ఎన్నో పేర్లను సూచించినా అందులో ఓ వ్యక్తి సూచించిన పేరునే ప్రభుత్వ పెద్దలు ఖరారు చేశారు. అయితే ఈ పోటీల్లో పాల్గొన్న ఓ సామాన్యుడు రాత్రికి రాత్రే రూ.లక్ష బహుమతిని గెలుచుకుని లక్షాధికారి అయిపోయాడు.
పేదల కోసం నిర్మించే ఇళ్ల పథకానికి ప్రజల నుంచి నేరుగా ఆలోచనలను ఆహ్వానించాలని ప్రభుత్వం నిర్ణయించింది. ప్రజల భాగస్వామ్యాన్ని పెంచేందుకు, అత్యుత్తమ పేరును సూచించిన వారికి రూ. లక్ష నగదు బహుమతి ఇస్తామని ప్రభుత్వం అధికారికంగా ప్రకటించింది. ఈ ప్రకటనతో రాష్ట్ర వ్యాప్తంగా ప్రజల నుంచి విశేష స్పందన లభించింది. వేలాది మంది ప్రజలు, రచయితలు, యువకులు తమ సృజనాత్మకతకు పదును పెట్టి వివిధ రకాల పేర్లను దరఖాస్తుల రూపంలో (ఆన్లైన్, ఆఫ్ లైన్ మాధ్యమాల ద్వారా) ప్రభుత్వానికి పంపించారు.
ప్రాసలతో కూడిన పేర్లు, సంక్షేమాన్ని ప్రతిబింబించే శీర్షికలు వేలల్లో వచ్చాయి. వచ్చిన వేలాది దరఖాస్తులను అధికారులు, నిపుణుల కమిటీ సమగ్రంగా పరిశీలించింది. ప్రతి పేరును విశ్లేషించి, ప్రజలకు సులభంగా అర్థమయ్యేలా, విశ్వసనీయంగా ఉండే పేరు కోసం వడపోత కార్యక్రమం చేపట్టారు. అందరూ కొత్త కొత్త పేర్లను ప్రతిపాదిస్తుంటే, నకిరేకల్కు చెందిన కొండా నాగరాజు మాత్రం ప్రజల్లోకి ఇప్పటికే బలంగా వెళ్లిన, పేదలకు ఎంతో కాలంగా పరిచితమైన 'ఇందిరమ్మ ఇండ్లు' అనే పేరే ఎంతో శక్తివంతమైనదని, దాన్నే కొనసాగించడం ఉత్తమమని దరఖాస్తు చేశారు.
దీంతో ఈ పేరునే ఖరారు చేసిన మంత్రులు పొంగులేటి శ్రీనివాసరెడ్డి, శ్రీధర్ బాబు, పొన్నం ప్రభాకర్లు కొండా నాగరాజుకు రూ.లక్ష బహుమతి చెక్కును స్వయంగా అందజేసి అభినందించారు. ఈ సందర్భంగా మంత్రులు మాట్లాడుతూ.. పేదల ఇళ్ల నిర్మాణంలో ఎలాంటి నాణ్యతా లోపాలు లేకుండా శరవేగంగా పనులు పూర్తి చేస్తామని వెల్లడించారు. వచ్చే ఏడు బోనాల పండుగ నాటికి ఈ ఇళ్ల నిర్మాణాలను పూర్తి చేసి అర్హులైన పేదలకు పంపిణీ చేయడమే లక్ష్యంగా పెట్టుకున్నట్లు మంత్రి పొంగులేటి స్పష్టం చేశారు.
