దశాబ్ద కాలం తర్వాత కోర్టు ముందుకు రమ్య కేసు
ఆ చేదు జ్ఞాపకాన్ని ఇప్పటికీ జీర్ణించుకోలేకపోతున్నాం: తల్లి
ఐదుగురు సీఐలు మారారు.. శిక్ష మాత్రం పడలేదు: తండ్రి
నాడు పెను సంచలనం సృష్టించిన డ్రంక్ అండ్ డ్రైవ్ ప్రమాదం
నిందితులను కఠినంగా శిక్షించాలని డిమాండ్
మద్యం మత్తులో ఓ యువకుడు సృష్టించిన బీభత్సానికి తొమ్మిదేళ్ల చిన్నారితో పాటు ఆమె కుటుంబ సభ్యులు ప్రాణాలు కోల్పోయిన నగర చరిత్రలోనే అత్యంత విషాదకర ఘటన జరిగి పదేళ్లు పూర్తయింది. ఈ సుదీర్ఘ నిరీక్షణ తర్వాత ఎట్టకేలకు ఈ కేసు విచారణ (ట్రయల్) ఏడవ అదనపు మెట్రోపాలిటన్ సెషన్స్ కోర్టు ముందుకు వచ్చింది. 2016 జూలై 1న బంజారాహిల్స్లో జరిగిన ఈ రోడ్డు ప్రమాదం నాలుగు కుటుంబాల్లో తీరని శోకాన్ని నింపగా.. కోర్టు విచారణ ప్రారంభమైన సందర్భంగా రమ్య తల్లిదండ్రులు తమ పదేళ్ల సుదీర్ఘ వేదనను గుర్తుచేసుకుని కన్నీటిపర్యంతమయ్యారు.
ఈ సందర్భంగా రమ్య తల్లిదండ్రులు తమ పదేళ్ల సుదీర్ఘ వేదనను, న్యాయం కోసం వారు చేస్తున్న నిరీక్షణను గుర్తుచేసుకుని కన్నీటిపర్యంతమయ్యారు. రమ్యతో పాటు ఆమె తాత, బాబాయ్ ప్రాణాలు కోల్పోయిన ఘటన జరిగి పదేళ్లు పూర్తవుతున్నా ఇప్పటికీ ఆ కుటుంబానికి న్యాయం జరగలేదు. బాలిక తల్లి రమ్య ఈ సందర్భంగా మీడియాతో తన ఆవేదన వెల్లబోసుకుంది.
"2016 జూలై 1న జరిగిన ఆ దారుణాన్ని మేము ఇప్పటికీ జీర్ణించుకోలేకపోతున్నాం. ఈ పదేళ్ల సుదీర్ఘ కాలంలో ఎన్నో కష్టాలను, మానసిక క్షోభను అనుభవించాం. ఆ ఒక్క ప్రమాదం వల్ల మా కుటుంబంలో ముగ్గురిని కోల్పోయాం, మరో ఇద్దరు తీవ్రంగా గాయపడ్డారు. నాలుగు కుటుంబాలు రోడ్డున పడ్డాయి. నా చిన్న కూతురు ఒక మంచి అక్కను కోల్పోగా, నేను నా కూతురిని మిస్ అయ్యాను. ఆ లోటును ప్రతిక్షణం అనుభవిస్తూనే ఉన్నాం" అంటూ బాలిక తల్లి కన్నీటిపర్యంతమయ్యారు.
బాలిక తండ్రి వెంకట రమణ మాట్లాడుతూ.. "రమ్య ప్రమాదం జరిగి పదేళ్లు గడుస్తున్నా మాకు ఇంకా న్యాయం లభించలేదు. మన న్యాయ వ్యవస్థ ఇంత ఆలస్యంగా వ్యవహరించడం చాలా బాధాకరం. ఈ పదేళ్లలో బంజారాహిల్స్ పోలీస్ స్టేషన్లో ఐదుగురు సీఐలు, ఎంతోమంది దర్యాప్తు అధికారులు మారినప్పటికీ.. ఇప్పటివరకు ఒక్క నిందితుడికి కూడా శిక్ష పడలేదు. నిందితులపై ఎలాంటి కఠిన చర్యలు తీసుకోకపోవడంతో న్యాయం కోసం దశాబ్ద కాలంగా ఎదురుచూస్తూనే ఉన్నాం." అని వాపోయారు.
పదేళ్ల క్రితం హైదరాబాద్ నడిబొడ్డున జరిగిన ఈ దారుణమైన డ్రంక్ అండ్ డ్రైవ్ ప్రమాదం అప్పట్లో పెను సంచలనం సృష్టించింది. ఇప్పటికైనా కోర్టు విచారణ వేగవంతం చేసి, బాధిత కుటుంబానికి పూర్తి న్యాయం చేయాలని, నిందితులకు కఠిన శిక్ష పడేలా చూడాలని రమ్య తల్లిదండ్రులు డిమాండ్ చేస్తున్నారు.
