తెలంగాణ రాష్ట్రంలోని ప్రభుత్వ పాఠశాలల్లో చదువుతున్న విద్యార్థుల అల్పాహార పథకానికి సంబంధించి పాఠశాల విద్యాశాఖ కీలక ఆదేశాలు జారీ చేసింది. పాఠశాలలకు సరఫరా చేసే అల్పాహారం, పాలు పంపిణీ చేసిన తర్వాత, విద్యార్థులందరూ విధిగా ఉదయం 9:30 గంటల లోపే తమ టిఫిన్ తినడం, పాలు తాగే ప్రక్రియను పూర్తి చేయాలని స్పష్టం చేసింది. సమయపాలన పాటిస్తూ విద్యాబోధనకు ఎలాంటి అంతరాయం కలగకుండా చూసేందుకు ఈ నిర్ణయం తీసుకుంది.
సెంట్రలైజ్డ్ కిచెన్ల ద్వారా ఉదయం 6:30 గంటల నుంచి 8:45 గంటల మధ్య కాలంలోనే అల్పాహారాన్ని పాఠశాలలకు చేరవేయాలని విద్యాశాఖ అధికారులను ఆదేశించింది. ఈ పంపిణీ సమయ వేళలు కచ్చితంగా అమలయ్యేలా చూడాలని సంబంధిత సిబ్బందికి సూచించింది. ప్రభుత్వం ఎంతో ప్రతిష్టాత్మకంగా తలపెట్టిన ‘బ్రేక్ఫాస్ట్ విత్ మిల్క్’ పథకాన్ని ఈ ఏడాది అక్టోబర్ నెలాఖరు నాటికి రాష్ట్రవ్యాప్తంగా ఉన్న అన్ని ప్రభుత్వ పాఠశాలలకు విస్తరించాలని లక్ష్యంగా పెట్టుకుంది.
ఈ పథకం సమర్థవంతమైన నిర్వహణకు ప్రధానోపాధ్యాయులకు (HM) ప్రత్యేక బాధ్యతలు అప్పగించారు. మరుసటి రోజు ఎంతమంది విద్యార్థులకు అల్పాహారం అవసరమో ఆ వివరాలను హెచ్ఎంలు ప్రతిరోజూ మధ్యాహ్నం 12:00 గంటలలోపు ప్రత్యేక యాప్ లేదా వెబ్సైట్ ద్వారా ఇండెంట్ రూపంలో నమోదు చేయాల్సి ఉంటుంది. ఒకవేళ నిర్ణీత సమయం దాటితే సిస్టమ్ ఆటోమేటిక్గా ఇండెంట్ను లాక్ చేస్తుందని స్పష్టం చేసింది.
ఈ నూతన నిబంధనల ద్వారా ఆహారం వృథా కాకుండా చూడటంతో పాటు, విద్యార్థులకు వేడివేడిగా పోషకాహారాన్ని అందించవచ్చని విద్యాశాఖ భావిస్తోంది. అక్టోబర్ నాటికి పూర్తి స్థాయిలో అమలు చేసేందుకు పాఠశాల స్థాయి నుంచి జిల్లా స్థాయి అధికారుల వరకు కార్యాచరణను సిద్ధం చేశారు.
