ప్రస్తుతం జరుగుతున్న ఫిఫా వరల్డ్ కప్ 2026 నాకౌట్ (రౌండ్ ఆఫ్ 16) మ్యాచ్లో ఇంగ్లాండ్ జట్టు మెక్సికోతో తలపడనుంది. అయితే, మెక్సికో సిటీలోని ప్రసిద్ధ 'ఎస్టాడియో అజ్టెకా' స్టేడియంలో జరగబోయే ఈ మ్యాచ్ కోసం ఇంగ్లాండ్ ఆటగాళ్లు 'వయాగ్రా' (Viagra) టాబ్లెట్లను వాడేందుకు అనుమతి లభించడం అంతర్జాతీయ క్రీడా వర్గాల్లో పెద్ద చర్చనీయాంశమైంది. సాధారణంగా శృంగార ఉద్దీపనగా భావించే ఈ మందును ఆటగాళ్లకు అనుమతించడం వెనుక అసలు కారణం లైంగికమైనది కాదు, పూర్తిగా వైద్యపరమైనదిగా తెలుస్తోంది.
ఆటగాళ్ల ఫిట్నెస్కు సంబంధించినదని క్రీడా వైద్య నిపుణులు స్పష్టం చేస్తున్నారు. మెక్సికో సిటీ సముద్ర మట్టానికి సుమారు 2,240 మీటర్ల (7,300 అడుగులకు పైగా) అత్యధిక ఎత్తులో ఉండటంతో అక్కడ గాలి పలచగా ఉండి, ఆక్సిజన్ శాతం చాలా తక్కువగా ఉంటుంది. ఇలాంటి వాతావరణంలో మైదానంలో పరుగెత్తేటప్పుడు ఆటగాళ్లు త్వరగా అలసిపోవడం, శ్వాస తీసుకోవడం ఇబ్బందిగా మారడం (ఆల్టిట్యూడ్ సిక్నెస్) వంటి సమస్యలు ఎదురవుతాయి. వయాగ్రాలోని ప్రధాన రసాయన పదార్ధం 'సిల్డెనాఫిల్' ఊపిరితిత్తులలోని రక్తనాళాలను వెడల్పు చేసి, తక్కువ ఆక్సిజన్ ఉన్నప్పటికీ గుండె, ఊపిరితిత్తులకు రక్తప్రసరణ సజావుగా సాగేలా చేస్తుంది. తద్వారా ఆటగాళ్లు అలసిపోకుండా, మైదానంలో ఎక్కువ సమయం చురుగ్గా ఆడటానికి ఇది సహాయపడుతుంది.
వరల్డ్ యాంటీ డోపింగ్ ఏజెన్సీ (WADA) నిబంధనల ప్రకారం వయాగ్రా నిషేధిత ఉత్ప్రేరకాల జాబితాలో లేదు. సాధారణ పరిస్థితుల్లో దీనివల్ల ప్రదర్శన అదనంగా పెరగడానికి ఆధారాలు లేవని, కేవలం ఎత్తైన ప్రదేశాలలో వచ్చే శ్వాసకోస ఇబ్బందులను అధిగమించడానికే ఇది ఉపయోగపడుతుందని WADA దీనికి అనుమతినిచ్చింది. అలాగే, తీవ్రమైన శారీరక శ్రమలో ఉండే ఆటగాళ్లలో లైంగిక ప్రేరణ ఉంటే తప్ప ఎలాంటి శారీరక మార్పులు జరగవని వైద్యులు స్పష్టం చేశారు. మెక్సికో వాతావరణ పరిస్థితులను తట్టుకోవడమే తమకు పెద్ద సవాల్ అని ఇంగ్లాండ్ కోచ్ థామస్ టుచెల్ పేర్కొనగా, గతంలో 2019లో అర్జెంటీనా క్లబ్ జట్లు కూడా ఈక్వెడార్లో ఆడినప్పుడు ఇదే వైద్యా విధానాన్ని అనుసరించడం విశేషం.
