గతేడాది దేశవ్యాప్తంగా తీవ్ర దిగ్భ్రాంతిని కలిగించిన ఎయిర్ ఇండియా ఏఐ-171 విమాన ప్రమాద దర్యాప్తు వ్యవహారంలో కీలక పరిణామం చోటుచేసుకుంది. ఈ ఘోర దుర్ఘటనకు సంబంధించిన తుది దర్యాప్తు నివేదికను ఖరారు చేసే క్రమంలో తమ సాంకేతిక సూచనలను కూడా పరిగణనలోకి తీసుకోవాలని 'ఫెడరేషన్ ఆఫ్ ఇండియన్ పైలట్స్' (FIP) కేంద్ర ప్రభుత్వాన్ని కోరింది. ఈ నివేదిక సమీక్ష కోసం ప్రభుత్వం ఏదైనా స్వతంత్ర కమిటీని ఏర్పాటు చేస్తే, అందులో పైలట్ల సంఘానికి 'స్వతంత్ర సాంకేతిక భాగస్వామి'గా స్థానం కల్పించాలని విజ్ఞప్తి చేసింది.
ఈ మేరకు కేంద్ర పౌరవిమానయాన శాఖ మంత్రి కింజరాపు రామ్మోహన్ నాయుడికి ఎఫ్ఐపీ శనివారం అధికారికంగా ఒక లేఖ రాసింది. ప్రభుత్వం లేదా మంత్రిత్వ శాఖ ఈ ముసాయిదా నివేదికను ఒక స్వతంత్ర సాంకేతిక కమిటీతో సమీక్షించాలని యోచిస్తున్నట్లు తమకు సమాచారం ఉందని ఎఫ్ఐపీ ఆ లేఖలో పేర్కొంది. విమాన నిపుణులు, పైలట్ల వృత్తిపరమైన సమాజానికి ప్రాతినిధ్యం వహిస్తున్నందున ఈ రివ్యూ ప్రక్రియలో తమకు అధికారికంగా చోటు కల్పించాలని కోరింది. అయితే, ఈ లేఖపై పౌరవిమానయాన మంత్రిత్వ శాఖ లేదా ఎయిర్క్రాఫ్ట్ యాక్సిడెంట్ ఇన్వెస్టిగేషన్ బ్యూరో (AAIB) ఇప్పటివరకు అధికారికంగా స్పందించలేదు.
2025, జూన్ 12న అహ్మదాబాద్ నుంచి లండన్ గ్యాట్విక్కు బయలుదేరిన ఎయిర్ ఇండియాకు చెందిన బోయింగ్ 787-8 డ్రీమ్లైనర్ (VT-ANB) విమానం టేకాఫ్ అయిన కొద్దిసేపటికే అత్యంత దారుణంగా కుప్పకూలింది. ఈ భయంకర ప్రమాదంలో విమానంలో ఉన్న 241మంది ప్రయాణికులు, సిబ్బందితో పాటు, విమానం కూలిన ప్రదేశంలో నేలపై ఉన్న మరో 19 మందితో కలిపి మొత్తం 260 మంది ప్రాణాలు కోల్పోయారు. ఈ పెను విపత్తు నుంచి కేవలం ఒక్క ప్రయాణికుడు మాత్రమే ప్రాణాలతో బయటపడటం అందర్నీ ఆశ్చర్యానికి గురిచేసింది.
దర్యాప్తులో భాగంగా బోయింగ్ 787 విమానాల్లోని ఎలక్ట్రికల్ వ్యవస్థలోని లోపాలు, ఆధారాలను సమగ్రంగా విశ్లేషించాలని ఎఫ్ఐపీ ఇప్పటికే దర్యాప్తు సంస్థ ఏఏఐబీని కోరింది. ప్రస్తుతం ఈ ప్రమాద దర్యాప్తు చివరి దశకు చేరుకుందని, అంతర్జాతీయ నియమావళి ప్రకారం అన్ని సంప్రదింపులు ముగిసిన వెంటనే తుది నివేదికను బహిర్గతం చేస్తామని ఏఏఐబీ వెల్లడించింది. ఈ కీలక సమయంలో పైలట్ల సంఘం పౌరవిమానయాన మంత్రికి లేఖ రాయడం తీవ్ర ప్రాధాన్యత సంతరించుకుంది.
