Cooking Oil Rates: దసరా, దీపావళి వంటి ప్రధాన పండుగల సీజన్ సమీపిస్తున్న వేళ దేశీయ మార్కెట్లలో వంట నూనెల ధరలను అదుపులో ఉంచేందుకు కేంద్ర ప్రభుత్వం కీలక నిర్ణయం తీసుకుంది. పామాయిల్, సోయాబీన్, సన్ఫ్లవర్ సహా ముడి, శుద్ధి చేసిన పలు రకాల వంట నూనెలపై దిగుమతి సుంకాలను గణనీయంగా తగ్గిస్తూ తాజాగా కీలక ఉత్తర్వులు జారీ చేసింది. సవరించిన ఈ కొత్త రేట్లు సెప్టెంబర్ 24 అర్ధరాత్రి నుంచే దేశవ్యాప్తంగా అమల్లోకి వచ్చాయి.
తాజా నిర్ణయం ప్రకారం ముడి సోయాబీన్, ముడి పామాయిల్పై ప్రాథమిక కస్టమ్స్ సుంకాన్ని 10 శాతం నుంచి 5 శాతానికి తగ్గించగా, ముడి సన్ఫ్లవర్ ఆయిల్పై ఉన్న 10 శాతం సుంకాన్ని ఏకంగా సున్నా శాతానికి రద్దు చేశారు. అలాగే శుద్ధి చేసిన సోయాబీన్, పామాయిల్పై దిగుమతి సుంకాన్ని 32.5 శాతం నుంచి 27.5 శాతానికి, శుద్ధి చేసిన పొద్దుతిరుగుడు నూనెపై సుంకాన్ని 32.5 శాతం నుంచి 22.5 శాతానికి తగ్గించారు.
దిగుమతి సుంకాలు తగ్గడంతో విదేశాల నుంచి నూనెలను దిగుమతి చేసుకునే వ్యయం భారీగా తగ్గనుంది. ఈ తగ్గింపు బెనిఫిట్స్ను దిగుమతిదారులు, రిఫైనర్లు, సరఫరాదారులు రిటైల్ మార్కెట్కు బదిలీ చేస్తే వినియోగదారులకు వంట నూనెల ధరల్లో గణనీయమైన ఉపశమనం లభించనుంది. పండుగల వేళ సాధారణంగా పెరిగే డిమాండ్ను దృష్టిలో ఉంచుకుని, కృత్రిమ కొరత రాకుండా సరిపడా నిల్వలు ఉండేలా కేంద్ర ప్రభుత్వం ఈ ముందస్తు చర్యలు చేపట్టిందని చెబుతున్నారు.
