BJP: దక్షిణాదిలో అధికార పీఠాన్ని దక్కించుకోవడమే లక్ష్యంగా పావులు కదుపుతున్న బీజేపీ అధిష్ఠానం, తెలంగాణ రాజకీయాల్లో సరికొత్త ప్రకంపనలకు తెరలేపింది. ఎన్నికల వ్యూహాలను అమలు చేయడంలో అపర చాణక్యుడిగా పేరుగాంచిన పార్టీ సీనియర్ నేత సునీల్ భన్సల్కు తెలంగాణ బీజేపీ పగ్గాలు అప్పగించడం వెనుక ఢిల్లీ పెద్దల భారీ వ్యూహం దాగి ఉందనే చర్చ స్టార్ట్ అయ్యింది. పశ్చిమ బెంగాల్లో దాదాపు ఉనికి లేని స్థితి నుంచి పార్టీని విజయతీరాలకు చేర్చి, సంచలన ఫలితాలు రాబట్టిన భన్సల్ అనుభవాన్ని ఇప్పుడు రాష్ట్ర రాజకీయాల్లో ఉపయోగించుకునేందుకు కమలనాథులు రెడీ అయ్యారు.
బెంగాల్ రిజల్ట్ రిపీట్ కావాల్సిందే
రాబోయే సార్వత్రిక ఎన్నికల్లో తెలంగాణలో ఎట్టి పరిస్థితుల్లోనూ కాషాయ జెండా ఎగరేయాలని బీజేపీ అగ్రనాయకత్వం పక్కాగా ఫిక్స్ అయింది. గతంలో పశ్చిమ బెంగాల్ ఎన్నికల్లో అధికార పార్టీకి చమటలు పట్టించి, గ్రౌండ్ లెవల్లో పార్టీ కేడర్ను ఎన్నికల యంత్రంలా మార్చడంలో సునీల్ భన్సల్ అనుసరించిన శైలి దేశవ్యాప్తంగా ప్రశంసలు అందుకుంది. సరిగ్గా అదే 'బెంగాల్ ఫార్ములా'ను తెలంగాణలోనూ రీక్రియేట్ చేయాలనే ఉద్దేశంతోనే ఆయన్ను రంగంలోకి దించినట్లు పార్టీ అంతర్గత వర్గాలు చెబుతున్నాయి.
భన్సల్ ముందున్న అసలైన అగ్నిపరీక్ష ఇదే..
తెలంగాణ రాజకీయం భిన్నమైన సామాజిక, ప్రాంతీయ సమీకరణాలతో కూడుకున్నది. ఈ నేపథ్యంలో కొత్త ఇన్ఛార్జి ఎదుట క్లిష్టమైన సవాళ్లు కనిపిస్తున్నాయి. పట్టణ ప్రాంతాలకే పరిమితం కాకుండా, ప్రతి పల్లెటూరిలోనూ హిందూత్వ భావజాలాన్ని ప్రజల్లోకి బలంగా తీసుకెళ్లడం ప్రస్తుతం ఆయన ముందున్న ప్రధాన బాధ్యత. అలాగే అధికార పార్టీ విధానాలు, లోపాలపై ప్రజల్లో పెరుగుతున్న అసంతృప్తిని క్షేత్రస్థాయి ఉద్యమాలుగా మలచి, దానిని ఎన్నికల ఓట్లుగా మార్చడం మరో పెద్ద టాస్క్. వీటితో పాటు రాష్ట్ర బీజేపీలో ఉన్న అంతర్గత విభేదాలను పరిష్కరించి, నాయకులందరినీ ఒకే తాటిపై నడిపించడం అత్యంత కీలకం.
కమల దళం కల నెరవేరుతుందా
ఎన్నికల ఇంజనీరింగ్లో సిద్ధహస్తుడైన సునీల్ భన్సల్ రాకతో రాష్ట్ర బీజేపీ శ్రేణుల్లో కొత్త ఉత్సాహం కనిపిస్తోంది. అయితే ప్రాంతీయ పార్టీల ప్రభావం, అధికార పక్ష వ్యూహాలు బలంగా ఉన్న తెలంగాణలో బెంగాల్ తరహా దూకుడు ఎంతవరకు ఫలితాన్ని ఇస్తుందన్నది ఆసక్తికరంగా మారింది. సంక్లిష్టమైన తెలంగాణ రాజకీయ చదరంగంలో సునీల్ భన్సల్ వేసే వ్యూహాత్మక ఎత్తులు పార్టీని అధికార పీఠం దిశగా నడిపిస్తాయా లేదా అనేది కాలమే తేల్చాలి.
