ఇతరుల గుర్తింపు పత్రాలను వారి ప్రమేయం లేకుండా దుర్వినియోగం చేస్తూ సిమ్ కార్డులు పొందడం, ఐఎంఈఐ (IMEI) నంబర్లను అక్రమంగా మార్చడంపై కేంద్ర టెలికమ్యూనికేషన్ల శాఖ (DoT) అత్యంత కఠినమైన హెచ్చరికలు జారీ చేసింది. కొత్త టెలికమ్యూనికేషన్ల చట్టం-2023 ప్రకారం ఇలాంటి చర్యలను తీవ్రమైన నేరాలుగా (Cognizable and Non-bailable) పరిగణిస్తామని, నిందితులకు మూడేళ్ల వరకు జైలు శిక్షతో పాటు రూ.50లక్షల వరకు జరిమానా విధించే అవకాశముందని స్పష్టం చేసింది.
ఛత్తీస్గఢ్లో ఇటీవల వెలుగుచూసిన ఓ మోసం ఆధారంగా కేంద్రం ఈ నిర్ణయాన్ని వివరించింది. అక్కడ ఒక పాయింట్ ఆఫ్ సేల్ (PoS) ఏజెంట్ వినియోగదారులకు తెలియకుండా వారి గుర్తింపు పత్రాలతో 25 సిమ్ కార్డులను అక్రమంగా యాక్టివేట్ చేసినట్లు అధికారులు గుర్తించారు. దీనిని తీవ్రంగా పరిగణించిన డీఓటీ, సదరు ఏజెంట్ను శాశ్వతంగా బ్లాక్లిస్ట్లో పెట్టి అతడి షాప్ నుంచి కొత్త కనెక్షన్లు ఇవ్వకుండా నిషేధించింది.
ఇలా అక్రమంగా పొందిన 25 మొబైల్ నంబర్లను డిజిటల్ ఇంటెలిజెన్స్ ప్లాట్ఫామ్ (DIP) ద్వారా విశ్లేషించిన అధికారులు, సరైన రీ-వెరిఫికేషన్ ధ్రువీకరణ ఇవ్వని కనెక్షన్లను తక్షణమే డీయాక్టివేట్ చేశారు. సైబర్ నేరాలు, ఆన్లైన్ ఫ్రాడ్లలో సిమ్ కార్డుల దుర్వినియోగాన్ని అడ్డుకునేందుకు టెలికాం శాఖ ఈ కఠినమైన నిబంధనలను అమలు చేస్తోంది. సిమ్ కార్డులు పొందే సమయంలో పౌరులు అప్రమత్తంగా ఉండాలని, డిజిటల్ కేవైసీ (e-KYC) సమయంలో అనవసరమైన ప్రాసెస్ చేయవద్దని డీఓటీ సూచించింది. అలాగే తమ పేరిట ఎన్ని కనెక్షన్లు ఉన్నాయో తెలుసుకునేందుకు 'సంచార్ సాథీ' (Sanchar Saathi) పోర్టల్ను ఉపయోగించుకోవచ్చని స్పష్టం చేసింది.
అదేవిధంగా ఒకే వ్యక్తి పేరిట పరిమితికి మించి (సాధారణ వినియోగదారులకు గరిష్టంగా 9) సిమ్ కార్డులు ఉన్నట్లు గుర్తిస్తే, వాటిని సంచార్ సాథీ పోర్టల్ ద్వారా వెంటనే రిపోర్ట్ చేసి డీయాక్టివేట్ చేయించుకోవాలని డీఓటీ సూచించింది. మీ ప్రమేయం లేకుండా వేరొకరు మీ వివరాలతో సిమ్ తీసుకుంటే దానికి సంబంధించిన బాధ్యత లేదా సైబర్ నేరాల చిక్కులు ఎదుర్కోవాల్సి రావచ్చు కాబట్టి, ఎప్పటికప్పుడు రీ-వెరిఫికేషన్ చేసుకోవడం శ్రేయస్కరమని తెలిపింది. డిజిటల్ నేరాలను పూర్తిగా అరికట్టడమే లక్ష్యంగా టెలికాం ఆపరేటర్లు, పాయింట్ ఆఫ్ సేల్ (PoS) ఏజెంట్లపై కూడా ప్రత్యేక నిఘా ఉంచినట్లు, నిబంధనలు ఉల్లంఘిస్తే కఠిన చర్యలు తప్పవని హెచ్చరించింది.
