తెలంగాణలో ప్రభుత్వ వైద్య రంగాన్ని మరింత పటిష్టం చేసి, సామాన్య ప్రజలకు అత్యాధునిక సూపర్ స్పెషాలిటీ చికిత్సలను ఉచితంగా అందుబాటులోకి తీసుకురావడమే లక్ష్యంగా ప్రభుత్వం ప్రతిష్టాత్మక ప్రాజెక్టులను వేగవంతం చేసింది. హైదరాబాద్‌లోని ప్రతిష్టాత్మక నిమ్స్ విస్తరణ పనులతో పాటు గోషామహల్‌లో నిర్మిస్తున్న నూతన ఉస్మానియా జనరల్ ఆస్పత్రి భవన నిర్మాణ పురోగతిపై రాష్ట్ర వైద్య ఆరోగ్య శాఖ మంత్రి దామోదర రాజనర్సింహ ఉన్నతస్థాయి సమీక్ష నిర్వహించారు.
డాక్టర్ బీఆర్ అంబేడ్కర్ తెలంగాణ సచివాలయంలో జరిగిన ఈ సమావేశంలో ఆరోగ్య శాఖ ప్రిన్సిపల్ సెక్రటరీ క్రిస్టినా జడ్ చొంగ్తు, హైదరాబాద్ కలెక్టర్ ప్రియాంక అల, టీజీఎమ్‌ఎస్‌ఐడీసీ ఎండీ గౌరవ్ ఉప్పల్, మెడికల్ ఎడ్యుకేషన్ డైరెక్టర్ డాక్టర్ వాణి తదితరులు పాల్గొన్నారు. ఈ సందర్భంగా ఆసుపత్రుల నిర్మాణ ప్రగతిని అధికారులు మంత్రికి వివరించారు. నిమ్స్ విస్తరణ ప్రాజెక్టులో భాగంగా చేపట్టిన నూతన భవనాల నిర్మాణాలు ఇప్పటికే 80 శాతం మేర పూర్తయ్యాయని అధికారులు వెల్లడించారు.
కాగా, గోషామహల్ మైదానంలో అత్యంత ప్రతిష్టాత్మకంగా నిర్మిస్తున్న నయా ఉస్మానియా ఆసుపత్రి ప్రాజెక్టు పనులు ఇప్పటివరకు 23శాతం పూర్తయినట్లు తెలిపారు. ఈ రెండు భారీ హెల్త్‌కేర్ ప్రాజెక్టులను నిర్దేశిత గడువులోగా పూర్తి చేసేందుకు వీలుగా అన్ని విభాగాల అధికారులు సమన్వయంతో పనిచేయాలని మంత్రి ఆదేశించారు. ఆస్పత్రుల నిర్మాణంలో ఎట్టిపరిస్థితుల్లోనూ నాణ్యతా ప్రమాణాల విషయంలో రాజీపడేది లేదని మంత్రి స్పష్టం చేశారు. గ్రామీణ ప్రాంతాల నుంచి వచ్చే నిరుపేద రోగులకు మెరుగైన వైద్య సేవలు అందించడమే తమ ప్రభుత్వ ప్రాధాన్యత అని పేర్కొన్నారు.
రాబోయే రోజుల్లో హైదరాబాద్ నగరం ప్రపంచ స్థాయి ప్రభుత్వ వైద్య కేంద్రంగా నిలవబోతోందని, ఈ రెండు ఆసుపత్రుల విస్తరణ పూర్తయితే వేలాది అదనపు బెడ్లు అందుబాటులోకి రావడంతో పాటు ఆధునిక ఆపరేషన్ థియేటర్లు, ల్యాబ్‌లు ప్రజలకు ఉపయోగపడతాయని వివరించారు. నిర్మాణ పనుల్లో ఎలాంటి జాప్యం జరగకుండా ఎప్పటికప్పుడు ఎదురయ్యే సాంకేతిక, పరిపాలనాపరమైన అడ్డంకులను పరిష్కరించాలని అధికారులకు మార్గదర్శకాలు జారీ చేశారు. ప్రాజెక్టుల పురోగతిని తాను నిరంతరం వ్యక్తిగతంగా పర్యవేక్షిస్తానని మంత్రి దామోదర రాజనర్సింహ స్పష్టం చేశారు.
