జీవితంలో వైద్యురాలిగా ఉన్నత స్థానానికి చేరుకోవాలని ఎన్నో ఆశలతో కష్టపడి చదువుకుంటున్న ఓ మెడికో జీవితం.. ఇద్దరు యువకుల మద్యం మత్తు, నిర్లక్ష్యానికి బలైంది. రాజమహేంద్రవరం సమీపంలోని రాజానగరంలో జరిగిన దారుణ ఘటనలో తీవ్రంగా గాయపడిన పీజీ వైద్య విద్యార్థిని డాక్టర్ ప్రియాంక.. ఐదు రోజుల పాటు మృత్యువుతో పోరాడి కన్నుమూశారు.
జీఎస్ఎల్ వైద్య కళాశాలలో డెర్మటాలజీ విభాగంలో పీజీ చదువుతున్న ప్రియాంకపై.. దిశ్వంత్, ఆండ్రూ జోసెఫ్ అనే ఇద్దరు యువకులు కారుతో పలుమార్లు ఢీకొట్టినట్లు ఆరోపణలు ఉన్నాయి. అంతేకాదు.. ప్రియాంక తలపై నుంచి కారు పోనిచ్చిన ఘటన తీవ్ర కలకలం రేపింది. తీవ్ర గాయాలతో ఆమెను హైదరాబాద్లోని కిమ్స్ ఆస్పత్రికి తరలించి చికిత్స అందించినప్పటికీ.. శుక్రవారం ప్రియాంక తుదిశ్వాస విడిచారు.
ఈ ఘటనకు సంబంధించిన దృశ్యాలు, వివరాలు ఆలస్యంగా వెలుగులోకి రావడంతో ప్రజల్లో తీవ్ర ఆగ్రహం వ్యక్తమవుతోంది. నిందితులను కఠినంగా శిక్షించాలని, ఇలాంటి ఘటనలు మరోసారి జరగకుండా చట్టపరంగా కఠిన చర్యలు తీసుకోవాలని ప్రజలు డిమాండ్ చేస్తున్నారు. పోలీసుల వ్యవహారశైలిపైనా విమర్శలు వెల్లువెత్తుతున్నాయి. ఘటన జరిగిన వెంటనే పూర్తి వివరాలు ఎందుకు బయటకు రాలేదంటూ స్థానికులు ప్రశ్నిస్తున్నారు.
ఇక నిందితులు ఇద్దరూ బీటెక్ చదివినవారిగా తెలుస్తోంది. వారిపై కేసు నమోదు చేసిన పోలీసులు అరెస్టు చేసి కోర్టులో హాజరుపరిచారు. కోర్టు ఈ నెల 22 వరకు రిమాండ్ విధించడంతో వారిని రాజమహేంద్రవరం సెంట్రల్ జైలుకు తరలించారు. మరోవైపు ప్రియాంకకు న్యాయం చేయాలంటూ రాజమహేంద్రవరంలో వైద్య విద్యార్థులు ర్యాలీలు నిర్వహించారు. నిందితులకు కఠిన శిక్ష పడే వరకు పోరాటం కొనసాగిస్తామని స్పష్టం చేశారు.
మరోవైపు సోషల్ మీడియాలో సైతం ఈ ఘటనపై తీవ్ర ఆగ్రహం వ్యక్తమవుతోంది. ఇక డాక్టర్ ప్రియాంక మృతిపై ముఖ్యమంత్రి చంద్రబాబు నాయుడు తీవ్ర దిగ్భ్రాంతి వ్యక్తం చేశారు. నిందితులపై కఠిన చర్యలు తీసుకోవాలని అధికారులను ఆదేశించారు. ఎట్టి పరిస్థితుల్లోనూ ఉపేక్షించవద్దని, బాధితులకు మెరుగైన వైద్యం అందించాలని సూచించారు. ఈ ఘటనలో మరో బాధితుడు ఉమేష్ ఆరోగ్య పరిస్థితిపైనా సీఎం ఆరా తీశారు.
ఒక వైద్య విద్యార్థిని ప్రాణాలను బలిగొన్న ఈ ఘటన.. మద్యం మత్తు, రోడ్డు భద్రత, చట్టంపై భయం లేకుండా వ్యవహరించే ధోరణిపై మరోసారి తీవ్ర ప్రశ్నలు లేవనెత్తుతోంది. ప్రియాంక కుటుంబానికి న్యాయం జరగడంతో పాటు.. దోషులకు చట్టప్రకారం కఠిన శిక్ష పడాలని ప్రజలు కోరుతున్నారు.
