దేశ రాజధాని ఢిల్లీలో చోటుచేసుకున్న ఒక విషాదకర అగ్నిప్రమాదం ముగ్గురి ప్రాణాలను బలిగొంది. లోధి కాలనీ పోలీస్ స్టేషన్ పరిధిలోని బీకే దత్ కాలనీలో గల ఒక నివాస గృహంలో మంగళవారం ఉదయం ఈ దారుణ ఘటన సంభవించింది. భవనం పైఅంతస్తులోని ప్లాట్లో ఒక్కసారిగా ఎగసిపడిన మంటలు, దట్టంగా అలుముకున్న పొగ కారణంగా ఇంట్లోనే ఉన్న తల్లి, ఆమె ఇద్దరు చిన్నారి కుమార్తెలు బయటకు రాలేక అక్కడిక్కడే ఊపిరాడక మంటల్లో సజీవదహనమయ్యారు.
ఉదయం 10.21 గంటల సమయంలో బాధిత మహిళ స్వయంగా అత్యవసర సాయం కోసం స్థానిక పోలీసులకు ఫోన్ చేశారు. భవనంలో భారీగా మంటలు చెలరేగాయని, తాము లోపల చిక్కుకుపోయామని, బయటకు రావడానికి మార్గం లేక పొగలో ఊపిరాడటం లేదని రోదిస్తూ కాపాడాలని అభ్యర్థించారు. పోలీసులతో మాట్లాడుతుండగానే ఆమె గొంతు మారుతూ క్రమంగా క్షీణించి, కొంతసేపటికే ఫోన్ కాల్ అర్ధాంతరంగా కట్ అయిపోయింది. దీంతో ఆందోళన చెందిన అధికారులు తక్షణమే ఘటనా స్థలానికి రెస్క్యూ బృందాలను పరుగులు తీయించారు.
సమాచారం అందుకున్న వెంటనే ఫైర్ సిబ్బంది, పోలీసులు రెండు అగ్నిమాపక యంత్రాలు, మూడు అంబులెన్సులతో హుటాహుటిన అక్కడకు చేరుకుని రెస్క్యూ ఆపరేషన్ చేపట్టారు. ప్రమాదం జరిగిన భవనం పైఅంతస్థు కావడం, అప్పటికే మంటలు ఇంట్లోని అన్ని గదులకు తీవ్రంగా వ్యాపించడంతో సహాయక చర్యలకు తీవ్ర ఆటంకం ఏర్పడింది. సిబ్బంది అత్యంత శ్రమించి మంటలను అదుపులోకి తెచ్చి, తలుపులు బద్దలు కొట్టుకుని లోపలికి వెళ్లేసరికి తీవ్ర విషాదం కంటపడింది.
ఆ సమయానికే ఇంట్లో ఉన్న 45ఏళ్ల మహిళతో పాటు ఆమె కుమార్తెలు (ఒకరికి 13ఏళ్లు, మరొకరికి 7 ఏళ్లు) తీవ్రంగా కాలిన గాయాలతో ప్రాణాలు కోల్పోయి కనిపించారు. మృతదేహాలను స్వాధీనం చేసుకున్న పోలీసులు పోస్టుమార్టం నిమిత్తం ఆసుపత్రికి తరలించారు. ప్రాథమిక అంచనా ప్రకారం విద్యుత్ షార్ట్ సర్క్యూట్ వల్లే ప్రమాదం జరిగి ఉండవచ్చని భావిస్తున్నారు. ఫోరెన్సిక్ నిపుణులు ఘటనా స్థలంలో ఆధారాలు సేకరిస్తుండగా, పోలీసులు కేసు నమోదు చేసుకుని ప్రమాదానికి గల కచ్చితమైన కారణాలపై దర్యాప్తు వేగవంతం చేశారు.
