పశ్చిమ బంగా గా పశ్చిమ బెంగాల్ పేరు
పేరు మార్చేందుకు బీజేపీ ప్రభుత్వ సన్నాహాలు
బీజేపీ పాలిత రాష్ట్రాల్లో పేర్ల మార్పు గోలేంటి..?
పశ్చిమ బెంగాల్ పేరు మార్చబోతున్నారా? త్వరలోనే పశ్చిమ బంగా పేరుతో కొత్త బిల్లు తీసుకురాబోతున్నారా? ఆ రాష్ట్ర బీజేపీ అధ్యక్షుడు సమిక్ భట్టాచార్య ప్రకటనతో మరోసారి దేశవ్యాప్తంగా పేరు మార్పుల రాజకీయంపై చర్చ మొదలైంది. రాష్ట్ర చరిత్ర, గుర్తింపుతో అనుబంధం ఉన్న పేరునే పెట్టాలన్నది తమ ఉద్దేశమని బీజేపీ చెబుతోంది. అయితే ఈ ప్రకటనతో పాటు మరో ప్రశ్న కూడా వినిపిస్తోంది. పేరు మారితే ఊరు మారుతుందా? పేరు మార్చడం వల్ల ప్రజల జీవితాల్లో ఏం మారుతుంది?
పేర్ల మార్పు.. బీజేపీ పాలిత రాష్ట్రాల్లో ఇదే చర్చ
ఇది ఒక్క పశ్చిమ బెంగాల్‌తో ఆగిపోయే అంశం కాదు. బీజేపీ పాలిత రాష్ట్రాల్లో గత కొన్నేళ్లుగా పలు నగరాలు, పట్టణాలు, జిల్లాల పేర్లు మార్చారు. ఉత్తరప్రదేశ్‌లో అలహాబాద్ పేరును ప్రయాగ్‌రాజ్‌గా, ఫైజాబాద్ జిల్లాను అయోధ్యగా మార్చారు. మధ్యప్రదేశ్‌లో హోషంగాబాద్‌ను నర్మదాపురంగా మార్చారు. మహారాష్ట్రలో ఔరంగాబాద్‌కు ఛత్రపతి సంభాజీనగర్, ఉస్మానాబాద్‌కు ధారాశివ్ పేర్లు వచ్చాయి. హర్యానాలో గుర్గావ్ పేరు గురుగ్రామ్‌గా మారింది. కేంద్ర హోం మంత్రిత్వ శాఖ రికార్డుల్లోనూ పలు నగరాలు, పట్టణాల పేర్ల మార్పులకు సంబంధించిన వివరాలు కూడా ఉన్నాయి.
చరిత్రను మార్చడమా.. గుర్తింపును మార్చడమా?
ఈ పేర్ల మార్పుల వెనుక ప్రభుత్వాలు ప్రధానంగా చరిత్ర, సంస్కృతి, స్థానిక గుర్తింపు అంశాలను ముందుకు తెచ్చాయి. ముఖ్యంగా మొఘల్ లేదా వలస పాలనతో అనుసంధానమైన పేర్ల స్థానంలో స్థానిక చరిత్ర, భారతీయ వారసత్వంతో సంబంధం ఉన్న పేర్లను తీసుకురావాలనే వాదన వినిపించింది. బీజేపీకి ఇది కేవలం పేరు మార్పు కాదు.. చారిత్రక గుర్తింపును పునరుద్ధరించే ప్రయత్నమని ఆ పార్టీ నేతలు చెబుతున్నారు.
కానీ విమర్శకులు మాత్రం మరో ప్రశ్న వేస్తున్నారు. చరిత్రను గౌరవించడం మంచిదే. కానీ పేరు మార్చడమే ప్రభుత్వాల ప్రధాన ప్రాధాన్యతగా మారితే ప్రజల అసలు సమస్యల సంగతేంటి?
పేరు మారితే ఉద్యోగాలు వస్తాయా?
ఇక్కడే అసలు చర్చ మొదలవుతుంది. ఒక నగరం పేరు మారితే నిరుద్యోగ యువతకు ఉద్యోగాలు వస్తాయా? ఒక జిల్లా పేరు మారితే రైతు ఆదాయం పెరుగుతుందా? ఒక రాష్ట్రం పేరు మారితే ప్రభుత్వ ఆసుపత్రుల్లో వైద్యం మెరుగవుతుందా? పాఠశాలల్లో విద్యా ప్రమాణాలు పెరుగుతాయా? రోడ్లు, డ్రైనేజీ, తాగునీరు, ప్రజా రవాణా సమస్యలు పరిష్కారమవుతాయా?
పేరు మార్పు వీటికి నేరుగా పరిష్కారం కాదు. అదే సమయంలో ఒక ప్రాంతానికి చారిత్రక పేరు పెట్టడం వల్ల దాని గుర్తింపు బలపడవచ్చనే వాదనను కూడా పూర్తిగా కొట్టిపారేయలేం. అసలు ప్రశ్న ఏంటంటే.. పేరు మార్పుతో పాటు ప్రజల జీవితాలను మార్చే పాలన కూడా అదే స్థాయిలో కనిపిస్తుందా?
పశ్చిమ బెంగాల్‌పై మరోసారి రాజకీయ వేడి
ఇప్పుడు పశ్చిమ బెంగాల్ పేరు మార్పు అంశం మరోసారి తెరపైకి వచ్చింది. రాష్ట్రాన్ని పశ్చిమ బంగా పేరుతో పిలవాలని బీజేపీ రాష్ట్ర అధ్యక్షుడు సమిక్ భట్టాచార్య చెబుతున్నారు. బెంగాల్ విభజన చరిత్రను, రాష్ట్ర ప్రత్యేక గుర్తింపును ప్రతిబింబించే పేరు పశ్చిమ బంగా అని ఆయన వాదిస్తున్నారు. ఈ ప్రతిపాదనకు ముఖ్యమంత్రి సువేందు అధికారి కూడా మద్దతు తెలిపారు. అయితే పేరు అధికారికంగా మారాలంటే కేవలం రాష్ట్ర ప్రభుత్వం నిర్ణయం సరిపోదు. రాజ్యాంగంలోని ఆర్టికల్ 3 ప్రకారం పార్లమెంట్ చట్టం ద్వారా రాష్ట్రం పేరు మార్చాల్సి ఉంటుంది. కేంద్రంలో కూడా ఎన్డీయే అధికారంలో ఉంది కాబట్టి.. పేరు మార్చడం అంత కష్టమేమీ కాదనే వాదన వినిపిస్తోంది.
కొత్త డిమాండ్ కూడా కాదు...
పశ్చిమ బెంగాల్ పేరును మార్చాలనే చర్చ ఇప్పటిది కాదు. 1999లోనే జ్యోతి బసు నేతృత్వంలోని వామపక్ష ప్రభుత్వం పశ్చిమ బంగా పేరును ప్రతిపాదించింది. ఆ తర్వాత మమతా బెనర్జీ ప్రభుత్వం కూడా పేరుమార్పు కోసం ప్రయత్నించింది. 2018లో బంగ్లా అనే పేరును ప్రతిపాదిస్తూ శాసనసభలో తీర్మానం చేసింది. అయితే కేంద్రం ఆ ప్రతిపాదనను ఆమోదించలేదు. ఇప్పుడు బీజేపీ ప్రభుత్వం పశ్చిమ బంగా పేరుతో మరోసారి ఈ అంశాన్ని ముందుకు తీసుకొచ్చింది.
ప్రజలు ఏం కోరుకుంటున్నారు?
రాజకీయ పార్టీలు తమ చరిత్ర, సిద్ధాంతం, సాంస్కృతిక గుర్తింపుకు అనుగుణంగా పేర్లను మార్చుకోవచ్చు. కానీ ప్రజల అంచనాలు మాత్రం అంతకంటే పెద్దవి. వారికి ఉద్యోగాలు కావాలి. మంచి విద్య కావాలి. అందుబాటులో వైద్యం దొరకాలి. రైతుకు ఆదాయం కావాలి. వ్యాపారానికి అనుకూల వాతావరణం రావాలి. నగరాలకు మెరుగైన రోడ్లు, తాగునీరు, పారిశుధ్యం, ప్రజా రవాణా కావాలి.
అందుకే పేరు మార్పుపై చర్చ ఉండొచ్చు. చరిత్రపై వాదన ఉండొచ్చు. కానీ అసలు కొలమానం మాత్రం ఒక్కటే. పేరు మారిందా అనేది కాదు.. ప్రజల జీవితం మారిందా అనేదే.
బోర్డు మీద పేరు మారొచ్చు. ప్రభుత్వ పత్రాల్లో పేరు మారొచ్చు. మ్యాప్‌లో పేరు మారొచ్చు. కానీ ఆ పేరు మార్పుతో పాటు ప్రజల బతుకుల్లోనూ మార్పు కనిపించినప్పుడే దానికి నిజమైన అర్థం ఉంటుంది. అందుకే ఇప్పుడు దేశ రాజకీయాల్లో వినిపిస్తున్న అసలు ప్రశ్న ఇదే. పేరు మారితే ఊరు మారుతుందా? లేక పేరు మార్పే రాజకీయంగా పెద్ద అంశంగా మారుతుందా?
