దేశవ్యాప్తంగా కోట్లాది మంది వినియోగిస్తున్న డిజిటల్ పేమెంట్స్ వ్యవస్థకు సంబంధించి నేషనల్ పేమెంట్స్ కార్పొరేషన్ ఆఫ్ ఇండియా (NPCI) కీలక ప్రకటన చేసింది. ప్రస్తుతం రాబోతున్న పండుగ సీజన్‌ను దృష్టిలో ఉంచుకుని, వ్యాపారుల విజ్ఞప్తుల మేరకు యూపీఐ మర్చంట్ లావాదేవీలపై ప్రతిపాదిత ఛార్జీల (MDR) అమలును తాత్కాలికంగా వాయిదా వేస్తున్నట్లు ప్రకటించింది. దీపావళి పండుగ ముగిసిన తర్వాత ఈ నిబంధనలను అమలు చేయనున్నట్లు స్పష్టం చేయడంతో వ్యాపార వర్గాలకు భారీ ఊరట లభించినట్లయింది.
మంగళవారం సమావేశమైన యూపీఐ అండ్ సర్వీసెస్ స్టీరింగ్ కమిటీ ఈ నిర్ణయాన్ని ఖరారు చేసింది. పండుగ రద్దీ సమయంలో వ్యాపారులపై అదనపు భారం పడకుండా ఉండేందుకే ఈ నిర్ణయం తీసుకున్నామని, త్వరలోనే నవంబర్ రెండో వారం తర్వాత కచ్చితమైన అమలు తేదీని ప్రకటిస్తామని ఎన్‌పీసీఐ తెలిపింది. గత సెప్టెంబర్‌లో తీసుకున్న నిర్ణయం ప్రకారం రూ.2,000 దాటిన ఎంపిక చేసిన పర్సన్-టు-మర్చంట్ (P2M) లావాదేవీలపై 0.4 శాతం వరకు మర్చంట్ డిస్కౌంట్ రేట్ (MDR) విధించాలని ప్రతిపాదించిన సంగతి తెలిసిందే.
ఈ ఛార్జీల వల్ల సాధారణ వినియోగదారులపై ఎలాంటి భారం ఉండదని, కేవలం వ్యాపారులు మాత్రమే దీన్ని భరించాలని ప్రభుత్వం స్పష్టం చేసింది. ఎంత పెద్ద లావాదేవీ జరిగినా గరిష్ఠంగా రూ.300మించి ఛార్జీ వసూలు చేయబోమని పేర్కొంది. అలాగే రైల్వే, టెలికాం, ఇంధనం వంటి రంగాలకు ఫ్లాట్‌గా రూ.5ఛార్జీ ప్రతిపాదించగా, వ్యక్తుల మధ్య జరిగే (P2P) సాధారణ లావాదేవీలు, చిన్న వ్యాపారాల చెల్లింపులు యథావిధిగా పూర్తిగా ఉచితంగానే కొనసాగుతాయని ఎన్‌పీసీఐ పునరుద్ఘాటించింది.
