హైదరాబాద్లోని ఫిల్మ్నగర్ (జూబ్లీహిల్స్) పరిధిలో గురువారం అర్ధరాత్రి వేళ భారీ ప్రమాదం తప్పింది. అతివేగంగా దూసుకొచ్చిన ఓ లగ్జరీ కారు అదుపుతప్పి టాలీవుడ్ నటుడు ధర్మ మహేశ్ నివాసంలోకి దూసుకెళ్లింది. ఈ ఘటన స్థానికంగా తీవ్ర కలకలం రేపింది. కొందరు యువకులు మితిమీరిన మద్యం మత్తులో వాహనాన్ని నడపడమే ఈ ప్రమాదానికి ప్రధాన కారణమని తెలుస్తోంది.
పోలీసులు, స్థానికులు తెలిపిన వివరాల ప్రకారం.. కారులో ఉన్న యువకులు మద్యం మత్తులో ఫిల్మ్నగర్ రోడ్డుపై విపరీతమైన వేగంతో ప్రయాణించారు. ఈ క్రమంలో మలుపు వద్ద డ్రైవర్ వాహనంపై నియంత్రణ కోల్పోవడంతో, కారు రోడ్డు పక్కన ఉన్న డివైడర్ను దాటుకుంటూ నేరుగా నటుడు ధర్మ ఇంటి ప్రహారీ గోడను, గేటును బలంగా ఢీకొంటూ లోపలి ప్రాంగణంలోకి దూసుకెళ్లింది. ప్రమాద సమయంలో ఒక్కసారిగా భారీ శబ్దం రావడంతో ఇంట్లో ఉన్న కుటుంబ సభ్యులు, చుట్టుపక్కల వారు తీవ్ర భయాందోళనలతో బయటకు పరుగులు తీశారు.
ఈ ప్రమాదంలో ధర్మ ఇంటి గేటు, కాంపౌండ్ వాల్ ధ్వంసమయ్యాయి. అయితే, ఘటనా సమయంలో ఆ ప్రాంతంలో ఎవరూ లేకపోవడంతో ధర్మ కుటుంబ సభ్యులతో పాటు ఎవరికీ ఎలాంటి గాయాలు కాలేదు, తృటిలో ఒక పెద్ద ప్రమాదం తప్పినట్లయింది. ప్రమాదం జరిగిన వెంటనే సమాచారం అందుకున్న ఫిల్మ్నగర్ పోలీసులు ఘటనాస్థలికి చేరుకుని కారులోని యువకులను అదుపులోకి తీసుకున్నారు. వారికి బ్రీత్ అనలైజర్ పరీక్షలు నిర్వహించగా మద్యం సేవించినట్లు నిర్ధారణ కావడంతో, పోలీసులు కేసు నమోదు చేసి దర్యాప్తును ముమ్మరం చేశారు. ధర్మ మహేశ్ తెలుగులో డ్రింకర్ సాయి, సింధూరం సినిమాల్లో నటించాడు.
