ప్రజాస్వామ్యంలో పాలకుల కంటే ప్రజలే బలవంతులని, ముఖ్యంగా విద్యార్థి లోకం తిరగబడితే ఎంతటి బలమైన నియంతలైనా తలవంచక తప్పదని సెర్బియా ఎన్నికల ఫలితాలు మరోసారి చాటిచెప్పాయి. గత 14 ఏళ్లుగా దేశాన్ని తన కనుసన్నల్లో శాసిస్తూ, రష్యా అధ్యక్షుడు వ్లాదిమిర్ పుతిన్ అండదండలతో తిరుగులేని నేతగా వెలుగొందిన అలెగ్జాండర్ ఉసిక్‌ను ఆ దేశ యువత మట్టికరిపించింది. రెండేళ్ల పాటు ఏమాత్రం వెరవకుండా విద్యార్థులు నడిపిన ప్రజా ఉద్యమం ముందు అధికార పక్షం చివరకు చేతులెత్తేసింది. ఫలితాలు వెలువడగానే ఓటమిని అంగీకరించిన ఉసిక్, గద్దె దిగక తప్పలేదు. ఈ సంచలన విజయంతో రాజధాని బెల్‌గ్రేడ్‌తో పాటు ప్రధాన నగరాలన్నీ యువత సంబరాలతో హోరెత్తిపోతున్నాయి. స్వాతంత్ర్యం, స్వేచ్ఛను పునరుద్ధరించుకున్నామంటూ ప్రజలు వేలాదిగా వీధుల్లోకి వచ్చి సంబరాలు చేసుకుంటున్నారు.
ఆ ప్రమాదమే పునాదులను కదిలించిందా
నిజానికి రాజకీయ ప్రత్యర్థులెవరూ గత దశాబ్దన్నర కాలంలో ఉసిక్ అధికారాన్ని ఈ స్థాయిలో సవాలు చేయలేకపోయారు. కానీ 2024లో నోవిసాడ్ రైల్వే స్టేషన్‌లో కాంక్రీట్ పైకప్పు కూలి 16 మంది అమాయకులు ప్రాణాలు కోల్పోయిన దుర్ఘటన దేశంలో పెనుమార్పునకు బీజం వేసిందని చెబుతున్నారు. ఆ స్టేషన్ ఆధునీకరణ పనుల్లో జరిగిన భారీ అవినీతే ఆ ప్రాణాలను బలితీసుకుందని ఆగ్రహించిన యూనివర్సిటీ విద్యార్థులు రోడ్లపైకి వచ్చారు. బాధితులకు న్యాయం జరగాలని, దోషులను కఠినంగా శిక్షించాలని మొదలైన ఈ విద్యార్థి గళం క్రమంగా దేశవ్యాప్త ప్రజాస్వామ్య పోరాటంగా రూపాంతరం చెందింది.
సైకిళ్లపై గ్రామాలకు వెళ్లి ప్రచారం
విశ్వవిద్యాలయాల్లో మొదలైన ఈ ఉద్యమం కేవలం ధర్నాలకే పరిమితం కాలేదు. రాజకీయంగా బరిలోకి దిగిన విద్యార్థి కూటమి (స్టూడెంట్స్ లిస్ట్) అద్భుత వ్యూహాన్ని అమలు చేసింది. తమ ప్యానెల్ తరఫున కేవలం యువతనే కాకుండా రంగాలవారీ నిపుణులు, క్రీడాకారులు, రైతులు, కళాకారులను అభ్యర్థులుగా నిలబెట్టింది. ప్రభుత్వ అనుకూల మీడియా ఎంతగా బురదజల్లినా వెరవకుండా, సైకిళ్లపై ఊరూరా తిరుగుతూ ప్రజల్లో చైతన్యం నింపారు. ఆర్థిక వ్యవస్థ పునర్నిర్మాణం, ప్రజాస్వామ్య పునరుద్ధరణే లక్ష్యంగా వీరు సాగించిన నిబద్ధత ఓటర్ల మనసు గెలుచుకుంది.
ఎన్నికల్లో ఎదురులేని ఆధిక్యం..
మొత్తం 250 పార్లమెంట్ స్థానాలున్న సెర్బియాలో దాదాపు 70 శాతం భారీ పోలింగ్ నమోదైంది. 6.4 మిలియన్ల ఓటర్లలో రికార్డు స్థాయిలో స్పందన వచ్చింది. విద్యార్థుల ప్యానెల్‌కు ఏకంగా 2.2 మిలియన్ల ఓట్లు పోలవగా, అధికార పార్టీ కేవలం 1.7 మిలియన్ల ఓట్లతో సరిపెట్టుకుంది. స్టూడెంట్స్ లిస్ట్ 135 నుంచి 140 స్థానాలను కైవసం చేసుకుని స్పష్టమైన మెజారిటీ దిశగా దూసుకెళ్లగా, అధికార పక్షం 105 సీట్లకే పరిమితమైంది. గతంలో హంగేరీలో విక్టర్ ఓర్బన్‌కు యువత గట్టి గుణపాఠం చెప్పిన తరహాలోనే, సెర్బియాలో విద్యార్థులు సృష్టించిన ఈ విప్లవం యూరప్ ఖండం మొత్తాన్ని ఆశ్చర్యపరిచింది. ఈ చారిత్రక పరిణామంపై యూరోపియన్ యూనియన్ సైతం హర్షం వ్యక్తం చేస్తూ విద్యార్థుల విజయానికి శుభాకాంక్షలు తెలిపింది.
