ఎల్‌నినో ప్రభావంతో తీవ్ర వర్షాభావ పరిస్థితుల మధ్య వాతావరణ శాఖ చల్లని కబురుచెప్పింది. ఆంధ్రప్రదేశ్, తెలంగాణ రాష్ట్రాల్లో రాగల రెండు రోజుల పాటు (ఆదివారం, సోమవారం) వర్షాలు కురిసే అవకాశం ఉందని భారత వాతావరణ శాఖ (IMD), రాష్ట్ర విపత్తుల నిర్వహణ సంస్థ కీలక అప్‌డేట్ ఇచ్చాయి. ఉత్తర తమిళనాడు, దక్షిణ కోస్తాంధ్ర ప్రాంతాలపై ఉపరితల ఆవర్తనం చురుకుగా కొనసాగుతుండటంతో పాటు, దక్షిణ కోస్తాంధ్ర నుంచి వాయవ్య బంగాళాఖాతం వరకు ఉపరితల ద్రోణి విస్తరించింది. దీని ప్రభావంతో రెండు తెలుగు రాష్ట్రాల్లో పలు చోట్ల ఉరుములు, మెరుపులు, ఈదురుగాలులతో కూడిన వర్షాలు కురిసే అవకాశం ఉందని అధికారులు వెల్లడించారు.
ఆంధ్రప్రదేశ్ విషయానికి వస్తే.. అల్లూరి సీతారామరాజు, పోలవరం, డాక్టర్ బీఆర్ అంబేద్కర్ కోనసీమ, ఎన్టీఆర్, పల్నాడు, మార్కాపురం, అనంతపురం, వైఎస్సార్ కడప, అన్నమయ్య, చిత్తూరు, తిరుపతి జిల్లాల్లో పలుచోట్ల ఉరుములు, మెరుపులతో కూడిన భారీ వర్షాలు కురిసే అవకాశం ఉందని వాతావరణ కేంద్రం తెలిపింది. మిగిలిన కోస్తా, రాయలసీమ జిల్లాల్లో తేలికపాటి నుంచి మోస్తరు వర్షపాతం నమోదు కావచ్చు. పిడుగులు పడే ప్రమాదం ఉన్నందున వర్షం పడే సమయంలో పొలాల్లో పనిచేసే రైతులు, కూలీలు సురక్షిత ప్రాంతాలకు వెళ్లాలని విపత్తు నిర్వహణ సంస్థ సూచించింది.
మరోవైపు తెలంగాణలోనూ రాగల రెండు రోజులు వర్ష సూచన ఉంది. హైదరాబాద్ వాతావరణ కేంద్రం తెలిపిన వివరాల ప్రకారం.. ఖమ్మం, వరంగల్, నల్గొండ, రంగారెడ్డి, మహబూబ్‌నగర్, హైదరాబాద్, కరీంనగర్ ఉమ్మడి జిల్లాల పరిధిలో ఉరుములు, మెరుపులతో కూడిన మోస్తరు వర్షాలు పడే అవకాశం ఉంది. హైదరాబాద్ నగరంతో పాటు పరిసర ప్రాంతాల్లో సాయంత్రం లేదా రాత్రి వేళల్లో ఆకాశం మేఘావృతమై జల్లులు పడతాయని అంచనా వేస్తున్నారు. దసరా పండుగ ప్రయాణాల వేళ రహదారులపై నీరు చేరే అవకాశం ఉన్నందున ప్రయాణికులు అప్రమత్తంగా ఉండాలని అధికారులు కోరారు.
