భద్రాచలంలోని ఓ ప్రైవేట్ లాడ్జిలో ఘటన
సూసైడ్ నోట్‌లో సంచలన విషయాలు
రూ. కోటి మామూళ్లు డిమాండ్
లైంగిక వేధింపుల ఆరోపణలు చేస్తామని బెదిరింపులు
మహిళా కంప్యూటర్ ఆపరేటర్, విలేకరుల హస్తం?
దసరా పండుగ వేళ భద్రాద్రి కొత్తగూడెం జిల్లాలో సంచలన ఘటన చోటుచేసుకుంది. కొవ్వూరు డిప్యూటీ తహసీల్దార్‌గా విధులు నిర్వహిస్తున్న లక్ష్మీనారాయణ (Deputy Tahsildar Laxminarayana) భద్రాచలంలోని ఒక ప్రైవేట్ లాడ్జిలో ఉరేసుకుని బలవన్మరణానికి పాల్పడ్డారు. పండుగ మామూళ్ల పేరుతో పలువురు విలేకరులు, ఒక కంప్యూటర్ ఆపరేటర్ తీవ్రంగా వేధించడం వల్లే తాను ఈ తీవ్ర నిర్ణయం తీసుకుంటున్నట్లు ఆయన రాసిన సూసైడ్ నోట్ లభించడంతో రెవెన్యూ వర్గాల్లో, స్థానికంగా తీవ్ర కలకలం రేగింది.
పోలీసులు స్వాధీనం చేసుకున్న సూసైడ్ నోట్‌లో సంచలన విషయాలు వెలుగులోకి వచ్చాయి. దసరా మామూళ్ల పేరుతో తన నుంచి ఏకంగా రూ.కోటి డిమాండ్ చేశారని లక్ష్మీనారాయణ ఆరోపించారు. కోరినంత డబ్బులు ఇవ్వకపోతే తనపై లైంగిక వేధింపుల నెపంతో నిందలు మోపి, ఉన్నతాధికారులకు ఫిర్యాదు చేస్తామని బెదిరించినట్లు ఆయన సూసైడ్ నోట్‌లో తీవ్ర ఆవేదన వ్యక్తం చేశారు.
ఈ వేధింపులలో కంప్యూటర్ ఆపరేటర్ రజితతో పాటు పలువురు మీడియా ప్రతినిధుల ప్రమేయం ఉందని, వారి పేర్లను సూసైడ్ నోట్‌లో స్పష్టంగా ప్రస్తావించారు. ఘటనా స్థలానికి చేరుకున్న పోలీసులు మృతదేహాన్ని స్వాధీనం చేసుకుని పోస్టుమార్టం నిమిత్తం ప్రభుత్వ ఆసుపత్రికి తరలించారు. సూసైడ్ నోట్ ఆధారంగా కేసు నమోదు చేసి దర్యాప్తు ప్రారంభించినట్లు భద్రాచలం పోలీసులు తెలిపారు.
వేధింపులకు పాల్పడిన వారిపై కఠిన చర్యలు తీసుకోవాలని, డిప్యూటీ తహసీల్దార్ కుటుంబాన్ని ఆదుకోవాలని రెవెన్యూ ఉద్యోగుల సంఘాలు డిమాండ్ చేస్తున్నాయి. పండుగ వేళ ఒక బాధ్యతాయుతమైన ఉద్యోగి బ్లాక్‌మెయిలింగ్‌కు బలవడం స్థానికంగా తీవ్ర దిగ్భ్రాంతిని కలిగించింది. ఈ ఘటన ప్రస్తుతం రాష్ట్ర వ్యాప్తంగా పెను సంచలనంగా మారింది. ఒక ప్రభుత్వ అధికారిని ఏకంగా రూ.కోటి డిమాండ్ చేస్తూ బెదిరించడం పట్ల రెవెన్యూ వర్గాల్లో చర్చకు దారితీస్తోంది.
