అయోధ్య రామమందిరానికి వచ్చిన విరాళాల దుర్వినియోగం వ్యవహారం దేశ రాజకీయాల్లో సరికొత్త రగడకు కారణమవుతోంది. ఈ నిధుల గోల్మాల్పై నిష్పక్షపాతంగా స్వతంత్ర దర్యాప్తు జరిపించాలని కోరుతూ లోక్సభ ప్రతిపక్ష నేత రాహుల్ గాంధీ, కాంగ్రెస్ జాతీయ అధ్యక్షుడు మల్లికార్జున ఖర్గేలు సంయుక్తంగా ప్రధానమంత్రి నరేంద్ర మోదీకి ఓ లేఖ రాశారు. దేశవ్యాప్తంగా ఉన్న కోట్లాది మంది రామభక్తులు సమర్పించిన నగదు, వెండి, బంగారు కానుకలకు సంబంధించిన పూర్తి వివరాలను ప్రభుత్వం బహిరంగపర్చాలని వారు ఆ లేఖలో స్పష్టం చేశారు.
శ్రీరామజన్మభూమి తీర్థక్షేత్ర ట్రస్ట్కు అందిన వేల కోట్ల రూపాయల విరాళాల వినియోగంపై వస్తున్న ఆరోపణలు తీవ్ర ఆందోళన కలిగిస్తున్నాయని కాంగ్రెస్ అగ్రనేతలు పేర్కొన్నారు. భక్తులు ఎంతో నమ్మకంతో, పవిత్ర భావనతో సమర్పించిన కానుకల విషయంలో ఇలాంటి అవకతవకలు జరగడం దారుణమన్నారు. ఈ వివాదం వల్ల సామాన్య భక్తుల్లో మోసపోయామనే భావన వ్యక్తమవుతోందని, ఈ కీలక తరుణంలో దేశ ప్రధాని మౌనంగా ఉండటం ఎంతమాత్రం సరికాదని హితవు పలికారు.
సుప్రీంకోర్టు తీర్పునకు అనుగుణంగా కేంద్ర ప్రభుత్వమే పార్లమెంట్లో ఈ ట్రస్ట్ ఏర్పాటును ప్రకటించిన విషయాన్ని లేఖలో గుర్తుచేశారు. ఈ బోర్డులోని సభ్యుల నియామకాలన్నీ కేంద్రం పర్యవేక్షణలోనే జరిగాయని, అందులోని పలువురికి ఆర్ఎస్ఎస్, విశ్వహిందూ పరిషత్లతో ప్రత్యక్ష సంబంధాలు ఉన్నాయని ఆరోపించారు. చివరికి ట్రస్ట్ మాజీ ప్రధాన కార్యదర్శి కూడా ప్రధానికి అత్యంత సన్నిహితుడేనని చెబుతూ.. ఈ అక్రమాలపై సమగ్ర విచారణ జరిపించి బాధ్యుల హోదాలతో నిమిత్తం లేకుండా కఠిన చర్యలు తీసుకోవాలని కోరారు.
మందిరానికి వచ్చిన విరాళాలలో సుమారు రూ.7 కోట్ల విలువైన నగదు, ఆభరణాలు పక్కదారి పట్టినట్లు ప్రాథమికంగా వెలుగుచూడటంతో ఈ వివాదం ముదిరింది. దీనిపై ఇప్పటికే ఉత్తరప్రదేశ్ ప్రభుత్వం ప్రత్యేక దర్యాప్తు బృందాన్ని (SIT) రంగంలోకి దించింది. ఈ బృందం ఆలయ ఖాతాలను, విరాళాల లెక్కింపు కేంద్రాలను నిశితంగా పరిశీలిస్తోంది. అటు దేశ అత్యున్నత న్యాయస్థానం సుప్రీంకోర్టు సైతం ఈ దర్యాప్తు పురోగతిపై నివేదిక ఇవ్వాలని ఆదేశించడంతో యంత్రాంగం అలర్ట్ అయింది. ఈ వ్యవహారంలో ఇప్పటివరకు బ్యాంక్ సిబ్బందితో పాటు ఆలయ ఉద్యోగులు, ట్రస్ట్ అనుబంధ వ్యక్తులు సహా మొత్తం ఎనిమిది మందిని పోలీసులు అరెస్ట్ చేశారు.
