హర్మూజ్ జలసంధి గుండా ప్రయాణించే సరుకు రవాణా నౌకలపై జరుగుతున్న దాడులకు సంబంధించిన ఓ భయానక వీడియో తాజాగా వెలుగులోకి వచ్చి తీవ్ర కలకలం రేపుతోంది. 2026 ఏప్రిల్ 22న 21 మంది భారతీయ నావికులతో ప్రయాణిస్తున్న పనామా జెండాతో కూడిన 'యూఫోరియా' అనే కంటైనర్ నౌకపై ఇరాన్‌కు చెందిన ఇస్లామిక్ రివల్యూషనరీ గార్డ్ కార్ప్స్ (IRGC) దళాలు దాడి చేసిన దృశ్యాలను ఫార్వర్డ్ సీమెన్స్ యూనియన్ ఆఫ్ ఇండియా (FSUI) విడుదల చేసింది.
వైరల్ అవుతున్న ఆ వీడియోలో ఐఆర్‌జీసీకి చెందిన స్పీడ్ బోట్లు నౌకను చుట్టుముట్టడం, రాకెట్ ప్రొపెల్డ్ గ్రెనేడ్ (RPG)తో దాడి చేయడం స్పష్టంగా కనిపిస్తోంది. ఈ దాడి సముద్రపు దొంగలు చేసింది కాదని, ఇరాన్ నౌకాదళ బలగాలే చేశాయని నావికుల సంఘం స్పష్టం చేసింది. దాడి సమయంలో భయాందోళనకు గురైన భారత నావికులు నౌకలోని ఇరుకైన మార్గాల్లో తలదాచుకున్నారు. అదృష్టవశాత్తూ ఈ ఘటనలో ఎవరికీ గాయాలు కాలేదని, సిబ్బంది అంతా సురక్షితంగా బయటపడ్డారని భారత షిప్పింగ్ మంత్రిత్వ శాఖ ధ్రువీకరించింది.
2026 ఫిబ్రవరిలో ఇరాన్‌తో అమెరికా-ఇజ్రాయెల్ వివాదం మొదలైనప్పటి నుంచి హర్మూజ్ జలసంధిలో వాణిజ్య నౌకలపై దాడులు పెరిగాయి. ఇటు ఇరాన్, అటు అమెరికా దళాలు పరస్పరం చేస్తున్న దాడుల వల్ల అంతర్జాతీయ వాణిజ్య నౌకాయానం తీవ్ర ప్రమాదంలో పడింది. ఐక్యరాజ్యసమితి అంచనాల ప్రకారం ఈ ఘర్షణలు ప్రారంభమైనప్పటి నుంచి సుమారు 15 మంది నావికులు ప్రాణాలు కోల్పోగా, వారిలో ఎక్కువమంది భారతీయులే ఉండటం తీవ్ర ఆందోళన కలిగిస్తోంది.
కేంద్రం తీవ్ర నిరసన.. భద్రతకు డిమాండ్
ప్రపంచవ్యాప్తంగా నౌకాయాన రంగంలో పనిచేస్తున్న నావికుల్లో దాదాపు 12 శాతానికి పైగా భారతీయులే ప్రాతినిధ్యం వహిస్తున్నారు. ఈ నేపథ్యంలో తమ పౌరుల ప్రాణాలకు ముప్పు కలగకుండా చర్యలు తీసుకోవాలని, అంతర్జాతీయ జలాల్లో దాడులను ఆపాలని భారత్ ఇప్పటికే ఇరాన్, అమెరికా దేశాల వద్ద తన తీవ్ర నిరసనను వ్యక్తం చేసింది. ఈ తాజా వీడియో వెలుగులోకి రావడంతో భారత నావికులకు నౌకాదళ భద్రతను మరింత కట్టుదిట్టం చేయాలని కార్మిక సంఘాలు డిమాండ్ చేస్తున్నాయి.
