జైలు జీవితం అంటే కేవలం నాలుగు గోడల మధ్య శిక్ష అనుభవించడం మాత్రమే కాదని, పట్టుదల ఉంటే భవిష్యత్తును బంగారు బాటగా మార్చుకోవచ్చని పది మంది ఖైదీలు నిరూపించారు. కటకటాల వెనుక ఉంటూనే ఉన్నత చదువులపై దృష్టి పెట్టి విజయవంతంగా పీజీ పట్టాలు సాధించారు. హైదరాబాద్‌లోని డాక్టర్ బీఆర్ అంబేడ్కర్ సార్వత్రిక విశ్వవిద్యాలయం (BRAOU) 27వ స్నాతకోత్సవంలో తెలంగాణ గవర్నర్ చేతుల మీదుగా డిగ్రీ పట్టాలు అందుకుని అందరికీ ఆదర్శంగా నిలిచారు.
పీజీ సాధించిన ఈ పది మంది ఖైదీలలో ఎనిమిది మంది ఎంఎస్సీ సైకాలజీ (M.Sc. Psychology), మరో ఇద్దరు ఎంఏ సోషియాలజీ (M.A. Sociology) కోర్సులను పూర్తి చేశారు. జైలుకు రాకముందే వీరిలో కొందరు బీటెక్, ఎల్‌ఎల్‌బీ వంటి విద్యార్హతలు కలిగి ఉన్నప్పటికీ, కటకటాల వెనక్కి వచ్చిన తర్వాత కూడా అధైర్యపడకుండా దూరవిద్య (Open University) ద్వారా తమ చదువును కొనసాగించారు.
ఖైదీలలో నేర ప్రవృత్తిని దూరం చేసి, వారిలో సానుకూల మార్పు, జ్ఞానం, ఆత్మవిశ్వాసాన్ని నింపేందుకు తెలంగాణ జైళ్లు, దిద్దుబాటు సేవల శాఖ ఈ విద్యా కార్యక్రమాలను విశేషంగా ప్రోత్సహిస్తోంది. ఈ స్నాతకోత్సవంలో తెలంగాణ జైళ్ల శాఖ డీఐజీ డాక్టర్ డి.శ్రీనివాస్, చర్లపల్లి సెంట్రల్ జైలు సూపరింటెండెంట్ జి.ప్రమోద్ పాల్గొన్నారు. ముఖ్యఅతిథిగా హాజరైన తెలంగాణ గవర్నర్ శివ ప్రతాప్ శుక్లా పట్టాలను అందజేసి ఖైదీల పట్టుదలను అభినందించారు.
నిర్బంధ కాలాన్ని వృథా చేయకుండా పుస్తకాలతో స్నేహం చేసి ఉన్నత విద్యావంతులుగా మారిన ఈ ఖైదీల ప్రయాణం శిక్ష అనుభవిస్తున్న ఇతరులకు ఎంతో ప్రేరణగా నిలుస్తోంది. జైలు నుంచి బయటకు వచ్చిన తర్వాత సమాజంలో బాధ్యతాయుతమైన పౌరులుగా తిరిగి గౌరవప్రదమైన జీవితాన్ని గడిపేందుకు ఈ విద్య వారికి కొండంత అండగా నిలవనుంది.
