భారతీయ రైల్వే వ్యవస్థ రూపురేఖలనే మార్చేసి, ప్రయాణికులకు అత్యాధునిక అనుభూతిని అందిస్తున్న రైలు 'వందే భారత్ ఎక్స్ప్రెస్'. సెమీ-హైస్పీడ్ వేగం, ఆటోమేటిక్ డోర్లు, అధునాతన బ్రేకింగ్ సిస్టమ్స్, 'కవచ్' యాంటీ కొలిజన్ సేఫ్టీ సిస్టమ్ వంటి సాంకేతిక సదుపాయాలు ఉన్న ఈ రైలును నడపడం అత్యంత జవాబుదారీతనంతో కూడుకున్న పని. క్షణాల వ్యవధిలో వేగంగా నిర్ణయాలు తీసుకునే నైపుణ్యం, నిరంతర అప్రమత్తత అవసరమయ్యే ఈ ఉద్యోగం సాధారణ రైళ్ల కంటే ఎంతో భిన్నమైనది. మరి ఇంతటి ప్రాధాన్యత ఉన్న ఈ రైలును నడిపే అవకాశం ఎవరికి వస్తుంది? వారి జీతభత్యాలు ఎలా ఉంటాయో ఇప్పుడు చూద్దాం.
భారతీయ రైల్వే రిక్రూట్మెంట్ బోర్డ్ (RRB) ద్వారా అసిస్టెంట్ లోకో పైలట్ (ALP) పోస్టులకు ఎంపిక కావడం ద్వారా ఈ ప్రయాణం ప్రారంభమవుతుంది. పదో తరగతితో పాటు ఐటీఐ, లేదా మెకానికల్, ఎలక్ట్రికల్, ఎలక్ట్రానిక్స్, ఆటోమొబైల్ ఇంజనీరింగ్లో డిప్లొమా లేదా డిగ్రీ ఉన్నవారు దీనికి అర్హులు. కంప్యూటర్ బేస్డ్ టెస్ట్, ఆప్టిట్యూడ్ (సైకోలాజికల్) టెస్ట్ మరియు ఏ-1 కేటగిరీ మెడికల్ ఫిట్నెస్ పరీక్షల ఆధారంగా వీరిని ఎంపిక చేస్తారు. అయితే, నేరుగా ఎంపికైన కొత్త ఏఎల్పీలకేమీ వెంటనే వందే భారత్ బాధ్యతలు అప్పగించరు. గూడ్స్ రైళ్లు, ప్యాసింజర్, ఎక్స్ప్రెస్ రైళ్లలో సుదీర్ఘ అనుభవం సంపాదించిన సీనియర్లకు మాత్రమే ఈ ఛాన్స్ దక్కుతుంది.
ముఖ్యంగా, తమ కెరీర్లో సున్నా ప్రమాదాల రికార్డు (Zero accident record) ఉన్న అత్యుత్తమ సీనియర్ లోకో పైలట్లను ఎంపిక చేసి, వారికి ప్రత్యేక సాంకేతిక మరియు మానసిక శిక్షణ ఇచ్చిన తర్వాతే వందే భారత్ను నడిపే బాధ్యతలు ఇస్తారు. ఈ క్రమంలో వీరికి అందే వేతనాలు కూడా అదే స్థాయిలో ఆకర్షణీయంగా ఉంటాయి. అత్యున్నత సీనియర్ కేటగిరీకి చెందినవారు కావడం వల్ల వీరి ప్రాథమిక వేతనం (Basic Pay) రూ.35,400 నుంచి రూ. 50వేల పైనే ఉంటుంది.
దీనికి అదనంగా రన్నింగ్ అలవెన్స్ (కిలోమీటర్ల ఆధారంగా ఇచ్చే భత్యం), కరువు భత్యం (DA), ఇంటి అద్దె భత్యం (HRA) మరియు నైట్ డ్యూటీ అలవెన్సులు తోడవుతాయి. అన్ని రకాల అలవెన్సులు కలుపుకుని ఒక వందే భారత్ లోకో పైలట్కు నెలకు రూ. 90వేల నుంచి రూ.లక్షా 20వేల పైనే చేతికి వేతనంగా అందుతుంది. కఠినమైన పరీక్షలు, ఏళ్ల తరబడి అనుభవం , అపారమైన బాధ్యతలతో కూడిన ఈ ఉద్యోగం భారతీయ రైల్వేలో ఎంతో గౌరవప్రదమైన స్థానంగా నిలిచింది.
