మనం తినే కొన్ని రకాల ఆహారంలో ఉండే 'ప్యూరిన్స్' అనే కాంపౌండ్స్ను శరీరం జీర్ణం చేసుకునేటప్పుడు ఈ యూరిక్ యాసిడ్ తయారవుతుంది. సాధారణంగా ఇది రక్తం ద్వారా మూత్రపిండాలకు చేరి, మూత్రం ద్వారా బయటకు వెళ్ళిపోతుంది. కానీ, మనం మటన్ వంటి రెడ్ మీట్, సీఫుడ్, ఆల్కహాల్, కూల్డ్రింక్స్ ఎక్కువగా తీసుకున్నప్పుడు... లేదా కిడ్నీలు దీన్ని సరిగ్గా బయటకు పంపలేనప్పుడు రక్తంలో యూరిక్ యాసిడ్ స్థాయిలు పెరిగిపోతాయి.
అయితే శరీరంలో యూరిక్ యాసిడ్ ఎక్కువగా ఉండటం వల్ల కీళ్లలో అకస్మాత్తుగా నొప్పి, వాపు, ఎర్రబడటం వంటి సమస్యలు కనిపించవచ్చు. ముఖ్యంగా గౌట్ సమస్య ఉన్నవారు ఆహారం, నీరు, బరువు, జీవనశైలిపై ప్రత్యేక శ్రద్ధ పెట్టడం అవసరం. అయితే యూరిక్ యాసిడ్ను కేవలం ఆహారంతోనే పూర్తిగా నియంత్రించగలమని భావించడం సరైంది కాదు. అవసరాన్ని బట్టి వైద్య చికిత్స కూడా అవసరం కావచ్చు.
ముందుగా నీరు తగినంతగా తీసుకోవడం ముఖ్యం. శరీరంలో ద్రవాలు సరిపడా ఉంటే మూత్రం ద్వారా యూరిక్ యాసిడ్ బయటకు వెళ్లేందుకు సహాయపడుతుంది. అయితే కిడ్నీ లేదా గుండె సంబంధిత సమస్యలు ఉన్నవారు ఎంత నీరు తీసుకోవాలో అనే విషయంలో వైద్యుల సలహా తీసుకోవాలి.
ఆహారంలో మటన్, బీఫ్, పోర్క్ వంటి ఎర్ర మాంసాన్ని తగ్గించడం మంచిది. కాలేయం, కిడ్నీ, మెదడు వంటి ఆర్గన్ మీట్స్లో ప్యూరిన్ అధికంగా ఉంటుంది కాబట్టి వీటిని వీలైనంత వరకు నివారించాలి. సార్డిన్స్, ఆంచోవీస్, మాకెరెల్, కొన్ని షెల్ఫిష్ వంటి సీఫుడ్ను కూడా పరిమితంగా తీసుకోవాలని ఆరోగ్య నిపుణులు సూచిస్తున్నారు.
ఇక బీర్, ఇతర మద్యపానీయాలు, అలాగే చక్కెర, ఫ్రక్టోజ్ అధికంగా ఉండే శీతల పానీయాలను తగ్గించడం కూడా ముఖ్యమే. క్రాష్ డైటింగ్ లేదా చాలా వేగంగా బరువు తగ్గే ప్రయత్నాలు చేయకూడదు. అలాగే తక్కువ కొవ్వు ఉన్న పాలు, పెరుగు, గుడ్లు, అన్నం, రొట్టె, ఓట్స్, కూరగాయలు, పండ్లు, నట్స్ వంటి ఆహారాలను సమతుల్యంగా తీసుకోవచ్చు. పప్పులు, శనగలు, పెసలు వంటి మొక్కల ఆధారిత ప్రోటీన్ను యూరిక్ యాసిడ్ ఉందని పూర్తిగా మానేయాల్సిన అవసరం లేదు. పరిమిత మోతాదులో తీసుకోవచ్చు.
మొత్తంగా తాజా కూరగాయలు, పండ్లు, తక్కువ కొవ్వు పాల ఉత్పత్తులు, తగినంత నీరు, సమతుల్య ఆహారం యూరిక్ యాసిడ్ నియంత్రణలో సహాయపడతాయి. తరచుగా కీళ్ల నొప్పులు లేదా గౌట్ దాడులు వస్తుంటే మాత్రం స్వయంగా ఆహారం మార్చుకోవడం కంటే వైద్యులను సంప్రదించి యూరిక్ యాసిడ్ స్థాయి, కిడ్నీ పనితీరు, అవసరమైన చికిత్సను పరిశీలించుకోవడం చాలా ముఖ్యమని నిపుణులు చెబుతున్నారు..
ముఖ్య గమనిక: ఈ సమాచారం కేవలం మీ అవగాహన కోసం మాత్రమే. ఇది నిపుణుల లేదా వైద్యుల సూచనలకు ప్రత్యామ్నాయం కాదు. ఆరోగ్యానికి సంబంధించిన ఎలాంటి నిర్ణయాలైనా తీసుకునే ముందు ఖచ్చితంగా మీ డాక్టర్ను సంప్రదించాల్సిందిగా మనవి!..
