దేశంలో చెక్క‌ర నిల్వ‌లు లేవా..?
10 లక్షల ట‌న్నులు కొన‌డం వెనుక కార‌ణాలేంటి..?
ధరలు భారీగా పెరిగే అవ‌కాశ‌ముందా..?
పెట్రోల్‌లో ఇథనాల్ క‌ల‌ప‌డంతోనే సమస్య
దేశంలో ఒక్కసారిగా చెక్కెర ధరలపై చర్చ మొదలైంది. పండుగల సీజన్‌ దగ్గరపడుతున్న వేళ.. మార్కెట్‌లో సరఫరా ఒత్తిడి పెరగడం, చెరకు ఉత్పత్తిపై వాతావరణ ప్రభావం, మరోవైపు పెట్రోల్‌లో ఇథనాల్ కలపడానికి చెరకు ఆధారిత ముడిపదార్థాన్ని వినియోగించడం.. ఇవన్నీ కలిసి కొత్త ఆందోళనలకు కారణమవుతున్నాయి.
అందుకే కేంద్ర ప్రభుత్వం కీలక నిర్ణయం తీసుకుంది. దాదాపు దశాబ్దం తర్వాత దేశంలోకి చెక్కెరను దిగుమతి చేసుకునేందుకు మార్గం సుగమం చేసింది. కొద్ది గంట‌ల కింద‌ట కేంద్రం సంచ‌ల‌న ఆదేశాలు జారీ చేసింది. 10 లక్షల మెట్రిక్ టన్నుల ముడి చెక్కెరను అక్టోబర్ 31 వరకు సుంకం లేకుండా దిగుమతి చేసుకునేందుకు అనుమతించింది. సాధారణంగా చెక్కెర దిగుమతులపై 100 శాతం కస్టమ్స్ డ్యూటీ ఉంటుంది. దీంతో జ‌నాల్లో అనుమానాలు మొద‌ల‌య్యాయి. అసలు చెక్క‌ర దొరుకుతుందా లేదా అనే ఆందోళన నెల‌కొంది.
అసలు సమస్య ఎక్కడ మొదలైంది?
దేశంలో చెక్కెర కొరత ఏర్పడిందని కాదు.. కానీ సరఫరా-డిమాండ్ సమతుల్యతపై ఒత్తిడి మాత్రం స్పష్టంగా కనిపిస్తోంది. ఆగస్టులో కీలక మార్కెట్లలో చెక్కెర ధరలు వేగంగా పెరిగాయి. కొల్హాపూర్ వంటి ప్రధాన మార్కెట్లలో హోల్‌సేల్ ధరలు రికార్డు స్థాయికి చేరుకున్నాయి. రాబోయే నెలల్లో గణేష్ చతుర్థి, దసరా, దీపావళి వంటి పండుగల కారణంగా డిమాండ్ మరింత పెరిగే అవకాశం ఉంది. ఇదే సమయంలో మహారాష్ట్ర, కర్ణాటక వంటి ప్రధాన చెరకు ఉత్పత్తి ప్రాంతాల్లో వర్షపాతం, వాతావరణ పరిస్థితులు ఉత్పత్తిపై ప్రభావం చూపుతున్నాయి.
పెట్రోల్‌లో ఇథనాల్ కలపడం కూడా కార‌ణ‌మా?
ఇక్కడే అసలు రాజకీయ చర్చ మొదలైంది. కేంద్ర ప్రభుత్వం గత కొన్నేళ్లుగా పెట్రోల్‌లో ఇథనాల్ కలపడాన్ని వేగంగా పెంచింది. 2024-25 లో పెట్రోల్‌లో ఇథనాల్ సగటున 19.24 శాతం బ్లెండింగ్ సాధించగా, 2025-26లో 20 శాతం లక్ష్యాన్ని ప్రభుత్వం పెట్టుకుంది.
ఇథనాల్ తయారీలో చెరకు రసం, సిరప్, బీ-హెవీ మొలాసిస్ వంటి చెరకు ఆధారిత ముడిపదార్థాలను కూడా ఉపయోగిస్తున్నారు. ఫలితంగా కొంత చెక్కెరను తయారు చేయాల్సిన ముడిపదార్థం ఇథనాల్ వైపు మళ్లుతోంది. ప్రభుత్వ గణాంకాల ప్రకారం 2024-25 సీజన్‌లో సుమారు 34 లక్షల టన్నుల చెక్కెర సమాన పరిమాణం ఇథనాల్ తయారీకి మళ్లింది.
ఇక్కడే అసలు ప్రశ్న మొదలైంది. పెట్రోల్‌లో 20 శాతం ఇథనాల్ కలపాలనే లక్ష్యం.. భవిష్యత్తులో దేశీయ చెక్కెర సరఫరాపై ఒత్తిడి పెంచుతుందా? దీనిపై ర‌క‌ర‌కాల ఊహాగానాలు వినిపిస్తున్నాయి.
ప్రతిపక్షాల ఆరోపణ ఇదే!
ఇథనాల్ విధానంపై ప్రతిపక్షాలు ఇప్పటికే కేంద్రాన్ని టార్గెట్ చేస్తున్నాయి. ఆమ్ ఆద్మీ పార్టీ జాతీయ కన్వీనర్ అరవింద్ కేజ్రీవాల్ తాజాగా E20 విధానాన్ని ప్రస్తావిస్తూ.. చెరకు ఇథనాల్ ఉత్పత్తికి మళ్లించడం వల్ల చెక్కెర సరఫరా తగ్గి ధరలు పెరిగాయని ఆరోపించారు. పెట్రోల్‌లో ఇథనాల్ కలపడం వల్ల ఆహార వినియోగానికి సంబంధించిన ముడిపదార్థంపై ఒత్తిడి పెరుగుతోందన్నది ఆయన వాదన.
కేంద్రం ఏం చెబుతోంది?
కేంద్రం ఇథనాల్ విధానాన్ని సమర్థిస్తోంది. విదేశీ చమురు దిగుమతులపై ఆధారపడటాన్ని తగ్గించడం, రైతులకు అదనపు మార్కెట్ కల్పించడం, దేశ ఇంధన భద్రతను పెంచడం వంటి లక్ష్యాలతో ఇథనాల్ బ్లెండింగ్‌ను ప్రభుత్వం ముందుకు తీసుకెళ్తోంది. పెట్రోలియం మంత్రిత్వ శాఖ కూడా EBP కార్యక్రమం వల్ల ఇంధన భద్రత, రైతుల ఆదాయం, ఆహార భద్రత మధ్య సమతుల్యత సాధించడమే లక్ష్యమని చెబుతోంది.
అంతేకాదు.. ఇథనాల్ తయారీలో చెరకు మాత్రమే కాదు. మొక్కజొన్న, మిగులు బియ్యం, డ్యామేజ్డ్ ఫుడ్ గ్రెయిన్స్ వంటి ఇతర ముడిపదార్థాలను కూడా ఉపయోగించేందుకు ప్రభుత్వం ప్రోత్సహిస్తోంది.
దిగుమతి డ్యూటీ ఎందుకు తగ్గించింది?
ఇదే ఇప్పుడు అత్యంత కీలకమైన ప్రశ్న. సాధారణ పరిస్థితుల్లో దేశీయ చెరకు రైతులు, చక్కెర పరిశ్రమను రక్షించేందుకు దిగుమతి సుంకం ఎక్కువగా ఉంచుతారు. కేంద్ర ప్రభుత్వ అధికారిక సమాచారం ప్రకారం 2018లో చెక్కెర దిగుమతిపై కస్టమ్స్ డ్యూటీని 50 శాతం నుంచి 100 శాతానికి పెంచారు.
ఇప్పుడు అదే సుంకాన్ని తాత్కాలికంగా పక్కన పెట్టి 10 లక్షల టన్నుల ముడి చెక్కెరను డ్యూటీ లేకుండా దిగుమతి చేసుకునేందుకు అనుమతి ఇచ్చారు. దీని వెనుక ప్రధాన ఉద్దేశం దేశీయ మార్కెట్‌లో సరఫరాను పెంచి ధరల ఒత్తిడిని తగ్గించడం. అంటే కేంద్రం రైతులను రక్షించడానికి ఉపయోగించిన దిగుమతి రక్షణ కంటే.. ప్రస్తుతం వినియోగదారుల ధరలను నియంత్రించడం అత్యవసరంగా భావించినట్టు కనిపిస్తోంది. ఇది ఒక కీలక విధాన మార్పు.
చెరకు పంట సరిగ్గా పండడం లేదా?
చెక్కెర పరిశ్రమకు వాతావరణం పెద్ద సవాల్‌గా మారుతోంది. మహారాష్ట్ర, కర్ణాటక వంటి ప్రధాన చెరకు రాష్ట్రాల్లో వర్షపాతం పరిస్థితులు ఉత్పత్తి అంచనాలపై ప్రభావం చూపుతున్నాయి. అంతేకాదు.. ఉత్తరప్రదేశ్‌లో అధిక వర్షపాతం కూడా చెరకు దిగుబడిపై ప్రభావం చూపినట్టు తెలుస్తోంది.
ఒకవైపు వాతావరణ మార్పులు, మరోవైపు చెరకు వినియోగంలో మార్పులు, ఇంకోవైపు పండుగల సమయంలో పెరిగే డిమాండ్.. ఈ మూడు కలిసి మార్కెట్‌పై ఒత్తిడి పెంచుతున్నాయి.
హోర్డింగ్, కృత్రిమ కొరత, ఊహాజనిత ట్రేడింగ్‌ను అడ్డుకోవడానికి ఆగస్టు 1 నుంచి నవంబర్ 30 వరకు డీలర్లపై స్టాక్ హోల్డింగ్ పరిమితులు విధించింది. ఇటీవల పెరిగిన ఎక్స్-మిల్ ధరలు ప్రస్తుత డిమాండ్-సప్లై పరిస్థితులతో పూర్తిగా సరిపోలడం లేదని ప్రభుత్వం చెబుతోంది.
బల్క్ వినియోగదారుల నిల్వలపైనా సెప్టెంబర్ 1 నుంచి నవంబర్ 30 వరకు అదనపు పరిమితులు విధించనున్నారు. అంటే కేంద్రం ఒకేసారి రెండు వైపులా పనిచేస్తోంది. ఒకవైపు దిగుమతులు.. మరోవైపు నిల్వల నియంత్రణ.
ప్రజలు ఎందుకు అప్రమత్తంగా ఉండాలి?
చెక్కెర ధరలు పెరిగితే దాని ప్రభావం కేవలం టీ, కాఫీ వరకే పరిమితం కాదు. స్వీట్లు, బేకరీ ఉత్పత్తులు, శీతల పానీయాలు, హోటల్ ఆహారం, ప్యాకేజ్డ్ ఫుడ్స్ వంటి అనేక రంగాలపై ఖర్చు పెరిగే అవకాశం ఉంటుంది.
ముఖ్యంగా పండుగల సమయంలో డిమాండ్ పెరిగితే మార్కెట్‌లో ధరల ఒత్తిడి మరింత కనిపించవచ్చు. ప్రస్తుత పరిణామాలు ప్రధానంగా ధరలు పెరగడం, సరఫరా, భవిష్యత్ ఉత్పత్తిపై ఆందోళన చుట్టూనే ఉన్నాయి.
అసలు పరీక్ష కేంద్రానికే!
ఇథనాల్ బ్లెండింగ్ ద్వారా చమురు దిగుమతులపై ఆధారపడటాన్ని తగ్గించాలన్న కేంద్ర లక్ష్యం ఒక వైపు.. దేశీయ ఆహార వినియోగానికి అవసరమైన చెక్కెర అందుబాటులో ఉంచడం మరోవైపు. ఈ రెండింటి మధ్య సరైన సమతుల్యతే ఇప్పుడు అసలు పరీక్ష. అందుకే ప్రభుత్వం కూడా రాబోయే సీజన్‌లో చెరకు నుంచి ఇథనాల్‌కు మళ్లించే పరిమాణాన్ని పరిమితం చేసి, అవసరమైతే మొక్కజొన్న, బియ్యం వంటి ప్రత్యామ్నాయ ముడిపదార్థాల వినియోగాన్ని పెంచే అవకాశాలను పరిశీలిస్తోంది.
ప్ర‌స్తుతానికైతే ప్రజలు భయపడాల్సిన అవసరం లేదు. కానీ ధరల మార్పులను గమనించడం, కృత్రిమ కొరత సృష్టించే హోర్డింగ్‌ను గుర్తించడం, అధికారిక ధరలు-సరఫరా పరిస్థితులను పరిశీలించడం మాత్రం అవసరం. ఎందుకంటే.. ఈసారి ప్రశ్న కేవలం చెక్కెర ధర ఎంత? అనేది కాదు. మన ఆహారం కోసం ఎంత చెరకు.. మన ఇంధనం కోసం ఎంత చెరకు? అనేదే అసలు పెద్ద ప్రశ్న!
