కూరగాయలు కొంటున్నారా.. లేక పురుగుమందులా? తెలంగాణలో షాకింగ్ రిపోర్ట్!

కూర‌గాయ‌ల్లో విషం

పురుగు మందుల అవ‌శేషాలతో డేంజ‌ర్

అనుమతించిన స్థాయిని మించి పెస్టిసైడ్స్

తెలంగాణ‌లో వెజ్.. పాయిజ‌న్

భ‌య‌పెడుతున్న లోక్‌స‌భ గ‌ణాంకాలు

మన ఇంట్లో ప్రతిరోజూ వండే కూరగాయలు.. మన ఆరోగ్యానికి మంచివని నమ్మి మార్కెట్‌ నుంచి తెచ్చుకుంటాం. టమాటా, వంకాయ, బెండకాయ, మిరపకాయ, పాలకూర.. ఏది కొన్నా ముందుగా చూసేది తాజాగా ఉందా? ధర ఎంత? అన్నదే. కానీ ఇకపై మరో ప్రశ్న కూడా అడగాల్సిన పరిస్థితి వచ్చింది. ఈ కూరగాయల్లో పురుగుమందుల అవశేషాలు ఎంత ఉన్నాయి? అవును ఇది న‌మ్మ‌లేని నిజం. కానీ న‌మ్మి తీరాల్సిందే.

తాజాగా లోక్‌సభలో వెల్లడైన గణాంకాలు ఆందోళన కలిగిస్తున్నాయి. 2023 నుంచి 2026 మధ్య దేశవ్యాప్తంగా 23 రాష్ట్రాలు, కేంద్ర పాలిత ప్రాంతాల్లో 70,652 పండ్లు, కూరగాయల నమూనాలను పరీక్షించారు. వీటిలో 2,223 నమూనాల్లో పురుగుమందుల అవశేషాలు FSSAI నిర్దేశించిన గరిష్ఠ పరిమితిని మించాయి. అంటే పరీక్షించిన ప్రతి 100 నమూనాల్లో సుమారు 3 నమూనాలు నిబంధనలకు మించి అవశేషాలను కలిగి ఉన్నట్లు డేటా చెబుతోంది.

వెజ్ పాయిజ‌న్‌లో తెలంగాణ నెంబ‌ర్ వ‌న్

ఇక్కడే తెలంగాణ పేరు మరింత ఆందోళన కలిగిస్తోంది. దేశంలో అత్యధిక సంఖ్యలో పరిమితికి మించిన నమూనాలు నమోదైన రాష్ట్రంగా తెలంగాణ నిలిచింది. రాష్ట్రంలో పరీక్షించిన 8,198 నమూనాల్లో 486 నమూనాలు అనుమతించిన పరిమితిని మించాయి. ఇది దాదాపు 5.9 శాతం. సంఖ్య పరంగా చూస్తే దేశంలోనే తెలంగాణ మొదటి స్థానంలో ఉంది.

అయితే ఇక్కడ ఒక ముఖ్యమైన విషయం గుర్తుంచుకోవాలి. కూరగాయల్లో పురుగుమందుల అవశేషాలు ఉన్నాయంటే ప్రతి కూరగాయ విషపూరితమని అర్థం కాదు. FSSAI ఒక్కో పురుగుమందు, ఒక్కో ఆహార పదార్థానికి వేర్వేరు ప్ర‌మాణాల‌ను నిర్ణయిస్తుంది. ఆ పరిమితిని దాటిన నమూనాలనే ఈ గణాంకాల్లో ఉల్లంఘనలుగా తేలుతాయి.

కానీ అసలు ప్రశ్న ఇక్కడే మొదలవుతుంది. మన మార్కెట్‌లోకి వచ్చే ప్రతి కూరగాయను పరీక్షిస్తున్నారా? పరీక్షించిన నమూనాల్లోనే పరిమితికి మించిన అవశేషాలు బయటపడుతున్నప్పుడు.. పరీక్షకు రాని కూరగాయల పరిస్థితి ఏమిటన్నది వినియోగదారుల్లో సహజంగానే ఆందోళన కలిగిస్తోంది.

రైతులు కూడా ఈ సమస్యలో ఒక కోణమే. పంటను పురుగుల నుంచి కాపాడుకోవడానికి పురుగుమందులు అవసరమవుతాయి. కానీ సరైన మోతాదు, సరైన మందు, సరైన సమయంలో వినియోగించడం చాలా కీలకం. మందు కొట్టిన వెంటనే పంటను మార్కెట్‌కు పంపించడం, మోతాదుకు మించి వినియోగించడం లేదా నిబంధనలకు విరుద్ధమైన పురుగుమందులు వాడటం జరిగితే దాని ప్రభావం రైతు పొలం దాటి నేరుగా వినియోగదారుడి ప్లేట్‌ వరకు చేరే ప్రమాదం ఉంటుంది.

మిగిలిన రాష్ట్రాల ప‌రిస్థితేంటి..?

ఇక మరో ఆసక్తికరమైన విషయం.. ఈ సమస్య తెలంగాణకే పరిమితం కాదు. దేశవ్యాప్తంగా 2,223 నమూనాలు పరిమితిని మించాయి. కర్ణాటకలో 334, మహారాష్ట్రలో 260, గుజరాత్‌లో 170 నమూనాలు నిబంధనలకు మించి ఉన్నట్లు గణాంకాలు చెబుతున్నాయి. ఆంధ్రప్రదేశ్‌లో పరీక్షించిన 2,104 నమూనాల్లో 134 నమూనాలు పరిమితిని మించాయి.

అంటే సమస్య ఒక రాష్ట్రానిదో.. ఒక మార్కెట్‌దో కాదు. మన ఆహార వ్యవస్థలోనే మరింత కఠినమైన తనిఖీలు అవసరమా? రైతులకు సరైన అవగాహన ఇవ్వాల్సిన అవసరం ఉందా? మార్కెట్‌ స్థాయిలో పరీక్షలు పెంచాలా? అన్న ప్రశ్నలు ఇప్పుడు క‌ల‌వ‌ర‌పెడుతున్నాయి.

మ‌న‌మేం చేయాలి...?

మరి వినియోగదారులు ఏం చేయాలి? భయపడి కూరగాయలు తినడం మానేయాల్సిన అవసరం లేదు. కూరగాయలు, పండ్లను శుభ్రమైన ప్రవహించే నీటితో బాగా కడగడం, ఆకుకూరలను శుభ్రంగా విడదీసి కడగడం వంటి సాధారణ జాగ్రత్తలు పాటించడం మంచిది. అయితే కడగడం వల్ల అన్ని రకాల పురుగుమందుల అవశేషాలు పూర్తిగా తొలగిపోతాయని మాత్రం భావించకూడదు.

మనం మార్కెట్‌లో కూరగాయల తాజాదనాన్ని చూస్తున్నాం.. కానీ వాటి భద్రతను ఎవరు చూస్తున్నారు? తెలంగాణలో బయటపడిన ఈ గణాంకాలు ఒక్కటే చెబుతున్నాయి. మన ప్లేట్‌లోకి వచ్చే ఆహారం విషయంలో నాణ్యత మాత్రమే కాదు.. సేఫ్టీ కూడా అంతే ముఖ్యం.