అగ్రరాజ్యం అమెరికా అధ్యక్షుడు డొనాల్డ్ ట్రంప్ మరోసారి అంతర్జాతీయ రాజకీయాల్లో తీవ్ర అలజడి సృష్టించే ప్రకటన చేశారు. పశ్చిమాసియాలో సుదీర్ఘకాలంగా కొనసాగుతున్న ఇరాన్-అమెరికా మిలిటరీ ఘర్షణల నేపథ్యంలో, ప్రపంచంలోనే అత్యంత కీలకమైన 'హర్మూజ్ జలసంధి' (Strait of Hormuz) ని అమెరికా భూభాగంగా ప్రకటిస్తానని ఆయన వ్యాఖ్యానించారు. న్యూయార్క్‌లోని గార్డెన్ సిటీలో నిర్వహించిన ఒక కార్యక్రమంలో మాట్లాడిన ట్రంప్, ఇరాన్‌పై అమెరికా పూర్తి విజయం సాధించిన వెంటనే ఈ వ్యూహాత్మక జలమార్గాన్ని యూఎస్ భూభాగంగా మారుస్తామని సంచలన వ్యాఖ్యలు చేశారు.
అయితే దీనికి ఉన్న అంతర్జాతీయ చట్టబద్ధత లేదా విధానపరమైన ప్రక్రియలపై ఆయన ఎలాంటి స్పష్టత ఇవ్వలేదు. ఇరాన్‌పై చేపట్టిన సైనిక చర్యల పురోగతిని వివరిస్తూ, అమెరికా దాడిలో ఇరాన్ రక్షణ వ్యవస్థలు పూర్తిగా కుప్పకూలాయని ట్రంప్ ప్రతిపాదించారు. తమ దాడుల దాటికి ఇరాన్‌కు చెందిన 159నౌకలు సముద్రంలో మునిగిపోగా, 212యుద్ధ విమానాలు ధ్వంసమయ్యాయని ఆయన వెల్లడించారు. ఇరాన్ వైమానిక దళంలోని కొన్ని విమానాలు గతంలో అమెరికా నుంచి కొనుగోలు చేసినవేనని కొనియాడిన ట్రంప్, ఆ దేశపు రాడార్, నిఘా, క్షిపణి తయారీ వ్యవస్థలు తీవ్రంగా దెబ్బతిన్నాయని తెలిపారు.
అదనంగా, వరుస దాడుల కారణంగా ఇరాన్ కీలక నాయకత్వం మరణించడంతో తమతో అధికారిక చర్చలు జరిపేందుకు అక్కడ సరైన ప్రతినిధులు లేకపోవడమే ప్రస్తుతం ప్రధాన సమస్యగా మారిందని పేర్కొన్నారు. ఇరాన్ ఎలాంటి పరిస్థితుల్లోనూ అణ్వస్త్రాన్ని తయారు చేయకుండా అడ్డుకోవడమే తమ ప్రధాన లక్ష్యమని, అందుకోసమే సైనిక శక్తిని అవసరానికి మించి ఉపయోగించాల్సి వచ్చిందని ట్రంప్ స్పష్టం చేశారు.
తమ మిలిటరీ చర్యల వల్ల ఇంధన సరఫరాలో స్వల్ప అంతరాయాలు ఏర్పడి సాధారణ ప్రజలపై ప్రభావం పడుతున్నప్పటికీ, ఒక ప్రమాదకరమైన దేశం చేతికి అణ్వస్త్రం వెళ్లకుండా నిరోధించడానికే ఈ నిర్ణయం తీసుకున్నట్లు ఆయన సమర్థించుకున్నారు.
గ్లోబల్ ఆయిల్, గ్యాస్ రవాణాలో ఐదో వంతు వాటా కలిగిన హర్మూజ్ జలసంధిపై అమెరికా సార్వభౌమాధికారం ప్రకటిస్తామనడం పట్ల ఇరాన్ తీవ్రంగా స్పందించింది. ఈ జలమార్గం ఇరాన్ భూభాగంలోనే ఉంటుందని, ఎలాంటి హెచ్చరికలకూ భయపడేది లేదని ఇరాన్ విదేశాంగ శాఖ తేల్చిచెప్పింది. ఈ పరిణామాలు గ్లోబల్ ఆయిల్ మార్కెట్లను, పశ్చిమాసియా ప్రాంతీయ భద్రతను మరింత సంక్షోభంలోకి నెట్టాయి.
