ఓవైపు కాంగ్రెస్.. మరోవైపు సీజేపీ
పోటాపోటీ నిరసనలతో హోరెత్తుతున్న ఢిల్లీ
ఎవరు హిట్‌? ఎవరు ఫట్‌?
ఎన్నికల సంఘంపై కాంగ్రెస్, ఇండియా కూటమి పోరు.. వీధుల్లోకి సీజేపీ.. ధ్రువ్‌ రాఠీ ఎంట్రీతో రాజకీయ సమీకరణాలు ఒక్కసారిగా మారిపోయాయి. ఒకవైపు రాహుల్‌ గాంధీ నేతృత్వంలో కాంగ్రెస్, ఇండియా కూటమి.. మరోవైపు ఎన్నికల సంఘానికి వ్యతిరేకంగా సీజేపీ హల్ చల్ చేస్తున్నాయి. కేంద్ర ఎన్నికల ప్రధాన కమిషనర్‌ జ్ఞానేశ్‌ కుమార్‌ రాజీనామా చేయాలన్న డిమాండ్‌తో దేశ రాజకీయాలు హాట్ హాట్ గా మారాయి. ఎస్‌ఐఆర్‌.. ఇప్పుడు కేవలం ఎన్నికల సంఘానికి సంబంధించిన అంశంగా కనిపించడం లేదు. అది ప్రజాస్వామ్యం, ఓటు హక్కు, రాజకీయ విశ్వసనీయత చుట్టూ తిరుగుతున్న జాతీయ రాజకీయ పోరుగా మారింది.
ఇంతకాలం రాజకీయ నాయకుల విమర్శలకే పరిమితమైన ఈ వివాదంలోకి ఇప్పుడు యూట్యూబర్‌ ధ్రువ్‌ రాఠీ కూడా అడుగుపెట్టారు. బెంగళూరులో జరిగిన నిరసనలో పాల్గొనడం, అక్కడి నుంచి ఢిల్లీలో జరగనున్న ఆందోళనకు రావడం.. ఈ పరిణామాలు పోరుకు కొత్త కోణాన్ని తెచ్చాయి.
ఈ పోరులో ఎవరిది పైచేయి..?
ఈ వివాదంలో కాంగ్రెస్ ప్రధానంగా లేవనెత్తుతున్న ప్రశ్న ఒక్కటే.. ఓటర్ల జాబితాల్లో మార్పులు ఎలా జరుగుతున్నాయి? ఓటు హక్కుకు భంగం కలగకుండా ఎన్నికల సంఘం ఎలాంటి పారదర్శకత పాటిస్తోంది? ఈ ప్రశ్నలతోనే రాహుల్‌ గాంధీ, ప్రియాంక గాంధీ సహా ఇండియా కూటమి నేతలు నిరసనలకు దిగారు. ఎన్నికల ప్రధాన కమిషనర్‌ రాజీనామా చేయాలని, ఎస్‌ఐఆర్‌ ప్రక్రియపై సమాధానాలు చెప్పాలని డిమాండ్ చేస్తున్నారు. నిరసన ప్రదర్శనల్లో పోలీసులు అడ్డుకోవడం, నాయకులను అదుపులోకి తీసుకోవడం ఈ వివాదాన్ని మరింత రాజకీయంగా వేడెక్కించింది.
అయితే ఇక్కడే కాంగ్రెస్‌కు అసలు సవాల్‌ ఎదురవుతోంది. వీధుల్లో పోరాటం చేయడం ఒక ఎత్తు.. ఆ పోరాటాన్ని ప్రజల సమస్యగా మార్చడం మరో ఎత్తు. ఓటు హక్కుపై ఆందోళనను సామాన్య ఓటరుకు అర్థమయ్యేలా వివరించగలిగితే కాంగ్రెస్‌కు రాజకీయంగా లాభం కలగవచ్చు. కానీ ఈ ఉద్యమం కేవలం మోదీ ప్రభుత్వానికి వ్యతిరేకంగా చేసే రాజకీయ ప్రచారంలా కనిపిస్తే మాత్రం ఆశించిన ఫలితం దక్కకపోవచ్చు. రాహుల్‌ గాంధీకి ఇప్పుడు కావాల్సింది నిరసనలతో వచ్చిన ప్రచారం కాదు.. తన ఆరోపణలకు ప్రజల ముందు బలమైన ఆధారాలు చూపించడం.
సీజేపీ ఎంట్రీ.. ధ్రువ్‌ రాఠీతో కొత్త మలుపు
ఈ పోరులో ఆసక్తికరమైన పరిణామం సీజేపీ రంగప్రవేశం. ఆన్‌లైన్‌ వ్యంగ్య ఉద్యమంగా మొదలైన ఈ వేదిక, ప్రశ్నపత్రాల లీకేజీలపై నిరసనలతో గుర్తింపు తెచ్చుకుంది. ఇప్పుడు ఎన్నికల సంఘంపై పోరులోనూ ముందుకొచ్చింది. అక్టోబర్ 8న బెంగళూరులోని ఫ్రీడమ్‌ పార్క్‌లో జరిగిన నిరసనలో యూట్యూబర్‌ ధ్రువ్‌ రాఠీ, నటుడు ప్రకాశ్‌ రాజ్‌ పాల్గొన్నారు. ఢిల్లీలో జరగాల్సిన నిరసనకు ముందు ధ్రువ్‌ రాఠీని పోలీసులు అదుపులోకి తీసుకున్నారు.
ధ్రువ్‌ రాఠీకి సామాజిక మాధ్యమాల్లో ఉన్న గుర్తింపు ఈ ఉద్యమానికి అదనపు ప్రచారం తెచ్చిపెట్టే అవకాశం ఉంది. రాజకీయ నాయకుల ప్రసంగాలకే పరిమితం కాకుండా, యువతను ఆకర్షించే డిజిటల్‌ వేదికల ద్వారా కూడా ఈ వివాదం విస్తరిస్తోంది. ఇదే సీజేపీకి ఉన్న ప్రత్యేకత. ఇక్కడ మరో ప్రశ్న కూడా ఉంది. ధ్రువ్‌ రాఠీ నిరసనలో పాల్గొనడం వల్ల ఉద్యమం బలపడుతుందా? లేక ఆయన రాజకీయ వైఖరిపైనే చర్చ కేంద్రీకృతమవుతుందా చూడాలి.
ఎస్‌ఐఆర్‌ వివాదం ఎటు వెళ్తుంది..?
ఈ వివాదానికి రాజకీయ ప్రాధాన్యం ఎందుకు పెరిగిందో అర్థం చేసుకోవాలంటే ఓటర్ల జాబితాల్లో జరుగుతున్న మార్పులను చూడాలి. సర్.. ప్రక్రియలో దేశవ్యాప్తంగా సుమారు 13 కోట్ల పేర్లు తొలగించారనే వార్తలొస్తున్నాయి. వీటన్నింటినీ తిరిగి చేర్చాలనేది కాంగ్రెస్ డిమాండ్. సీజేపీ కూడా దాదాపు ఇదే డిమాండ్ ను వినిపిస్తోంది. ఇక సీఈసీ రాజీనామా చేయాలన్న డిమాండ్ విషయంలో ఇద్దరిదే ఒకే దారి.
ఇదే వివాదంలో అసలు తేలాల్సిన అంశం కూడా ఉంది. అర్హులైన ఓటర్ల పేర్లు పొరపాటున తొలగిపోయాయా? తొలగింపులకు సరైన విధివిధానాలు పాటించారా? అభ్యంతరాలు చెప్పేందుకు తగిన అవకాశం కల్పించారా? ఈ ప్రశ్నలకు స్పష్టమైన సమాధానాలు లభిస్తేనే ప్రజల్లో విశ్వాసం పెరుగుతుంది. ఎన్నికల సంఘం, బీజేపీ మాత్రం ఎన్నికల అక్రమాలకు సంబంధించిన ఆరోపణలను ఖండిస్తున్నాయి.
ఎవరు హిట్‌.. ఎవరు ఫట్‌?
కాంగ్రెస్ హిట్‌ కావాలంటే.. ఓటు హక్కు అంశాన్ని పార్టీ రాజకీయాలకు అతీతంగా ప్రజల్లోకి తీసుకెళ్లాలి. తొలగించినట్టు చెబుతున్న ఓటర్ల సమస్యలను ఆధారాలతో బయటపెట్టాలి. నిరసనలతోపాటు చట్టపరమైన, ప్రజాస్వామ్యపరమైన పోరాటాన్ని కొనసాగించాలి.
సీజేపీ హిట్‌ కావాలంటే.. యువతలో ఉన్న ఆగ్రహాన్ని దీర్ఘకాలిక ఉద్యమంగా మార్చాలి. ఒకటి రెండు నిరసనలతో ఆగిపోకుండా, ఓటర్ల సమస్యలపై నిరంతరంగా పనిచేయాలి. డిజిటల్‌ ప్రచారాన్ని క్షేత్రస్థాయి పోరాటంతో అనుసంధానించాలి.
బీజేపీకి సవాల్‌ ఏంటి..?
ఈ ఆరోపణలను కేవలం ప్రతిపక్ష రాజకీయాలుగా కొట్టిపారేయడం సరిపోదు. ఓటర్ల జాబితాల సవరణలో పారదర్శకత, అర్హులైన ఓటర్ల హక్కుల రక్షణపై ప్రజలకు నమ్మకం కలిగించాల్సి ఉంటుంది.
చివరికి విజేత ఎవరు?
ప్రస్తుతం కాంగ్రెస్, ఇండియా కూటమి నిరసనలతో రాజకీయ అంశాన్ని జాతీయ చర్చలో నిలబెట్టాయి. సీజేపీ యువతను ఆకర్షించే ప్రయత్నం చేస్తోంది. ధ్రువ్‌ రాఠీ పాల్గొనడంతో ఈ పోరుకు డిజిటల్‌ ప్రచారం కూడా జతైంది. కానీ ఇవన్నీ ఇప్పటివరకు రాజకీయ దృష్టిని ఆకర్షించిన పరిణామాలు మాత్రమే.
నిరసనలకు వచ్చిన జనసందోహం ఒక కొలమానం.. సామాజిక మాధ్యమాల్లో వచ్చిన స్పందన మరో పేరామీటర్. కానీ ఓటర్లకు కలిగిన సందేహాలకు సమాధానాలు దొరికాయా? అర్హులైన ఓటర్ల హక్కుల రక్షించారా అన్నదే అసలు విజయానికి కొలమానం. ఎన్నికల సంఘంపై ఒత్తిడి పెంచడంలో ఎవరు ముందుంటారన్నది ఒక ప్రశ్న. ప్రజల్లో విశ్వాసం పెంచడంలో ఎవరు ముందుంటారన్నది అసలు ప్రశ్న. ఆ సమాధానమే ఈ రాజకీయ పోరులో ఎవరు హిట్‌.. ఎవరు ఫట్‌ అన్నది నిర్ణయిస్తుంది.
