Middle East: మధ్యప్రాచ్యంలో దశాబ్దాలుగా నివురుగప్పిన నిప్పులా ఉన్న ప్రాంతీయ ఆధిపత్య పోరు ఇప్పుడు ముస్లిం ప్రపంచాన్ని రెండు బలమైన శిబిరాలుగా చీల్చే ప్రమాదకర అంచుకు చేరింది. యెమెన్‌‌లోని హౌతీ తిరుగుబాటుదారులు సరిహద్దులు దాటి సౌదీ అరేబియా గుండెకాయపై బాంబులు కురిపిస్తుంటే, ఇస్లామిక్ ప్రపంచంలోనే అత్యంత బలమైన సైనిక శక్తిగా పేరున్న ఈజిప్ట్ రంగంలోకి దిగేందుకు సై అంటోంది. "సౌదీకి ఏ ఆపద వచ్చినా మా సైన్యాన్ని పంపిస్తాం" అని ఈజిప్ట్ అధ్యక్షుడు చేసిన ప్రకటన అరబ్ గడ్డపై సరికొత్త సైనిక సమీకరణాలకు తెరలేపింది. ఇది కేవలం సౌదీ భద్రతకు సంబంధించిన వ్యవహారం మాత్రమే కాదు, అరబ్ ప్రపంచపు పట్టు కోసం సాగుతున్న అంతర్గత యుద్ధపు తీవ్రతకు నిదర్శనం.
రియాద్‌పై దాడులు.. భగ్గుమన్న అంతర్గత వైరం
రియాద్‌లోని కింగ్ ఖాలిద్ అంతర్జాతీయ విమానాశ్రయంపై జరిగిన ఆకస్మిక డ్రోన్ దాడి 13 మందిని బలిగొనడం, ఆ వెనుకే ప్రపంచ ఇంధన దిగ్గజం 'అరాంకో' ప్రధాన కార్యాలయంపై బాంబుల వర్షం కురవడం యావత్ గల్ఫ్ దేశాలను దిగ్భ్రాంతికి గురిచేసింది. ఈ దాడులు కేవలం హౌతీల సైనిక బలాన్ని మాత్రమే చూపించడం లేదు, వారి వెనుక నిలబడి అస్త్రశస్త్రాలు, నిఘా సమాచారం అందిస్తున్న ఇరాన్ వ్యూహాత్మక విస్తరణను స్పష్టం చేస్తున్నాయి. సౌదీ ఆర్థిక వ్యవస్థను, అంతర్జాతీయ ప్రతిష్టను దెబ్బకొట్టడమే లక్ష్యంగా సాగుతున్న ఈ దాడులు అరబ్ సమాజంలో సమతుల్యతను ఒక్కసారిగా దెబ్బతీశాయి.
ఈజిప్ట్ సైనిక కవచం
సౌదీ అరేబియాపై ముప్పు పెరిగిన ప్రతిసారీ కైరో అప్రమత్తమవుతుంది. అరబ్ ప్రపంచంలో సౌదీ ధనబలం, ఈజిప్ట్ సైనిక బలం సాంప్రదాయకంగా ఒకరికొకరు మద్దతుగా నిలుస్తూ వచ్చాయి. ఎర్ర సముద్ర తీరంలోనూ, సూయజ్ కాలువకు దారితీసే బాబ్-ఎల్-మండేబ్ జలసంధి పరిసరాల్లోనూ హౌతీల ప్రాబల్యం పెరిగితే అది ఈజిప్ట్ వాణిజ్య ప్రయోజనాలకే నేరుగా గొడ్డలిపెట్టు. అందుకే, సౌదీ గడ్డపై దాడులు తీవ్రతరమవుతున్న వేళ తమ బలగాలను రంగంలోకి దించడానికి ఈజిప్ట్ సిద్ధమవుతోంది. ఇది జరిగితే, దశాబ్దాల తర్వాత అరబ్ భూభాగంలో రెండు ప్రధాన ముస్లిం శక్తుల సైనిక పరస్పర సహాయం పూర్తి స్థాయి యుద్ధ రూపం దాల్చుతుంది.
చీలిపోతున్న ముస్లిం సమాజం..
ఈ ఘర్షణ కేవలం సౌదీ-ఎమెన్ సరిహద్దులకు పరిమితం కాకుండా ముస్లిం దేశాలను స్పష్టమైన వర్గాలుగా విభజిస్తోంది. సంప్రదాయ సున్నీ అరబ్ రాజ్యాల రక్షణే ధ్యేయంగా ఏర్పడుతున్న బలమైన సైనిక, ఆర్థిక ఐక్యత సౌదీ - ఈజిప్ట్ కూటమిలో ఏర్పడుతుంది. షియా ప్రాబల్యంతో పశ్చిమాసియాలో తన పట్టును బిగించేందుకు ఇరాన్ - హౌతీ పక్షాలు నిరంతరం ఒత్తిడి పెంచుతున్నాయి. మరోవైపు టర్కీ అధ్యక్షుడు ఎర్డోగన్‌ను ఈ సమస్య పరిష్కారానికి సంప్రదించాలనే ప్రతిపాదనలు, అమెరికా మద్దతు ఇస్తున్న సంకేతాలు పరిస్థితిని గ్లోబల్ వార్ దిశగా మళ్లిస్తున్నాయి.
ప్రపంచాన్ని వణికిస్తున్న ఎర్ర సముద్ర సంక్షోభం
ముస్లిం దేశాల మధ్య చెలరేగుతున్న ఈ ఆధిపత్య పోరాటం బాబ్-ఎల్-మండేబ్ మీదుగా సాగే అంతర్జాతీయ చమురు సరఫరాను స్తంభింపజేసేలా ఉంది. ఒకవేళ ఈజిప్ట్ బలగాలు యెమెన్ సరిహద్దుల్లోకి అడుగుపెడితే, యుద్ధ రంగం మరింత విస్తరించి మొత్తం ఇస్లామిక్ సమాజంలో రాజకీయ అనిశ్చితి పతాక స్థాయికి చేరుతుంది. అరబ్ దేశాల మధ్య సాగుతున్న ఈ ప్రచ్ఛన్న పోరు శాంతి చర్చలతో ఆగుతుందా, లేక పరస్పర విధ్వంసానికి దారితీసి మధ్యప్రాచ్యాన్ని శాశ్వతంగా విభజిస్తుందా అన్నది అత్యంత క్లిష్టమైన ప్రశ్నగా మారింది.
