దేశవ్యాప్తంగా ఎంతోమంది వైద్య విద్యాభ్యర్థులు నిరీక్షిస్తున్న నీట్ యూజీ 2026 కౌన్సెలింగ్ షెడ్యూల్ విడుదలయ్యింది. ఆగస్టు 4 నుంచి ప్రక్రియ ప్రారంభం కానుండగా, అక్టోబర్ 10 నాటికి అడ్మిషన్ల ఘట్టాన్ని పూర్తిగా ముగించాలని ఎన్టీఏ లక్ష్యంగా పెట్టుకుంది. దేశంలోని వైద్య కళాశాలల్లో ప్రవేశాల కోసం నిర్వహించిన నీట్ యూజీ 2026 కౌన్సెలింగ్ షెడ్యూల్ను నేషనల్ టెస్టింగ్ ఏజెన్సీ (ఎన్టీఏ) శనివారం రాత్రి అధికారికంగా ప్రకటించింది. దీని ప్రకారం ఆల్ ఇండియా కోటా సీట్ల భర్తీకి సంబంధించి కౌన్సెలింగ్ ప్రక్రియ ఈ నెల 4వ తేదీ నుంచి ప్రారంభం కానుంది.
మరోవైపు, అండర్ గ్రాడ్యుయేట్ మెడికల్ కోర్సుల నూతన విద్యా సంవత్సరం (అకడమిక్ సెషన్) సెప్టెంబర్ 8 నుంచి ప్రారంభమవుతుందని ఎన్టీఏ తన ప్రకటనలో స్పష్టం చేసింది. కౌన్సెలింగ్ నిర్వహణ వివరాల్లోకి వెళితే, తొలి రౌండ్లో ఆల్ ఇండియా కోటా, డీమ్డ్, సెంట్రల్ యూనివర్సిటీల ప్రవేశాల ప్రక్రియ ఆగస్టు 4 నుంచి 17వ తేదీ వరకు కొనసాగుతుంది. ఈ రౌండ్లో సీట్లు సాధించిన విద్యార్థులు ఆగస్టు 22లోగా ఆయా కళాశాలల్లో రిపోర్ట్ చేయాల్సి ఉండగా, ఆగస్టు 23న అభ్యర్థుల పత్రాల వెరిఫికేషన్ ప్రక్రియ ఉంటుంది.
ఇక వివిధ రాష్ట్రాల కోటా మొదటి రౌండ్ కౌన్సెలింగ్ ఆగస్టు 13 నుంచి 22 వరకు నిర్వహించేందుకు ఏర్పాట్లు చేశారు. తదనంతరం రెండో రౌండ్ కౌన్సిలింగ్కు సంబంధించి ఆల్ ఇండియా కోటా ప్రక్రియ ఆగస్టు 24న ప్రారంభమై సెప్టెంబర్ 2 వరకు, రాష్ట్రాల కోటా కౌన్సెలింగ్ ఆగస్టు 31 నుంచి సెప్టెంబర్ 8 వరకు జరుగుతుంది. నిర్దేశిత సమయానికి ప్రవేశాల ప్రక్రియ పూర్తికావాలనే ఉద్దేశంతో శని, ఆదివారాలు, ఇతర సాధారణ సెలవు దినాల్లో కూడా కార్యాలయాలు పనిచేయాలని అన్ని మెడికల్ కాలేజీలకు స్పష్టమైన ఆదేశాలు వెళ్లాయి.
తదుపరి రౌండ్లు, స్ట్రే వేకెన్సీలతో కలిపి అక్టోబర్ 10 నాటికి అడ్మిషన్లను సంపూర్ణంగా ముగించనున్నారు. గతంలో నీట్ పరీక్ష నిర్వహణలో అవకతవకలు జరిగాయన్న తీవ్ర ఆరోపణల నేపథ్యంలో మే 3న నిర్వహించిన పరీక్షను రద్దు చేసిన సంగతి తెలిసిందే. ఆ ఘటనపై కఠిన చర్యలు చేపట్టిన ప్రభుత్వం 47 మంది ఎన్టీఏ అధికారులను విధుల నుంచి తొలగించి చట్టపరమైన చర్యలకు శ్రీకారం చుట్టింది. అనంతరం పారదర్శకంగా నిర్వహించిన రీ-టెస్ట్ ఫలితాలను జులై 16న విడుదల చేయగా, తాజాగా కౌన్సెలింగ్ షెడ్యూల్ రావడంతో విద్యార్థులు, తల్లిదండ్రులు ఉపశమనం పొందుతున్నారు.
