దేశీయ మార్కెట్లో గత కొన్ని రోజులుగా హెచ్చుతగ్గులకు లోనైన పసిడి, వెండి ధరలు ఆదివారం స్థిరంగా కొనసాగుతున్నాయి. ఎలాంటి మార్పులు లేకపోవడంతో కొనుగోలు చేయాలనుకునే వారికి ప్రస్తుతానికి కాస్త ఉపశమనం లభించినట్లయింది. అంతర్జాతీయ మార్కెట్ వాతావరణం ప్రశాంతంగా ఉండటంతో స్థానిక విపణిలోనూ పసిడి ధరల్లో నిలకడ కనిపిస్తోంది.
తెలుగు రాష్ట్రాలైన ఆంధ్రప్రదేశ్, తెలంగాణల్లో బంగారం రేట్లు ఒకే స్థాయిలో నమోదు కావడం విశేషం. హైదరాబాద్, విజయవాడ, విశాఖపట్నం, వరంగల్, గుంటూరు వంటి ప్రధాన నగరాల్లో ఆభరణాల తయారీకి వాడే 22 క్యారెట్ల బంగారం ధర 10 గ్రాములకు రూ.1,32,850 వద్ద కొనసాగుతోంది. ఇక అత్యంత స్వచ్ఛమైన 24 క్యారెట్ల పసిడి (10 గ్రాములు) ధర రూ.1,44,930గా నమోదైంది. ఇదే క్రమంలో 18 క్యారెట్ల బంగారం ధర రూ. 1,08,700 వద్ద ఎలాంటి మార్పు లేకుండా నిలకడగా ఉంది.
దేశ రాజధాని ఢిల్లీతో పాటు తమిళనాడు రాజధాని చెన్నైలో మాత్రం స్థానిక పన్నులు, విక్రయ వ్యయాల ఆధారంగా ధరల్లో స్వల్ప తేడాలు కనిపిస్తున్నాయి. ఈ రెండు ప్రధాన నగరాల్లో 10 గ్రాముల 22 క్యారెట్ల బంగారం రూ.1,33,000 వద్ద ట్రేడ్ అవుతుండగా, ఆర్థిక రాజధాని ముంబై, కోల్కతా నగరాల్లో తెలుగు రాష్ట్రాల తరహాలోనే రేట్లు నమోదయ్యాయి.
మరోవైపు, పసిడి బాటలోనే వెండి ధరలు కూడా అడుగులేస్తున్నాయి. హైదరాబాద్ సహా ఇతర నగరాల్లో ప్రస్తుతం కిలో వెండి ధర రూ.2,40,000 వద్ద స్థిరంగా సాగుతోంది. గమనించదగ్గ విషయమేమిటంటే, అంతర్జాతీయ కరెన్సీ మార్పిడి రేట్లు, డిమాండ్, స్థానిక పన్నులు వంటి రకరకాల అంశాల ఆధారంగా నిత్యం ధరల్లో మార్పులు చోటుచేసుకుంటాయి. అందువల్ల వినియోగదారులు బంగారం, వెండి వస్తువులు కొనుగోలు చేయడానికి ముందుగా దగ్గర్లోని జ్యువెలరీ దుకాణాల్లో లైవ్ ధరలను తెలుసుకోవడం శ్రేయస్కరం.
